شەڕ و پێکدادانەکانی نێوان ئازادیخوازانی کورد و دوژمنان لە کوردستانی ڕۆژئاوا سات لە دوای سات گرژی و ئاڵۆزی و خوێناویبونی زیاتر و پەرەسەندنی مەترسیدارتر بەدوای خۆدا دەهێنێت .
گومانی تێدا نیە دوژمنانی کورد هەمیشە لە بۆسەدان بۆ ئەوەی لە هەر کوێ کورد بیەوێت جوڵەیەک و تەکانێک بە ئاراستەی سەربەخۆیی و سەرفرازی بدات، ئەوان یان بە بازوی خۆیان یانیش لە ڕێگەی پڕچەککردن و بە جاشکردنی خەڵکانی نەفس نزمی کوردەوە، لە دژی ئەو جوڵە سەربازی و سیاسیە وەستاونەتەوە و یان دوچاری ئیفلیجیان کردوە یانیش ڕوبەڕوی هەرسپێهێنانیان کردوە .
ئەوەی ئەمڕۆ لە ڕۆژئاوای کوردستاندا دەگوزەرێت، تەکانێکی ترە بەرەوە ئاسۆی ئازادی و ڕزگارکردنی ئەم بەشە داگیرکراوەی وڵاتەکەمان وەک باشوری کوردستان، بەڵام مەخابن ئەوەندەی ئاگاداری ڕەوشەکەبین، دەستوەردانێکی زۆر و هەوڵدانێکی بێپەروای لایەنە دەرەکیەکان چ وەک ڕژێمەکەی ئەسەد و چ وەک هێزە نەیارە ستەم کارە ناوچەیی و جیهانیەکان دەبینرێت، هەرچەند بەداخەوە ئەم کارە بوە بە هۆکاری دروستبونی شەڕی ( کوردکوژە ) و سوربونی دەستەکان بە خوێنی یەک، کە کوردستانی باشور لەم ئەزمونە تاڵەدا پشکی شێری بەرکەوتوە، هەربۆیەش دەبێت هێزە گەورەکانی باشور ڕۆڵی مێژویی خۆیان لە تەشەنە نەکردنی ئەم کوشتوبڕەدا ببینن، سەرباری ئەمەش و لەمەش مەترسیدارتر بۆ ئەم دۆخە پەرتەوازەیەی ناوماڵی کورد لەم بەشەی وڵاتمان، ئەم فتوایەی شەمشەمەکوێرەکانی تاریکستان و مۆرسیسزمەکان ( ئەوانەی سەر بە مۆرسین ) بە جەستە لە کوردستان و ناوچەکەن کە دەڵێن ( ئهوهی کورد بکوژێ ژنی کوردی پێ حهڵاڵه و دهشچێته بهههشتهوه ) .ئەمە هەڵوێستی دوژمنانی کوردە و کەچی مۆرسیزمەکانی کوردستانی باشوریش پەیتا پەیتا گەنجان و ڕۆڵە بەجەرگەکانی ئێمە بە پاساوی ( جیهاد ) ڕەوانەی دۆزەخی بەرەیەک دەکەن، کە سور دەزانن لە دژی ڕۆڵەکانی گەلەکەمان لە ڕۆژئاوای کوردستان داگیرساوە.
لێرەوە من داوا لە حکومەتی هەرێمی کوردستان دەکەم، کە دەرگای سنورەکانی بەڕوی ئەو هاووڵاتیانەدا بکاتەوە، کە ڕوبەڕوی مەترسی کوشتن و ( غەنیمە ) دەبنەوە ! چونکە کوردستانیانی باشور ئەزمونێکی دور و درێژ و خوێناوی لە بێداڵدەیی و دڕندەیی بەعسیەکان دا تۆمار کردوە، ئەگەر بهاتبایە و لەو کاتەدا حەوانگەیەک یان سێبەرێک وەک ئەوەی ئەمڕۆ لە باشوری وڵاتدا هەیە، هەبوایە، ئەوا ئەو قوربانیە زۆرە و ئەو ڕوبارە خوێنەشمان لە بەر نەدەڕۆیشت.
ئەرکی نوسەران و ڕۆشنبیران و ڕێکخراوە مەدەنیی و حیزب و لایەنە سیاسیەکانی کوردستان لە ئاستی داخستنی سنوری نێوان سوریا و کوردستان چیتر بێدەنگی هەڵنەبژێرن، ئەم کارەی حکومەت و دەسەڵاتدارانی ئەو دەڤەرە، هاوکاریەکی ناڕاستەوخۆیە بۆ زیاتر قڕکردنی ڕۆڵەکانمان لەو بەشەی کوردستان
ئەرکی حکومەتی هەرێمە کە ئیتر ڕێگە بە هیچ حیزب و ڕێکخرا و مزگەوتێک نەدات ڕۆڵەکانمان ڕەوانەی ئەم شەڕە کورد کوژەیە بکەن، یانیش ڕەوانەی تەنوری ( جیهاد ) بکرێن ! هەروەها کارتە سیاسی و ئابوریەکانی لە بەرامبەر دەستوەردانەکانی تورکیا بخاتە کار و بە ڕەسمی داوای وەستاندنی هاوکاریەکانی بکات بۆ لایەنە توندڕەوە شەڕکەرەکانی ( قاعیدە و النسرە و جیهادیەکان ) http://www.chatrpress.com/Detail.aspx?id=12934&LinkID=7 .
لەم ساتە چارەنوسساز و هەستیارەدا، بە جێگای خۆی دەزانم، کە داوا لە ڕەوەندی کوردی و تەواوی ڕێکخراوە کوردستانی نیشتیمانی و کۆڕ و کۆمەڵە و ڕێکخراوە مەدەنیەکان بکەم تا هەر کەسە و لە لای خۆیەوە ئەم پەیامە مەترسیدارەی ( النصرة و جیهادی ) یەکان لە سوریا بە ناوەندە دەوڵەتیەکان بگەێنن، ئەم فتوا و بەیاننامەیە، جاڕدانی جەنگێکی لەناوبردنە لە دژی گەلەکەمان لە سوریا .
لێرەدا بە پێویستم زانی و لە سەر ئیزنی ماڵپەڕی ئازیزی ( چاودێر پرێس ) ئەم لینکەتان بۆ داببەزێنم تا ئەوانەی ئاگاداریان لە بارەیەوە نیە، با ئاگادار بن .
http://www.chatrpress.com/Detail.aspx?id=12934&LinkID=7