ئامانج ناجی نەقشبەندی

بڕیاره‌ له‌ ڕۆژانی (27-28) ی ئه‌م مانگه‌دا كۆنگره‌ی ته‌سه‌وف له‌ شاری هه‌ولێری پایته‌ختی هه‌رێمی كوردستان به‌ڕێوه‌ بچێت به‌ به‌شداری شێخانی ته‌ریقه‌تی نه‌قشبه‌ندی و قادری وسه‌دان زانای ئاینی و ڕۆشنبیرو پسپۆری بواری ته‌سه‌وف و عیرفانناسی له‌ ناوه‌وه‌ و ده‌ره‌وه‌ی كوردستان، هه‌رچه‌نده‌ پێشتر وابڕیاربوو كه‌ له‌ چه‌ند رۆژی داهاتوودا ئه‌م كۆنگره‌یه‌ به‌ڕێوه‌بچێت به‌ڵام به‌هۆی ڕووداوه‌كانی ڕۆژئاوای كوردستان و ئاماده‌كارییه‌كان بۆ به‌ستنی كۆنگره‌ی نه‌ته‌وه‌یی بڕیاری دواخستنی درا...ئاشكرایه‌ كۆنگره‌یه‌كی هاوشێوه‌ به‌ر له‌ چه‌ند ساڵێك له‌ شاری سلێمانیش به‌ڕێوه‌چوو كه‌ تیایدا چه‌ندین كه‌سایه‌تی ئاینی و توێژه‌ر و لێكۆڵه‌ری بواری ته‌سه‌وف و عیرفان و رێبازی نه‌قشبه‌ندی له‌سه‌رتاسه‌ری جیهانه‌وه‌ تیایدا به‌شداربوون، كه‌ به‌شێوه‌یه‌ك له‌ شێوه‌كان به‌دوور نه‌بوو له‌ ده‌ستێوه‌ردانی لایه‌نی حزبی و به‌كارهێنانی بۆ به‌ده‌ستهێنانی مه‌رامی سیاسی...ئه‌مه‌ له‌لایه‌ك، له‌لایه‌كی دیكه‌ش كه‌سانێك به‌كه‌ڵك وه‌رگرتن له‌ رێزی نازناوی نه‌قشبه‌ندی له‌ كۆمه‌ڵگه‌ی كوردیدا وه‌ك پیشه‌ی هه‌میشه‌ییان ڕووداو و بۆنه‌ی هاوشێوه‌ی ئه‌م كۆنگره‌یه‌یه‌ به‌ هه‌لێك ده‌زانن بۆ خۆده‌رخستن و وه‌ده‌ست خستنی به‌رژه‌وه‌ندی تایبه‌ت ده‌بنه‌ نوێنه‌ری شێخی ته‌ریقه‌ت و ده‌م ڕاست و خاوه‌ن قه‌ڵه‌م و بیرمه‌ند و شاره‌زا و خه‌بیر، تاد...له‌ پێناو ماسی گرتن له‌ ئاوی لێڵدا، له‌م سه‌رده‌مه‌شدا كارێكی ئاسانه‌ هه‌روه‌ك چۆن كه‌سانێك بوونیان هه‌یه‌ بازرگانی ده‌كه‌ن به‌ سیاسه‌ته‌وه‌، پێده‌چێت بازرگانیكردن به‌ ئاینی پیرۆزی ئیسلام و رێبازی نه‌قشبه‌ندی یه‌وه‌ بازاڕی گه‌رمتر بێت، له‌ هه‌ندێك كاتیشدا ده‌ستكه‌وته‌كانی زیاتربن.هیوادارین كۆنگره‌ی ته‌سه‌وف كه‌ ئه‌م جاره‌ له‌ هه‌ولێری پایته‌خت به‌ڕێوه‌ده‌چێت كه‌سانی له‌و جۆره‌ نه‌كرێنه‌ سووره‌ی به‌ر له‌شكر و ئه‌م دیارده‌ دزێوه‌ دووباره‌ نه‌بێته‌وه‌.

