کەشێکی ئارام و سیاسی دەتوانێت کاریگەری بێت بە سەر کۆنگرەی نەتەوەیی کورد لە پێتەختی باشووری کوردستان کە بڕیارە بەم زووانە بەرێوە بچێت، بێ گومان جیا لە لایەنە سیاسییەکانی هەر چوار پارچەی کوردستان، سەرجەم نەتەوەی کورد بە کۆچێندراوەکانیشەوە تێیایدا سوودمەند دەبن.
بە لە بەر چاو گرتنی ژئۆپۆلۆتیکی جوغرافی – سیاسی هەرێمی کوردستان بە شێوەیەکی تایبەت و، باروودۆخی سیاسی ئیستای ناوچەکە و ئەو ئاڵۆزیانەی کە لە ئارا دان، بەر پرسیارێتی هەر تاک و لایەنێکی سیاسی بەشدار بوو لە کۆنگرەی نەتەوەییدا قورستر دەکات.
کۆنگرەی نەتەوەیی و بڕیارەکانی بێ گومان کاریگەریان دەبێت لە سەر چۆنییەتی خەباتی پارچەکانی دیکەی کوردستان، هاوکات دەشتوانێت وێڕای بەهێز کردنی پێگەی سیاسی نەتەوەی کورد روو بە دەرەوە، هزری دێمۆکراسی خوازی و ژیانی ئاشتەوایی وکلتووری گەلەکەمان بباتە ئاستێکی دیکە لە رووی جیهانییەوە کە ئەمەش سوودمەندییەکی گشتییە بۆ نەتەوەکەمان.
ئەرکی کۆنگرەی نەتەوەییە کە بە شێوەیەکی سەردەمیانە و سیاسەتێکی نیشتمانپەروەرانە مامەڵە لە تەک وەزعەکە بکات، باروو دۆخی سیاسی ئێستای ئیران، ترکیە، سووریە و عێراق، لە رووی سیاسەتی جیهانی و ناوچەییەوە تاوتوێ کات و، بە خوێندنەوەیەکی وردوو سەردەمیانە بەرژەوەندییە باڵاکان دەست نیشان بکات و، لە رووی سیاسی و ئابووری و مێتۆدی ئەمڕۆی خەباتی رەوای گەلەکەمان بۆ دەستە بەر کردنی مافە رەواکان لەپارچەکانی دیکەی کوردستانیش، پێویستە بە سیاسەتێکی ژیرانە هەستی لایەنە بەشداربووەکان، چ لایەنە کوردییەکان چ ئەو وڵاتانەی کە خاکی پیرۆزی کوردستانیان پێوە لکێندراوە یاخۆ ئەو وڵاتانەی کە لە کۆنگرەکەدا بەشدار دەکرێن لە بەر چاو بگرێت.
بێ گومان نابێت ئەوە لە بەر چاو نەگیردرێت کە، نەیارانی کۆنگرەی نەتەوەیی کورد هەموو هێز و توانای خۆیان خستووتە گەڕ و، بە سەرجەم لق و پۆیەکانیانەوە لە هەوڵی دوو بەرەکی و ئاژاوە نانەوە دان.
کە وابوو پێویستە هەمووتاک و لایەنەکانی بەشداربوو لەم کۆنگرەیەدا، بە رووحییەتێکی نەتەوەییەوە بەرەو کەند و کۆسپەکانی کۆنگرە هەنگاو بنێن و، لە پێناو سەرخستنی کۆنگرەی نەتەوەییدا هەموو هەوڵەکانیان بخەنەگەر.
ئهو بابهتانهی له کوردستان نێت دا بڵاودهکرێنهوه، بیروبۆچوونی خاوهنهکانیانه، کوردستان نێت لێی بهرپرسیار نییه.