لە سیستمی سیاسی و حوکمڕانی کۆماری ئیسلامی ئێران بە پێی یاسای بنەڕەتی، دوای رەهبەری، سەرۆککۆمار گەورەترین دەسەڵاتدارە، سەرۆککۆمار دەسەڵاتی جیبەجێکردنی یاسای بنەڕەتی هەیە و بەرپرسیارێتی ئیجرائییاتی لە ئەستۆدایە، واتە سەرۆکی( قووە ی مووجریەیە )، بە پێی یاسا سەرۆکی قوەی مووجرییە دەتوانێت بە رەزامەندی پاڕڵمان پرۆژەیی نەتەوەیی دابنێت و بوجەی بۆ دیاری بکات، هاوکات دەسەڵاتی دیاری کردنی کابینەیەکی هەیە کە بریتییە لە وەزیر و پارێزگار وسەفیر کە پێویستە ئەمانەش رەزامەندی پاڕڵمانیان لەسەر بێت، لەهەمانکاتدا سەرۆکۆماری ئێران سەرۆکی شۆرای باڵای ئەمنییەتی نەتەوەییەو سەرۆکی شۆڕای شۆڕشی کلتوریشە لەو وڵاتە.
سەرەڕای ئەوەی کە یاسای بنەڕەتی ئێران دەسەڵاتی ئیجرائییاتی وڵاتی بە سەرۆککۆمار بەخشیوە، بەڵام رەهبەر و دەست و پەیوەندییەکانی بە ئاشکرا دەست دەخنە کار و باری سەرۆککۆمار و تەنانەت بە بێ هیچ ئاگادارکردنەوەیەک وەزیرکانی سەرۆککۆمار لە سەرکار لادەبەن، ئەمە لە لایەک، لەلایەکی دیکەشە سەرۆککۆمار هیچ دەسەڵاتێکی بە سەر سێ ئەسڵی سەرەکیدا واتە، سیاسەتی دەرەکی، هێزی نیزامی و سیاسەتی ناوەکی (هەستەیی) نییە، ئەم سێ ئەسڵە سەرەکییە بە عەلاوەی ئابووری وڵات لە دەسەڵاتی رەهبەری دایە.
کەوابوو دەتوانین بڵێن سەرۆککۆمار لە نیزامی کۆماری ئیسلامیدا یاری سیاسی پێدەکرێت و، تەنیا مۆرەیەکە کە ئەوامری رەهبەری جێبەجێدەکات، هەر لە سەرەتای خۆ سەپاندنی کۆماری ئیسلامی بە سەر گەلانی ئێراندا ئەم سیستمە کاری پێدەکرێت و، هیچکام لە سەرۆککۆمارەکانی ئەو نیزامە، هەر لە بنی سەدرەو تا رووحانی لە راستیدا دەسەڵاتێکی ئەتۆیان نەبووە و ناشبێت. / ماهییەتی کۆماری ئیسلامی لە میانە خۆسەپاندنی بە سەر گەلانی ئێراندا تا ئیستا سەلمێنەری ئەم واقعەیە/
سیاسەتی چەند هەنگاو بۆ پێش و دواوەی کۆماری ئیسلامی بە رادەیەک توانیوێتی بە هێنانە سەرکاری دەمووچاوی توندرەو ومیانە رەو و ئیسلاح خواز و رێفۆڕمخواز هەم لە ناوخۆ و هەمیش رووبە کۆمەڵگەی جیهانی یاری بکات، ئەمەی کە تا چەند لەم یارییە سیاسیانەدا سەرکەوتوو بوو یا نا هەم بۆ گەڵانی ئێران و هەمیش بۆ کۆمەڵگەی جیهانی روون و ئاشکرایە.
بە بڕوای من بە هاتنە سەرکاری حەسەن رووحانی هیچ ئاڵ و گۆڕێک بە سەر سیاسەتەکانی کۆماری ئیسلامیدا لەهەر دوو حاڵەتی دەرەکی و ناوخۆییدا نایەت، ئازاد کردنی چەند بەندکراوێک یا خۆ درووشمگەلێکی ئاڵتوونی، کە خاتەمی ئاڵاهەڵگری بوو و، بە قەتل و عامی رۆشنبیران و ئەهلی قەڵەم لە ژێر ناوی ( قتل های زەنجیرەی) ئامانجەکانی کۆماری ئیسلامی پێکا، نە رووحانی و نە هیچ رووحانییەتێک ناتوانێت ئیتر سیمای دڕندە خووی و چەواشەکارییەکانی کاربەدەستانی ئەو نیزامە بشارێتەوە.
درێژەدان بەم یارییە سیاسیە لە ژێر ناوی ( نەرمی نواندنی کۆماری ئیسلامی) لە هەمبەر چارە سەر کردنی بابەتگەلی ناوەکی، نێونەتەوەیی و نێودەوڵەتی، کە تەنگیان بەو رێژیمە هەڵچنیوە و تا رادەیەکی زۆرلە کۆمەڵگەی جیهانی تەریکیان خستووەتەوە، بە هێنانە سەر کار و لە رێگای حەسەن رووحانییەوە کە قوتابییەکی ئەو مەکتەبە توتالیتەیەیە، بە یارییەکی سیاسی و دۆڕاوی دەزانم .
ئەمێستاکە کە کۆماری ئیسلامی لە تەک چەندین قەیرانی ناوخۆیی و دەرەکی رووبەروویە و، بەدرووشمی گورانکاری لە سیاسەتی دەرەکی و ناوەکی(هەستەیی) لەهەوڵی قەرەبۆی زیانەکانی دایە، پێویستە حیزب و لایەنە سیاسییەکانی رۆژهەڵاتی کوردستان کەلەبەری خەسار و زیانەکانی بزووتنەوەی ئەو بەشەی نیشتمانەکەمان کە لکێنراوە بە ئێران دەست نیشان بکەن و، لەیەک ریزیدا بە گوتاری هاوبەش سیاسەتە چەواشەکارییەکانی ئەو رێژیمە روو بە کۆمەڵگەی جیهانی زیاترلە قاو بدن .
٢١/٩/٢٠١٣
ئهو بابهتانهی له کوردستان نێت دا بڵاودهکرێنهوه، بیروبۆچوونی خاوهنهکانیانه، کوردستان نێت لێی بهرپرسیار نییه.