گاڵته‌جاڕی قه‌ده‌ریش له‌وه‌دایه‌ كه‌ ئان وساتی به‌ستنی كۆنگره‌ی ته‌سه‌وف كه‌ له‌ پایته‌ختی هه‌رێمی كوردستاندا ده‌به‌سترێت پاش تێپه‌ربوونی ساڵێكه‌ به‌سه‌ر هێرشه‌ دڕندانه‌كه‌ی كۆمه‌ڵێك چه‌كدار و چه‌ته‌ی حزبێكی ڕۆژهه‌ڵاتی كوردستان به‌ فه‌رمانی ڕاسته‌وخۆی جێگری سكرتێری ئه‌وحزبه‌ و به‌پێی پلانێكی پێشوه‌خت بۆ سه‌ر خانه‌قای نه‌قشبه‌ندی له‌ شاری سلێمانی له‌ ناوه‌ڕاستی مانگی ڕه‌مه‌زاندا له‌ شه‌وی 8/4/2012 كه‌ به‌سه‌ختی بریندار بوونی سێ ئه‌ندامی بنه‌ماڵه‌ی شێخانی نه‌قشبه‌ندی هه‌ورامانی لێكه‌وته‌وه‌ كه‌ یه‌كێكیان به‌ڕێز (ئه‌حسه‌ن شێج جه‌مال) بوو كه‌ كوڕه‌زای حه‌زره‌تی (شێخ عوسمان سراج الدین نه‌قشبه‌ندی) ه‌ وپێشمه‌رگه‌ی دێرینی بزوتنه‌وه‌ی ڕزگاری خوازی ڕۆژهه‌ڵاتی كوردستانه‌...به‌ڵێ ئه‌م كاره‌ساته‌ كرایه‌ سه‌ر خانه‌قای ڕێبازی نه‌قشبه‌ندی، ئه‌و ڕێبازه‌ی كه‌ جه‌نابی سه‌رۆك مه‌سعود بارزانی چه‌ندین جار جه‌خت ده‌كاته‌وه‌ له‌سه‌ر ئه‌وه‌ی بنه‌ماڵه‌ی بارزانی به‌ شانازیه‌وه‌ سه‌ر به‌و ڕێبازه‌ن، به‌ڵام به‌داخه‌وه‌ له‌ هه‌رێمی كوردستاندا كه‌ به‌ڕێز كاك (نێچیرڤان بارزانی) له‌ لوتكه‌ی ده‌سه‌ڵاتی جێبه‌جێكردندایه‌...كه‌ به‌رێزیشیان به‌هه‌مان شێوه‌ له‌ گه‌لێك بۆنه‌دا په‌یوه‌ست بوونی بنه‌ماڵه‌كه‌یان دووپات ده‌كاته‌وه‌ به‌ ڕێبازی نه‌قشبه‌ندیه‌وه‌...دیسان به‌ داخه‌وه‌ له‌م هه‌رێمه‌دا كه‌ به‌ڕێز (مه‌سرور بارزانی) لێپرسراوی باڵاترین و هه‌ستیارترین ده‌زگای ئه‌منیه‌...نه‌ك ته‌نها ده‌ستدرێژی كرایه‌ سه‌ر بنه‌ماڵه‌ی شێخانی هه‌ورامان و خانه‌قای نه‌قشبه‌ندی كه‌ سیمولی شانازی ئێوه‌یه‌، نه‌ك ته‌نها ئه‌و كه‌س و لایه‌نه‌ دیار و ناسراون له‌لای ده‌زگا ئه‌منیه‌كان ناو و ناونیشانیان ئاشكرایه‌و هیچ لێپێچینه‌وه‌یه‌كیان له‌گه‌ڵدا ئه‌نجام نه‌درا هێنده‌ نه‌بێت كه‌ چه‌ند كه‌سێكیان ده‌ستگیر كران مه‌خابن دواتر به‌ كه‌فاله‌ت ئازاد كران تاوه‌كو ئێستاش كه‌یسه‌كه‌ له‌ نێوان سنوری سه‌وز و زه‌رددا به‌ بێ ئه‌نجام و به‌ هه‌ڵواسراوی ماوه‌ته‌وه‌...به‌ڵكو له‌ هه‌ولێر و له‌ ژێر سایه‌ی ده‌سه‌ڵاتدا ڕێزیان لێده‌گیرێت و له‌ بۆنه‌و ئاهه‌نگه‌ حزبیه‌ جۆربه‌جۆره‌كاندا بوونیان هه‌یه‌..له‌وه‌ش سه‌رسوڕهێنه‌رتر له‌ دانیشتن و ئاماده‌كارییه‌كان بۆ به‌ستنی كۆنگره‌ی نه‌ته‌وه‌یی تاوانباره‌ سه‌ره‌كیه‌كانی ئه‌و هێرشه‌ نامرۆڤانه‌یه‌ شانبه‌شانی سه‌رۆكی هه‌رێم داده‌نیشن و گوێ له‌ ڕاو بۆچوونیان ده‌گیرێت و له‌ ڕاگه‌یاندنه‌كانی نزیك له‌ پارتی دیموكراتی كوردستان چاوپێكه‌وتنیان له‌گه‌ڵ ئه‌نجام ده‌درێت، له‌كاتێكدا له‌ مه‌له‌فی كه‌یسه‌كه‌ كه‌ له‌ به‌رده‌ستی هێزه‌كانی پۆلیسدایه‌ هه‌ندێكیان داواكراون و به‌پێی یاسا ده‌بوو مامه‌ڵه‌یان له‌گه‌ڵ ئه‌نجام بدرێت، ئاكامی ئه‌م جۆره‌ هه‌ڵوێستانه‌ و دروشمه‌كانی ده‌سه‌ڵاتی سیاسی لێپرسراوانی ئه‌م هه‌رێمه‌ سه‌باره‌ت به‌ پرسی چاكسازی ڕۆژی ئێمه‌یان گه‌یانده‌ ئه‌م ڕۆژه‌...هه‌ربۆیه‌ ده‌پرسین ئایا سه‌روه‌ری یاسا بنه‌مایه‌ك نیه‌ بۆ ئه‌نجامدانی چاكسازی.

ئیتر ئه‌شێت تێڕوانینمان چۆن بێت له‌ ئاست گرنگی دانی كاربه‌ده‌ستانی هه‌رێمی كوردستان سه‌باره‌ت به‌ به‌ستنی ئه‌م كۆنگره‌یه‌ سه‌باره‌ت به‌ ته‌سه‌وف و رێبازی نه‌قشبه‌ندی له‌ كاتێكدا پاش تێپه‌ربوونی یه‌ك ساڵ به‌سه‌ر په‌لاماری ئه‌و كۆمه‌ڵه‌ چه‌كداره‌ بۆ سه‌ر خانه‌قای نه‌قشبه‌ندی له‌ سلێمانی، بنه‌ماڵه‌ی شێخانی نه‌قشبه‌ندی هه‌ورامان و سه‌دان و هه‌زاران له‌ په‌یڕه‌وان و شوێنكه‌وتوانی ئه‌م ڕێبازه‌ هیچ جۆره‌ وه‌ڵامێكیان له‌ لایه‌ن ده‌سه‌ڵاته‌وه‌ پێ نه‌گه‌یشتبێت.

