ددەما پڕوپاگندە و ڕیکلام و خودانە ناسینا ژبوو هەلبژارتنێن ساڵا ٢٠٠٩ دا هاتینە ئەنجامدان، فەرهاد پیڕباڵێ نڤیسکار و ماموستایێ زانکویێ گوتبوو: مسعود بارزانی ژ کاندیدێن دیکە گونجاو ترە داکوو مروڤ دەنگێ خوو بدەتێ. بەس هندەک کەس لهەمبەری وی دەرکەفتن و بناڤێ چەند جوانێن گەرمیانی و لدژی وێ گوتنا وی و دبن ناڤێ نەڕازیبونێدا چەند پەرتوکەکێت وی شەوتاندن.
ڤێ جارێژی دەنگەک دەرکەت کوو جەمال غەمبارێ هوزانڤان دێ دهەلبژاردنێن پێشیا مەدا بیتە کاندیدێ (ی ن ک) و لهەمبەری ڤێ بویەرێژی جارەکا دیکە چەند جوانێن دیکەیێن گەرمیانی دبن ناڤێ نەڕازیبوونێدا دیوانا وی شەوتاندنن.
ئەگەر ببیرا خوو بینین لهەمبەری هەردوو بویەراژی دەنگێ نەڕازیبونێ هەبوون، بەس مخابن دەنگێ پشتەڤانیێژی هەبوون و، گەلەک کەس ژی دبن ناڤێ ئازادیا دەربڕینا هزرێدا پشتگیریەکا زەلال دانە بوویەرێ و، وانا ئەو ئێکژی بهەلوەستەکا دیموکراتی ناساندن.
بلبەرچاڤ گرتنا جوورێ بویەرێ و جهێ بویەرێ و هوکارا بویەرێ مروڤ دبینە کوو ئەڤە پڕوژەیەکا سیاسیە و، یا دبن ناڤێ پاراستنا پێشکەفتن خازیێ و تەپەسەرکرنا پاشڤەڕوویێ تێتە کرن. هەروەسا خودانێن پڕوژەیژی کوو هندەک نەزان و نەفامن و یێ خوو کرینە بەردەڤکێ پێشکەفتن خازیێ و بێی تشتەکیژی ژپێشکەفتن خازیێ بزانن یێ هەولددەن کوو ڕەوایەتیێ بدەنە شەوتاندنا پەرکوتا.
بەس یاکوو من ژدیموکراتیێ دیتی و بیهیستی، ئەز وێ لێ تێگەهشتم کوو تاکێ دیموکرات ب چ جورەکی وی مافی نادەتە خوو کوو ڕێگیریێ لهەمبەری هزر و چالاکیێن کەسەکێ دیکە بکەت. بواتەیەکا دیکە کەسێ دیموکرات یان جڤاکا دیموکرات چ پێدڤی بوێ ئێکێ نینە پەرتوکێن خەلکەکی بشەوتینە و پاشیکا دیف ئارگومێنتادا بچە. کەس و جاڤاکێن دیموکرات بەردەوام هەست بگرنگیا جوداهیا هزرا تکەن و بەردەوام ڕێزێژی ددەنە وێ هزرا تازە، یاکوو دئەنجاما ناکوکیێن دوو هزرادا بەرهەم هاتی. بواتەیەکا دیکە ئەو نرخ و گرنگیا فرە هزریێ باش دزانن، ژبەر وێژی ئەو وێ کرێتیێ لهەمبەر ناکەن.
ئەز باوەرم کوو ئەگەر پێشی ژ شەوتاندنا پەرتوکا نەهێتە گرتن دێ پێشوازیێ لداهاتوویەکا گەلەک کەڤن و کرێت کەین. ژبەرکوو ئەگەر ئەڤروکە کەسەک دبن ناڤێ پێشکەفتن خازیێژی پەرتوکا بشەوتینە و ژێڕا بچیتە سەر، وێ دەمێ دبە کوو سبەی کەسانەک دەرکەڤن هەما بزەلالی بێژن ئەمێ ژبوی نەهێشتنا پێشکەفتن خازیێ و بوو خوودێ پەرتوکا شەوتینین. وێجا گەلو دێ وێ دەمێ ئەڤ پێشکەفتن خازە چ بێژنە خوو، یانژی دێ بچ جورەکی ناڕەزیبوونا لهەمبەری وێ بویەرێ ئەنجامدەن؟.
یافەرە کوو مروڤ شەوتاندنا پەرتووکا بگشتی شەرمەزا بکەت لئالیەکی و یێن پەرتوکێن ئەدەبیژی شەرمەزار و ڕیسوابکەت بتایبەتی. ژبەرکوو ئەڤ کریارە کارێ سیاسی و بەردەستێن سیاسیێن نەزانن و، ئەو لهەمبەری هەر خەلەتیەکا خوو، بجورەکی سزایا خووژی وەرتگرن، بەس خەلەتیا لهەمبەری وێژەیا کوردی و پەرتوکێن وێژەیی خەلەتیەکا مەزنە و یافەرە کوو جڤاک بگشتی و بزەلالی سزایا وانا بدەت و ڕێکا دووبارە بونێژی لوانا بگریت.
ئهو بابهتانهی له کوردستان نێت دا بڵاودهکرێنهوه، بیروبۆچوونی خاوهنهکانیانه، کوردستان نێت لێی بهرپرسیار نییه.