هەموتان لەوەیە ناوی خۆرنەوەزانتان بیستوبێت یان رۆیشتبێتان بۆ ئەوێ، خۆرنەوەزان ئەو هاوینە هەوارە سروشتییەی گەرمیانە کە چەندین شوێنی دڵڕفێن لە خۆ دەگرێت و دەکەوێتە نێو سنووری هەردوو ئاوایی " گەرمک و قەواڵی" سەر بە شارەدێی "زنانە"ی سەر بە قەزای "خورماتوو".
ئەوەی یەکجار رۆیشتبێتە "خۆرنەوەزان" دڵنیام هەمیشە بەئاواتی دووبارە چونەوەیەتی بۆ ئەو شوێنە خۆشە و عەشقی سروشتە خۆشەکەی دەبێت و حەزی بە دووبارە مەلەیەکی "ئاوە سپی" دەبێت.
خۆرنەوەزان، رۆژانە گەشتیارێکی زۆر رووی تێدەکەن و بەڵام بەبۆنەی نەبوونی جێگەیەک تا شەوانە لێی بمێنیتەوە و رێگا سەختەکەی کە تەنها بە ئۆتۆمبێلە بەرزەکان نەبێت ناتوانیت بچیت بۆ ئەوێ گەشتیارەکان بەرلە خۆرئاوابوون دەگەرێنەوە و ئاواتی دووبارە سەردانەوەی دەکەن.
ئەوەی لام سەیربێت هەرێمی کوردستان هیچ ئاوەرێکی لە ناوچەی داوودەی نەداوەتەوە و ئەتوانین بڵین بەهیچ شێوەیەک خزمەتی ئەو ناوچانەی نەکردوە، بەڵام خۆرنەوەزان كە بەشێكە لەو ناوچەیە هەر بیریشی لێنەکراوەتەوە تا بکرێتە هاوینە هەوارێک و شوێنێک بۆ حەوانەوەی خەڵکی.
ئەوەی ڕاستبێت "خۆرنەوەزان" و ناوچەکانی سەر بە ناحییەی "زنانە" تاکو ئێستا هەردوو حکومەتی "هەرێم و بەغدا" خۆی بەخاوەنی دەزانێت و کەسیانیش بیریان لێ نەکردۆتەوە تاوەکو خزمەتێک بە خەڵکە رەنجدەرەکەی بگەیەنن کە ساڵانێکی زۆرە جێگاکەی ئەوان لانکەی شێرە پێشمەرگەکان بوو و چەندەها رۆڵەی خۆی کردۆتە قوربانی وڵاتەکەی.
من لێرەدا هیچ داوایەک لە حکومەت و حزب ناکەم کە ئاوەرێک لە خۆرنەوەزان بدەنەوە چونکە ئەوان هەمیشە ئەم ناوچەیەیان قۆرغ کردوە و ئەتوانم بڵیم "سفڵەن" لە ئاستی ئەو شوێنە، بەڵام داواکاریم لە خەڵکی ئەو ناوچەیە هەیە چیتر نەهێلن موزایەدا بەناوی ئەوانەوە بکریت و تەنها بۆ مەبەستی سیاسی پەیمانی بریقەداریان پێبدرێت.
تێبینی: "خۆرنەوەزان" لەوەوە هاتووە، چەندین شوێن لەخۆ دەگریت کە خۆر بەری ناکەویت و هەمیشە کانییەکی سروشتی و سەوزاییەکی بەرفراوانی هەیە.
ئهو بابهتانهی له کوردستان نێت دا بڵاودهکرێنهوه، بیروبۆچوونی خاوهنهکانیانه، کوردستان نێت لێی بهرپرسیار نییه.