پرسیاره‌كه‌ش لێره‌دا ئه‌وه‌یه‌ ئاخۆ كامیان خزمه‌تی ڕاسته‌قینه‌ به‌ ئاینی ئیسلامی پیرۆز و ته‌سه‌وف و ڕێبازی نه‌قشبه‌ندی و په‌یڕه‌وانی له‌ كوردستاندا ده‌گه‌یه‌نێت، به‌ستنی كۆنگره‌یه‌ك بانگهێشت كردنی سه‌دان كه‌س كه‌ ئه‌مه‌ش خۆی له‌خۆیدا ته‌رخان كردنی بودجه‌ وخه‌رجیه‌كی زه‌به‌لاحی پێویسته‌ كه‌ ئاشكرانیه‌ كه‌ سه‌رچاوه‌كه‌ی له‌ كوێوه‌یه‌، یاخود كاركردن بۆ سه‌روه‌ری یاسا و ده‌ستگیركردنی تاوانبارانی كه‌یسی هێرشكردنه‌ سه‌ر خانه‌قای نه‌قشبه‌ندی له‌ سلێمانی و دادگایی كردنیان؟!! تا ئه‌و كاته‌ش كه‌ ئه‌م كاره‌ ئه‌نجام ده‌درێت و پاش ئه‌وه‌ی له‌ سه‌ره‌تای نووسینی ئه‌م بابه‌ته‌شدا و پاش په‌یوه‌ندی كردن و ڕاگۆڕینه‌وه‌ له‌گه‌ڵ كۆمه‌ڵێك مامۆستای به‌ڕێز و په‌یڕه‌وانی ڕێبازی نه‌قشبه‌ندی سه‌رجه‌م بۆچوونه‌كان له‌وه‌دا خۆیان ده‌بیننه‌وه‌ كه‌ باشترین و گونجاوترین وه‌ڵام بۆ پرۆتستۆكردن و ناڕه‌زایی ده‌ربڕین و بایكۆت كردنی ئه‌م كۆنگره‌یه‌یه‌ و به‌شداری نه‌كردنه‌ تیایدا، تاوه‌كو به‌یه‌ك ده‌نگ سكاڵا بێت بۆ سه‌رۆكایه‌تی هه‌رێم و سه‌رۆكایه‌تی ئه‌نجومه‌نی وه‌زیران وگشت ده‌زگا فه‌رمیه‌ په‌یوه‌ندی داره‌كان له‌ پێناو ئاشكرا كردنی چاره‌نووسی لێكۆڵینه‌وه‌كانی تایبه‌ت به‌ كه‌یسی هێرش كردن بۆ سه‌رخانه‌قای نه‌قشبه‌ندی له‌سلێمانی.

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

پاش بڵاوبوونه‌وه‌ی به‌شێك له‌ یاداشته‌كانی (علی باپیر) ئه‌میری كۆمه‌ڵی ئیسلامی له‌ دواژماره‌ی (گۆڤاری لیڤین) دا كه‌ تیایدا ڕه‌خنه‌ی ناحه‌ق و ناڕه‌وا له‌ ته‌ریقه‌ت و ته‌سوف ده‌گرێت و به‌ له‌ڕێ لادان ناوی ده‌هێنێت و هێرشێكی ناڕاست ونابه‌جێ ده‌كاته‌ سه‌ر یه‌كێك له‌ ناودارترین سیمبوڵه‌كانی ته‌ریقه‌تی نه‌قشبه‌ندی له‌ كوردستان و جیهان دا كه‌ (شێخ عوسمان سراج الدین نه‌قشبه‌ندی) یه‌ كه‌ به‌ده‌ر له‌ كۆمه‌ڵێك بێرێزی و بوختان و درۆ هیچی دیكه‌ی تێدا به‌دی ناكرێت. . . له‌هه‌مان كاتدا وشه‌ به‌ وشه‌ی یاداشته‌كه‌ی ناوبراو ڕق وكینه‌ و ئیره‌یی لێ ده‌تكێت، ئیره‌یی له‌ مێژوویه‌كی پرشنگداری ته‌ریقه‌تی نه‌قشبه‌ندی له‌ كوردستان به‌ تایبه‌ت و له‌جیهانی ئیسلامی به‌گشتی به‌ر له‌ بڵاوبوونه‌وه‌ی ژه‌هری ئیسلامی سیاسی له‌ناو كۆمه‌ڵگه‌ی ئیسلامیدا. . ئیره‌یی و ڕق وكینه‌ به‌رامبه‌ر به‌ دوو سه‌ده‌ خزمه‌تی شێخانی ته‌ریقه‌تی نه‌قشبه‌ندی له‌ هه‌ورامان به‌ زانست و عیرفان و خودا په‌رستی، دوو سه‌ده‌ شانازی كردن به‌ خزمه‌تكاریی زانایان و هه‌ژاران (وه‌ك ئاشكرایه‌ شیخانی نه‌قشبه‌ندی یه‌ك له‌ دوای یه‌ك نازناوی خادم العلما و والفقرا و یان هه‌ڵگرتووه‌) . . . به‌ به‌راورد كردنی به‌ مێژوویه‌ك پڕ خوێن و خیانه‌ت. . كورد كوژی و عه‌ماله‌ت. . دونیا ویستی و هه‌وڵدان بۆ كورسی و پێگه‌ و ده‌سه‌ڵات له‌ ژێر په‌رده‌ی ئاینی ئیسلامی پیرۆزدا، به‌ڵام خۆشبه‌ختانه‌ له‌ یه‌كه‌م ساته‌ وه‌ختی بڵاوبه‌نه‌وه‌ی گۆڤاره‌كه‌و درۆ شاخداره‌كانی علی باپیردا، ده‌یان و سه‌دان زانای ئاینی به‌ڕێز و شوێنكه‌وتوان و موریدانی ته‌ریقه‌تی نه‌قشبه‌ندی وه‌ڵامی چه‌واشه‌كارییه‌كه‌ی علی باپیریان دایه‌وه‌. . چ له‌ ڕێگه‌ی مینبه‌ری مزگه‌وته‌كانه‌وه‌ یاخود له‌ ڕێگه‌ی ووتارو نوسین سه‌باره‌ت به‌ ته‌ریقه‌تی نه‌قشبه‌ندی و رۆڵی خودی شێخ عوسمان سراج الدین و باوك و باپیرانی له‌ خزمه‌تكردنی گه‌لی كوردی موسوڵمان له‌ڕێگه‌ی مه‌دره‌سه‌ی دینی و خانه‌قاكانیانه‌وه‌ له‌ سه‌رانسه‌ری دونیادا كه‌ له‌ ده‌زگاكانی ڕاگه‌یاندندا بڵاوكرایه‌وه‌. . جگه‌ له‌ جموجوڵێكی به‌رچاو به‌هه‌مان ئاراسته‌ له‌ تۆڕی كۆمه‌ڵایه‌تی فه‌یس بووك كه‌ له‌ لایه‌ن شوێنكه‌وتوان و په‌یڕه‌وانی ته‌ریقه‌ت و كه‌سانی نزیك له‌و رێبازه‌وه‌ ئه‌نجامدرا، له‌ گه‌لێك له‌م نووسینانه‌شدا ئه‌و خاڵه‌ ڕه‌ش و ساته‌ قێزه‌ونانه‌یان هێنایه‌وه‌ بیری مه‌لا باپیر كه‌ ده‌ساڵه‌ ده‌یه‌وێت له‌بیری كات. . . ئه‌ویش مه‌له‌فی په‌یوه‌ندیه‌كانی بوو له‌گه‌ڵ ڕژێمی به‌عسی ڕووخاودا، جگه‌ له‌ په‌یوه‌ندی ژێر به‌ ژێر و گوماناوی علی باپیر له‌گه‌ڵ گروپه‌ پیرۆریسته‌كه‌ی ئه‌نسارالاسلام به‌ڵگه‌ش یۆ ئه‌م بۆچوونه‌ دۆزینه‌وه‌ی ته‌رمی حه‌زره‌تی شێخ حسام الدینی نه‌قشبه‌ندی بوو له‌خورماڵ كه‌ له‌و سه‌رده‌مه‌دا له‌ ژێر كۆنتڕۆڵی علی باپیرو كۆمه‌ڵه‌كه‌یدا بوو پاش ئه‌وه‌ی گروپی ئه‌نسار له‌ ساڵی 2002دا له‌ گوندی باخه‌كۆن له‌ كارێكی دڕندانه‌و نامرۆڤانه‌دا ته‌رمه‌كه‌یان له‌شوێنی خۆی لابردوو له‌ تاریكی شه‌ودا گواستبوویانه‌وه‌ بۆ باخچه‌ی ماڵێكی ئه‌ندامێكی ئه‌م گرووپه‌ له‌ خورماڵ، به‌ڵام حقد وكینه‌ وئیره‌یی سه‌ری له‌ علی باپیر تێكداو كۆنترۆلی نه‌فسی ئه‌مماره‌ی پێنه‌كرا زمانی خۆی نه‌پاراست عه‌ره‌بیش ده‌ڵێت (لسانك حصانك إن صنته صانك وإن خنته خانك ) سه‌یریش له‌وه‌دایه‌ علی باپیر باسی ناشه‌رعی ده‌كات له‌ مه‌جلیسی شێخ عوسمان سراج الدین نه‌قشبه‌ندی دا؟!!.

 هه‌ڵوێستی زانایانی ئاینیی به‌ڕێزو شوێنكه‌وتوانی ته‌ریقه‌تی نه‌قشبه‌ندی له‌ سۆنگه‌ی وه‌فاداری و خۆشه‌ویستی و پابه‌ندبوونیان به‌رامبه‌ر به‌ ئاینی ئیسلامی پیرۆز و ته‌ریقه‌تی نه‌قشبه‌ندی و خۆشه‌ویستیان بۆ كه‌سایه‌تی (شێخ عوسمان سراج الدین نه‌قشبه‌ندی) ویستیان وه‌ك كاركردن به‌ حه‌دیسێك (إنما الدین النصیحه‌) به‌ یه‌ك ده‌نگ ویستیان ئه‌و حەدیسە‌ بیری علی باپیر بهێننه‌وه‌ كه‌ ده‌فه‌رموێت (من كان يؤمن بالله واليوم الآخر فليقل خيراً أو ليصمت ) به‌ڵام علی باپیر نه‌ (خێر) هاته‌ سه‌ر زاری و نه‌ بێده‌نگیش بوو. ئه‌و علی باپیره‌ی سه‌ره‌ڕای ئه‌و گشت تاوانه‌ی گروپی تیرۆریستی به‌ناو (انصار الاسلام) له‌ هه‌ڵه‌بجه‌و هه‌ورامان ئه‌نجامیاندا ته‌نها له‌ ڕاگه‌یاندنه‌كاندا دوو كه‌س كه‌ سه‌ركرده‌ی دوو حزبی ئیسلامیبوون بیسترا ئه‌م گروپه‌ تاوانباره‌ به‌ (برایانی انێارالاسلام) ناوبه‌رن. . . یه‌كێكیان علی باپیر بوو. . . ئێستا جه‌نابی نانی شوان ده‌خوات. . ئیستا ڕه‌خنه‌ له‌ ته‌سه‌وف ده‌گرێت؟!!.

به‌ڵام له‌نێوان تاڵاوی بڵاوكردنه‌وه‌ی چه‌واشه‌كاریه‌كه‌ی علی باپیر و شانازی كردنمان وه‌ك بنه‌ماڵه‌ی شێخانی نه‌قشبه‌ندی هه‌ورامان به‌ هه‌ڵوێستی زانایانی ئاینیی به‌رێز و موریدان و شوێنكه‌وتوانی ته‌ریقه‌تی نه‌قشی له‌ ڕۆژانی ڕابردوودا، حاڵه‌تێكی نه‌خوازراو ڕوویدا كه‌ ئێمه‌ چه‌ندین جار ئاماژه‌مان پێ كردوه‌ و چوارده‌وری خۆمان لێ ئاگادار كردۆته‌وه‌ ئه‌ویش ئه‌وه‌یه‌ كه‌ هه‌رچه‌نده‌ ئه‌م بنه‌ماڵه‌یه‌ له‌هه‌ورامان و له‌ كوردستاندا وپاش دوو سه‌ده‌ له‌خزمه‌ت به‌ ئاین ونیشتیمان و چه‌ندین شێخی ته‌ریقه‌تی ناودارو خاوه‌ن كه‌سایه‌تی نه‌ك له‌سه‌ر ئاستی كوردستان به‌ڵكو له‌سه‌ر ئاستی سه‌رتاسه‌ری جیهانی ئیسلامی و ملیۆنان مورید و مه‌نسوب وسۆفی و په‌روه‌رده‌كردنی ده‌یان و سه‌دان زانا و شاعیر مرۆڤی هه‌ڵكه‌وتوو وه‌ك (مه‌وله‌وی وچروستانی و شاهۆ و شاكه‌لی و مامۆستا مه‌لاكه‌ریمی موده‌ریس و مامۆستا مه‌لا محمد ئه‌مینی كانی سانان) به‌ڵام چه‌می خانه‌واده‌ی نه‌قشبه‌ندیش بێ چه‌قه‌ڵ نابێت كه‌ ئه‌مه‌ش تاڵاوێكه‌ بۆ جارێكی دیكه‌ له‌ سه‌روبه‌ندی بڵاوبوونه‌وه‌ی یاداشته‌كانی علی باپیر دا دیسانه‌وه‌ دوو باره‌بوه‌وه‌ ئه‌ویش كه‌ڵك وه‌رگرتنی هه‌ندێك كه‌سی ناو ئه‌م بنه‌ماڵه‌یه‌ له‌ كێشه‌ وگرفته‌كان له‌ پێناو خۆده‌رخستن و خۆبردنه‌ پێش و سازدانی دیداری ته‌له‌فزیونی و ئه‌نجامدانی چاوپێكه‌وتن له‌گه‌ڵ ده‌زگاكانی ڕاگه‌یاندن له‌ پێناو به‌ده‌ست هێنانی به‌رژه‌وه‌ندی تایبه‌تی و خۆناساندنی بێ بنچینه‌وه‌ بێ به‌ڵگه‌ هه‌ر ڕۆژێك به‌ سیفه‌تێك. . . ڕۆژێك به‌ خه‌بیر و شاره‌زا له‌ فلان بوار و ڕۆژێكی دیكه‌ به‌ سه‌رپه‌رشتیاری فڵان خانه‌قا و جارێكی دیكه‌ به‌ سیفه‌تی نوێنه‌ری فڵان كه‌سایه‌تی. . . كه‌ گشت ئه‌مانه‌ دوورن له‌ ڕاستی و هیچ كه‌سێك له‌ ناو بنه‌ماڵه‌ و ته‌ریقه‌تی نه‌قشی دا ئه‌م لێپرسراوێتیه‌و ئه‌م پێگه‌یه‌ی پێنه‌داون كه‌ ئه‌م جۆره‌ كه‌سه‌ هه‌لپه‌رستانه‌ به‌ناویانه‌وه‌ قسه‌ بكه‌ن و نوێنه‌ریان بن. . . ئێمه‌ش بۆ چه‌ندین جار و له‌ گه‌لێك له‌ كۆر و كۆبونه‌وه‌مان له‌گه‌ڵ ماۆستایانی ئاینی و موریدانی ته‌ریقه‌تی نه‌قشبه‌ندیدا په‌رده‌مان ڕاماڵیوه‌ له‌ ڕووی ئه‌م كه‌سانه‌و ئامانجی ڕاسته‌قینه‌ی ئه‌م كه‌سانه‌مان نیشانی خه‌ڵك داوه‌، به‌ڵام گرفتی ئێمه‌ ئه‌وه‌یه‌ هه‌ندێك جار دوژمن له‌ناو خۆماندایه‌ و نزیكترین كه‌سمانه‌ و ئاماده‌یه‌ له‌ پێناو به‌ده‌ست هێنانی مووچه‌و پێگه‌یه‌كی بێ به‌ها مێژوویی دووسه‌ده‌ی خانه‌واده‌كه‌ی هه‌رزان فرۆش بكات وه‌ك شاعیری ناوداری عه‌ره‌ب ده‌ڵێت:

(وظلم ذوي القربى أشد مضاضة ....على المرء من وقع الحسام المهند ).

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

بۆچوونێكی تازه‌ نیه‌ ئه‌گه‌ر بڵێین خه‌ڵكی كوردستان به‌ بیستنی ووشه‌ی به‌عس تووشی حاڵه‌تێكی ناڕه‌حه‌تی ده‌بن، داهێنانێكی نۆی به‌دی ناهێنین ئه‌گه‌ر كه‌ سه‌رده‌می چڵ ساڵی حوكمڕانیی ڕژێمی به‌عسی ڕووخاو چه‌ندین تراژیدیاو تاوانمان وه‌بیر دێنێته‌وه‌ كه‌ به‌رامبه‌ر گه‌لی كورد ئه‌نجامیان داوه‌ له‌ ته‌عریب وته‌بعیس و ئه‌نفال و كیمیا باران ئاواره‌ بوون و ده‌ربه‌ده‌ری. . . به‌ڵام له‌ بری سارێژ كردنی گشت ئه‌م برینانه‌ له‌سایه‌ی حوكمڕانیی خودی كورد دا وبه‌ درێژایی زیاد له‌ بیست ساڵ ڕۆژانه‌ قه‌تماغه‌ی برینه‌كانمان هه‌ڵده‌درێته‌وه‌. . . ڕۆژانه‌ ئازاری ڕۆحمان ده‌درێت. . . مردوه‌كانمان پێش زیندوه‌كان، به‌بێ گوێدان به‌ هیچ ڕێساو یاسایه‌ك و به‌بێ بیركردنه‌وه‌ له‌ ئاسه‌واره‌كانی له‌سه‌ر خه‌ڵكی كوردستان به‌ گشتی و خه‌ڵكی هه‌ڵه‌بجه‌ به‌تایبه‌تی فڕۆكه‌وانی تۆمه‌تبار به‌ كیمیا باران كردنی هه‌ڵه‌بجه‌ی سومبولی كوردان ئازاد ده‌كرێت و ده‌گه‌یه‌نرێته‌ ده‌ره‌وه‌. . . له‌عێراقدا پاش 10 ساڵ له‌ ڕووخانی ڕژێمی به‌عس تاوه‌كو ئیستا به‌چاوی گومانه‌وه‌ ته‌ماشای كورد ده‌كرێت به‌ڵام ده‌سه‌ڵاتدارانی كورد شاره‌كانمان (عه‌ره‌ب باران) ده‌كه‌ن، سه‌رۆكه‌كانمان له‌ پێناو ئافه‌رینێك دا ڕاوێژكاری عه‌ره‌ب به‌كۆڵێك مووچه‌و ئیمتیازاته‌وه‌ داده‌مه‌زرێنن. . . مووچه‌ی چه‌ندین هه‌زار دۆلار بۆ خانه‌واده‌ی سه‌ركرده‌یه‌كی شۆڤێنی وه‌ك (عبدالرحمن عارف) ته‌رخان ده‌كه‌ن، له‌ كۆلێژی سه‌ربازی كوردستاندا ئه‌فسه‌ری كۆنه‌ به‌عسی چه‌پ ڕاست به‌ ڕۆڵه‌كانمان ده‌كه‌ن، ڤیللا و جۆره‌ها جێگه‌ی حه‌وانه‌وه‌ ته‌رخان ده‌كرێت بۆ (مشعان جبوری محمود المشهدانی وتاریق الهاشمی و حازم الشعلان) و ده‌یان ده‌سه‌ڵاتداری عه‌ره‌ب كه‌ هه‌ندێكیان ته‌نانه‌ت ئاماده‌ نین ده‌سته‌واژه‌ی (شمال العراق) بگۆرن بۆ (اقلیم كوردستان) . . . زه‌وی كوردستان دابه‌ش ده‌كرێت به‌سه‌ر ده‌یان ئه‌فسه‌ری پایه‌داری كۆنه‌ به‌عسی عه‌ره‌ب دا. . . چه‌ند مانگێك له‌مه‌وبه‌ر چونه‌ سه‌نگه‌ره‌وه‌ دژ به‌ (هێزه‌كانی دیجله‌) و عبدالامیر الزیدی به‌ دڕنده‌. . كۆنه‌ به‌عسی وئه‌نفالچی بۆ وه‌سف كرین، به‌ڵام له‌ به‌رامبه‌ردا ماوه‌یه‌كه‌ له‌ چه‌ندین ناوه‌ندی ڕاگه‌یاندن دا ده‌نگۆی ئه‌وه‌ هه‌یه‌ بۆ به‌ده‌ست هێنانی ده‌ستكه‌وتێكی سیاسی له‌ نوری المالكی كه‌ نه‌زانراوه‌ چیه‌. . . به‌ بیانووی كوشتاری حه‌ویجه‌وه‌ و دروست بوونی مه‌ترسی له‌سه‌ر خۆی وخێزانی، له‌ پایته‌ختی هه‌رێمی كوردستان نیشته‌جێ كراون.

له‌ گشت ئه‌مانه‌ش سه‌یرتر ڕه‌فتارێكی سه‌رسوڕهێنه‌ری دیكه‌ی سه‌ركردایه‌تی سیاسی كورده‌ كه‌ به‌هیچ جۆرێك له‌گه‌ڵ گفتاریان یه‌ك ناگرێته‌وه‌ ئه‌ویش خانه‌نشین كردنی كۆنه‌ به‌عسیه‌كی دڵسۆزی رژێمی به‌عسه‌ به‌ ناوی (عبدالجبار الكبیسی) به‌ بڕی 2 ملیۆن دینار له‌ لایه‌ن سه‌رۆكی حكومه‌ته‌وه‌ له‌كاتێكدا فه‌رمانبه‌رێك له‌ پاداشتی 25 ساڵ خزمه‌ت و 25 ساڵ لێبرینی مانگانه‌ی به‌شێك له‌ مووچه‌كه‌ی بۆ سندوقی خانه‌نشین كردن مانگانه‌ ته‌نها 300 هه‌زار دینا وه‌رده‌گرێت، خاڵی سه‌رنج ڕاكێش له‌م كرده‌وه‌یه‌شدا ئه‌وه‌یه‌ كه‌ به‌ڕێز (عدنان موفتی) ئه‌ندامی مه‌كته‌بی سیاسی یه‌كێتی نیشتمانی كوردستان دێته‌ سه‌ر خه‌ت و ده‌ڵێت له‌سه‌ر خواستی ئێمه‌ حكومه‌ت ئه‌م كاره‌ی كردوه‌، به‌جۆرێك كه‌ له‌ په‌یوه‌ندیه‌كیدا له‌گه‌ڵ ڕۆژنامه‌ی ئاوێنه‌ كه‌ له‌ ڕۆژی سێ شه‌ممه‌2/7/2013 بڵاوكراوه‌ته‌وه‌ به‌ جۆرێك باسی (كوبه‌یسی) ده‌كات كه‌ هه‌موو ژیانی ته‌رخان كردبێت بۆ به‌گژاچوونه‌وه‌ی ڕژێمی دیكتاتۆری پێشووی به‌غدا، به‌ڵام به‌ هیچ جۆرێك باس له‌ هه‌ندێك وورده‌كاری دیكه‌ ناكات له‌ باره‌ی هه‌ڵوێستی ناوبراوه‌وه‌ به‌تایبه‌ت گه‌رانه‌وه‌ی كوبه‌یسی بۆ عێراق له‌ كۆتایی ساڵی 2012 دا ودووباره‌ په‌یوه‌ندی كردنی به‌ ڕژێمی به‌عسه‌وه‌ و ئه‌نجام دانی چه‌ندین چاوپێكه‌وتن له‌گه‌ڵ كه‌ناڵه‌كانی ڕاگه‌یاندن وه‌ك (الجزیره‌ والعربیه‌) وهێرش كردنه‌ سه‌ر لایه‌نه‌كانی ئۆپۆزسیون به‌ كورد وشیعه‌وه‌ و ناوبردنیان به‌ خائین و خۆفرۆش و خزمه‌تكاری ئه‌مه‌ریكا و جوله‌كه‌و. . . وبانگه‌شه‌ كردن بۆ به‌گژاچونه‌وه‌ی ئه‌و هێزانه‌ی كه‌ دژی رژێمی به‌عس و گه‌لی عێراق شانبه‌شانی ئه‌مه‌ریكا وهاوپه‌یمانانی ده‌جه‌نگن؟!!ئه‌م هه‌ڵوێسته‌شیان به‌ڕوون وئاشكرا به‌دی ده‌كرێت له‌ دیدارێكدا كه‌ كوبه‌یسی له‌گه‌ڵ سایتێك ئه‌نجامی داوه‌ به‌ناوی (الێوت العربی الحر) له‌ به‌غدا له‌ ڕێكه‌وتی 13/12/2002 واتا ته‌نها پیش 3 مانگ له‌ هیرشی ئه‌مه‌ریكا وهاوپه‌یمانه‌كانی بۆسه‌ر عێراق و ڕووخاندنی ئه‌و ڕژێمه‌. جێگه‌ی داخه‌ به‌ڕێزێك وه‌ك عدنان موفتی باسی نیشتمانپه‌روه‌ری و ئه‌مه‌كداری وجوامێری جوامێری كه‌سێكی وه‌ك كوبه‌یسی ده‌كات. . . گریمان وه‌ك موفتی ئاماژه‌ی پێده‌كات له‌ ساڵی 1979 دا كوبه‌یسی ڕۆلی بینیوه‌ له‌ ئازاد كردنی به‌رێزیان بۆ گه‌رانه‌وه‌ له‌ سوریاوه‌ بۆ كوردستان، به‌ڵام وه‌ك مافێكی سروشتی هه‌موو تاكێكی كورد بۆمان هه‌یه‌ پرسیارێك بخه‌ینه‌ ڕوو. . ئایا پیشكه‌ش كردنی ئه‌و ئاسانكاریه‌ به‌رامبه‌ر به‌ ئێوه‌ مافی ئه‌وه‌تان ده‌داتێ له‌ پاره‌ی ئه‌م میلله‌ته‌ مانگانه‌ 2 ملیۆن دینار بۆ خانه‌واده‌كه‌ی ته‌رخان بكه‌ن؟!. ئایا زنجیره‌ی گاڵته‌جاریه‌كانی حوكمرانیی كوردی به‌ خانه‌ نشین كردنی كوبه‌یسی كۆتایی دێت؟ ئایا به‌م كارانه‌ گومان له‌ ناخی تاكی كورد دا دروست ناكه‌ن به‌رامبه‌ر هه‌ركه‌سێك كه‌ له‌ دواڕۆژدا به‌ دۆستی كورد بیناسێنن؟ئه‌مڕۆ زه‌یدی ئه‌نفالچی و خانه‌واده‌كه‌ی ده‌هێننه‌ كوردستان و كوبه‌یسی كۆنه‌ به‌عسی ده‌كه‌نه‌ دۆستی كورد وخانه‌نشینی ده‌كه‌ن. . . سبه‌ینێ پێده‌چێت پێشنیار بكه‌ن كه‌ له‌ پاركی ئازادی دا په‌یكه‌رێك دروست بكرێت بۆ (زه‌عیم سدیق) كه‌ له‌ سه‌ره‌تای شه‌سته‌كاندا قه‌تلوعامی ئه‌م شاره‌ی كرد دواتریش دوور نیه‌ داوامان لێبكه‌ن شه‌قامێك له‌ هه‌ڵه‌بجه‌ی شه‌هید به‌ ناوی (علی حسن مجید) ه‌وه‌ ناو بنێین.

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

هه‌فته‌ نامه‌ی شارێكی بێ حاكم     ...ئامانج ناجی نه‌قشبه‌ندی  

رۆژی شه‌ممه‌:-

له‌ وتارێكیدا كه‌ له‌ گه‌لێك له‌ ڕۆژنامه‌كانی شاردا بڵاوكرایه‌وه‌، سیاسه‌تمه‌دارێكی ناسراوی شار كه‌ له‌ هه‌مان كاتدا یه‌كێكه‌ له‌ سه‌ركرده‌ دیاره‌كانی حزبی ده‌سه‌ڵات..ئه‌م به‌ڕێزه‌ زۆر به‌توندی ڕه‌خنه‌ی ئاراسته‌ی ئه‌دای حكومه‌ت كرد و تۆمه‌تباری كردن به‌ تێوه‌گلان له‌گه‌نده‌ڵی، جگه‌ له‌مه‌ش هێرشێكی توندی كرده‌ سه‌ر ملیۆنه‌ر و ملیاردێره‌كانی شار، ئه‌م براده‌ره‌ بیرچووه‌ كه‌ خۆی ئه‌و كه‌سانه‌ی داناوه‌ كه‌ پێیان ده‌ڵێ گه‌نده‌ڵ و پاره‌خۆر..ملیۆنه‌رو ملیارده‌ره‌كانی شاریش كه‌ جه‌نابیان هێرشی كرده‌ سه‌ریان، زۆربه‌ی زۆری سه‌روه‌ت وسامانیان موڵكی ئه‌م به‌ڕێزه‌و هه‌ڤاڵه‌كانی حزبن واتا له‌ لێپرسراوێتی كه‌مته‌رخه‌می وگه‌نده‌ڵی و ئاست نزمی ئه‌دای حكومه‌تدا پشكی شێری به‌رده‌كه‌وێت.

رۆژی 1 شه‌ممه‌:-
شوێن: هۆڵی دادگا   

پارێزه‌ر له‌ كاتی به‌رگری كردن له‌ تاوانبارێك ڕوو ده‌كاته‌ جه‌نابی دادوه‌ر و له‌ به‌شێكی مورافه‌عه‌ دوور ودرێژه‌كه‌یدا ده‌ڵێت:-  
جه‌نابی حاكم ئه‌م تاوانباره‌ی من به‌رگری لێده‌كه‌م شایه‌نی ئه‌وه‌یه‌ سوپاس وپێزانینی ئاراسته‌ بكرێت، نه‌ك راِپێچی دادگا بكرێت به‌تۆمه‌تی (دزینی ئه‌سپێك) ..به‌ڵگه‌شمان بۆ ئه‌مه‌ ئه‌وه‌یه‌ كه‌ خاوه‌نی ئه‌سپه‌كه‌ خزمه‌تی نه‌كردوه‌ و ئالیكی نه‌داوه‌تێ و ئازاری جه‌سته‌یی داوه‌، به‌ڵام موه‌كیله‌كه‌ی من خزمه‌تی كردوه‌ و نازی داوه‌تێ و ئالیكی بۆ كڕیوه‌ و بردویه‌تی بۆ عیاده‌ی دكتۆری ڤێتێرنه‌ری هتد....لێره‌دا جه‌نابی دادوه‌ر مورافه‌عه‌كه‌ی پێ ده‌بڕێت و به‌ پارێزه‌ر ده‌ڵێت..ئه‌گه‌ر قسه‌كانت ته‌واو بووه‌ منیش تێبینیه‌كم هه‌یه‌، پارێزه‌ریش ده‌ڵێت فه‌رموو  ..  .

به‌ڕێز دادوه‌ر ڕوو ده‌كاته‌ پارێزه‌ر و ده‌ڵێت..پێده‌چێت جه‌نابت ئاگاتان له‌ وورده‌كاریه‌كانی ئه‌م كێشه‌یه‌ نه‌بێت، چونكه‌ ئه‌و ئه‌سپه‌ دزراوه‌ی ئه‌م تاوانباره‌ی له‌سه‌ر دادگایی ده‌كرێت..ئه‌سپی زیندوو نیه‌ به‌ڵكو ئه‌سپی زینه‌یه‌ (تحفیات) و ناوبراو له‌ناو ماڵی خه‌ڵكدا دزیویه‌تی.....سه‌یر له‌وه‌دایه‌ پاش ماوه‌یه‌ك له‌م مورافه‌عه‌ مێژوویی یه‌ پارێزه‌ری گومناو پله‌ی به‌رز كرایه‌وه‌ و بوو به‌جه‌نابی حاكم.

رۆژی 2 شه‌ممه‌:-

شوێن:-هۆڵی وانه‌ ووتنه‌وه‌ له‌ زانكۆ   

مامۆستای پسپۆڕ؟!!داوا له‌ خوێندكاره‌كان ده‌كات توێژینه‌وه‌ و لێكۆڵینه‌وه‌ ئه‌نجام بده‌ن سه‌باره‌ت به‌ قه‌یرانێكی ئابووری كه‌ شاری پیایدا تێده‌په‌رێت بۆ ئه‌م مه‌به‌سته‌ش كتێبێكیان بۆ دیاری ده‌كات كه‌ وه‌ك سه‌رچاوه‌ سوودی لێ وه‌ربگرن، به‌ڵام ئه‌وه‌ جێی سه‌رنج وتێڕامانه‌ ئه‌و سه‌رچاوه‌یه‌ باسی قه‌یرانێك ده‌كات كه‌ به‌سه‌ر ووڵاتێكدا هاتووه‌ (60) ساڵ له‌مه‌وپێش سه‌یرتریش له‌وه‌دایه‌ كه‌ (6000) كیلۆمه‌تر له‌م شاره‌وه‌ دووره‌...ئافه‌رین زانكۆ بۆ خۆت زانست و مامۆستا و بڕوانامه‌ت.

رۆژی 3 شه‌ممه‌:-

نووسراوێكی فه‌رمیم به‌رچاو كه‌وت كه‌ به‌ڕێوه‌به‌رێك ئاراسته‌ی به‌ڕێوه‌به‌رایه‌تیه‌كی گشتی په‌یوه‌ندیداری كردوه‌ و تیایدا نووسیوه‌ كه‌ پاش ئه‌وه‌ی جه‌نابی شێخ له‌سه‌ر شه‌قامی چوارده‌وری شار چه‌ند ساڵێك له‌مه‌وبه‌ر سۆپه‌رماركێتی (خێرخوازی) دانا و هاوڵاتیانی شار سوودێكی گه‌وره‌یان لێ بینی؟!! به‌ڕێوه‌به‌ری ناوبراو له‌ درێژه‌ی نووسراوه‌ فه‌رمیه‌كه‌یدا پێشنیاز ده‌كات بۆ ئه‌م به‌ڕێوه‌به‌رایه‌تییه‌ گشتییه‌ په‌یوه‌ندیداره‌ كه‌ زه‌ویه‌كی دیكه‌یان بۆ ته‌رخان بكرێت تاوه‌كو پڕۆژه‌یه‌كی دیكه‌ی سۆپه‌رماركێتی خێرخوازی تیادا ئه‌نجام بده‌ن، هه‌ر له‌هه‌مان نوسراویشدا ژماره‌ی 2 زه‌وی بۆ جه‌نابی شێخ ده‌ستنیشان كرابوو كه‌ له‌به‌رده‌ستدایه‌ ده‌توانرێت ته‌رخان بكرێت بۆ مامه‌ شێخ.

رۆژی 4 شه‌ممه‌:-

به‌ڕێوه‌به‌ری دامه‌زراوه‌یه‌كی حكومیی كه‌ تاوه‌كو چه‌ند ساڵێك له‌مه‌وبه‌ر به‌ ڕێكه‌وتیش له‌ چه‌مچه‌ماڵ به‌ره‌و خواری نه‌دیبوو، له‌سایه‌ی سه‌ری لێپرسراوانی حزبی ئه‌م شاره‌ بێ حاكمه‌وه‌ كار گه‌شتۆته‌ ئه‌وه‌ی زۆربه‌ی زۆری كاته‌كانی له‌ فرۆكه‌خانه‌و له‌ناو فرۆكه‌دا به‌سه‌ر ده‌بات، به‌ ئاشكرا له‌ناو فه‌رمانگه‌كه‌یدا ده‌ڵێت (تاخۆم وه‌ستابم كه‌س لـــچ له‌ ئیفاد نادات گه‌ر بۆ عه‌ربه‌تیش بێت) ...هیوایه‌تی ئه‌م به‌ڕێزه‌ خواردنی فاست فووده‌.

رۆژی 5 شه‌ممه‌:-

له‌سه‌روبه‌ندی داواكاری ڕای گشتی و شه‌قامی شار بۆ هێنانه‌دی گۆڕانكاری له‌ ده‌ستووردا و ئه‌نجام دانی چاكسازی وپێداچوونه‌وه‌ به‌هه‌ندێك په‌یڕه‌وی ناوخۆی گه‌لێك له‌ دامه‌زراوه‌ حكومیه‌كاندا وله‌ درێژایی ناڕه‌زایی له‌ناو فه‌رمانگه‌ حكومیه‌كاندا سه‌باره‌ت به‌ زاڵ كردنی به‌رژه‌وه‌ندی تایبه‌تی لێپرسراوه‌ حكومیه‌كان به‌سه‌ر به‌رژه‌وه‌ندی گشتیدا، فه‌رمانبه‌رانی ده‌زگایه‌كی هه‌ستیاری شار داواكارن كه‌ناوی دامه‌زراوه‌كه‌یان بگۆرن له‌ ده‌زگای (و....انێكه‌وه‌) بۆ ده‌زگای (ئۆخه‌ی ئۆخه‌ی هه‌ركه‌س بۆ خۆی  )   .

رۆژی هه‌ینی:-

گشت لێپرسراوانی شار به‌حكومی وحزبیه‌وه‌ نیوه‌ڕۆ له‌ مزگه‌وت و پاش نیوه‌ڕۆش له‌ به‌رزاییه‌كانی شار كۆده‌بنه‌وه‌، به‌ده‌م خواردانی شیشه‌ گۆشت و خواردنی چینیه‌وه‌ پلانی تۆكمه‌ داده‌ڕێژن بۆ چۆنیه‌تی ئیداره‌ كردنی شاره‌ بێ حاكمه‌كه‌.

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.