دڵشاد تاقانه‌

ته‌واوه‌ک له‌سه‌ره‌وه‌ی نیوسه‌ده‌یه‌ ئه‌و تکانه‌ جگه‌ له‌چاوگی داهات و بوژاندنه‌وه‌ی بازاڕی کۆیه‌، بنکه‌ی هۆشیاری و پێگه‌ی وێژه‌ییه‌، پارێزه‌ری هه‌زاران نهێنی سیاسی و کۆڕی ڕاگۆڕکێ بووه‌ ده‌یان کادیری شۆڕشگێڕ و نیشتمانپه‌روه‌ر کۆبونه‌وه‌ی تێداکردوه‌ وه‌ک دکتۆر خالید، مامه‌ ڕووته‌، مه‌لاعه‌لی، سه‌ید برایم، خاره‌ شێخ جه‌نگی له‌گه‌ڵ سه‌دان پیاوی هه‌ڵکه‌وتووی شاره‌که‌ له‌ژمار نایه‌ن ! چه‌ند جارێک به‌رتاڵان و دزی حه‌ره‌س قه‌ومی و به‌عسیه‌ فاشیه‌کان که‌وتووه‌ له‌به‌ر هه‌ڵوێستی سیاسی و نیشتمانی ده‌ڕابه‌که‌ی‌ داخراوه‌ خاره‌ جه‌لالیش زیندانی و تاراوگه‌نشی شاری شامیه‌ی عێراقی عه‌ره‌بان کراوه . ‌

دوکانی شیعر و گۆرانی . .

وروژێنه‌ری سه‌دان کێش و سه‌روای شیعری و داهێنه‌ری به‌رهه‌می هونه‌ری ئاواز و گۆرانی یه‌، شیعرباری شاعیرانی کۆن و نوێ یه‌ چه‌ندان که‌س شیعره‌کانی خۆیان له‌وێ تاقی کردیته‌وه‌ پرسیان له‌خاره‌ جۆبار کردیه‌ . مه‌ڵبه‌ندی ده‌نگچڕی مه‌قامبێژی مه‌لا ئه‌سعه‌د و خاره‌ سێوه‌، حه‌مه‌ده‌مین عه‌باس و باقی حه‌لاق ، فه‌قێ ئه‌حمه‌ده‌ کۆره‌ و باکوری سترانبێژ بووه‌ . سروشی ئاوازی ژه‌نیاران زاهیر محه‌مه‌د و مه‌لا ئه‌نوه‌ر، وریا ئه‌حمه‌د و سه‌رداری باب سه‌رداری . چه‌ندان کامیڕا ورد وردی ڕه‌فه‌کانیان پشکنیوه‌ له‌دیداری ڕۆژنامه‌یی و ته‌له‌فزیۆنی جۆباری گه‌وره‌‌ شاعیردا ئاماده‌کاری به‌رنامه‌کانی ته‌له‌فزیۆنی که‌رکوکی کۆن و که‌ناڵه‌ کوردیه‌کانی ئێستا هه‌روا ڕێپۆرتاژنوسانی ڕۆژنامه‌کان پرس و لێکدانه‌وه‌کانی خۆیان له‌پاڵ ده‌ربڕیوه‌ . دوکانێک پڕ له‌ده‌فته‌ری قه‌رز و خۆشنوسی تێكه‌ڵه‌ی گڵوکه‌ شیعری سیاسی و کۆمه‌ڵایه‌تی، سروشت و دڵداری جۆباریات:

بابچینه‌ کوێستان بۆ گه‌شتی ئه‌م ناوه

جوانی جیهانی خوا به‌م شوێنه‌ی داوه

له‌چله‌ی هاوینا نه‌وبه‌هار ببینه‌

قه‌ندیل مه‌ندیلی هه‌رفڕێ نه‌داوه‌‌‌

هه‌واڵگه‌ی کوردایه‌تی . .

چاوگی هه‌واڵی شه‌وانه‌ی ڕادیۆکانی مۆنتیکارلۆ و ده‌نگی ئیسڕائیل و ئێسگه‌ی له‌نده‌ن، ڕۆژانه‌ دوکاندارنی گوزه‌ره‌که‌ له‌به‌ر نه‌زانینی عه‌ره‌بی ڕوویان تێکردووه‌ بۆ زانینی هه‌واڵه‌کانی دنیا و تایبه‌ت به‌کورد له‌کۆتایی سه‌ده‌ی بیسته‌م . چه‌نده‌ها نامه‌ی کوڕه‌ پێشمه‌رگه‌ی نێردراوی شاخ بۆ باوکیان تێدا خوێندرایته‌وه‌ له‌به‌ر نه‌خوێنده‌واری بابه‌ پێشمه‌رگه‌کان و بوونی متمانه‌ی ته‌واو به‌خاره‌ جه‌لال جۆبار . هه‌ڵکه‌وته‌ی دوکانه‌که‌ له‌سه‌ر سێ ڕیانی چه‌قی بازاڕه‌ شوێنێکی سه‌رگۆشه‌ی بینینی هاموشۆکارانی بازاڕ له‌کڕیار و گه‌شتیار له‌نزیک ده‌رگای ناوه‌وه‌ی مزگه‌وتی گه‌وره‌ . ناونیشانی پۆست و گه‌یشتنی نامه‌ی دووره‌ خزمان بوو به‌پێ ی نزیکی له‌مزگه‌وتی گه‌وره‌ وه‌ک ناونیشان نوسی کوردستان له‌ته‌نیشت و به‌رامبه‌ر، له‌سه‌ر و له‌ژێر، له‌سه‌روو له‌خوارووی فڵان باڵه‌خانه‌یه‌ .

دوکانی بازرگانی . .

نماینده‌ی جۆره‌های که‌رسته‌بووه‌ مینابڕی په‌نجه‌ره‌ و ده‌سکی ده‌رگا تا چه‌کوچ و بزمار ( به‌وشه‌ی بزمار ده‌رفه‌ته‌ بنوسم که‌ خارم بزماری ده‌فرۆشت هه‌میشه‌ له‌په‌ڕی کتابه‌کانی به‌عسی ئه‌وسای لوول ده‌دا وه‌ک گرێ ی کولیچه‌ ده‌یپێچاوه‌ تا که‌س مێژووی به‌عسیه‌کان و به‌سه‌ردا هه‌ڵگۆتنه‌کانیان نه‌خوێنێته‌وه‌ هه‌نده‌ی ڕق لێ ده‌بوونه‌وه‌ ) سه‌رده‌مێک پێڵاوفرۆشی باته‌ و لاستیک، کۆمۆنی به‌شه‌ شه‌کر و چاو برنج، کارسته‌ی خانوو هه‌روا بێته‌وه‌ ڕه‌نگکاری و دارتاشی بازاڕ کردووه‌ . زۆر لادێکانی کۆیه‌ بله‌وری لۆکس‌ و فانۆس یا گوزی لاله‌ و فتیلی ته‌باغی نه‌وتیان لێ کڕیوه‌ ماڵیان پێ ئاوه‌دان کردیته‌وه‌ .

هه‌وارگه‌ی وێژه‌ . .

دوکانه‌که‌‌ لۆ خاره‌ جۆبار له‌جیاتی چایخانه‌ و قاوه‌خانه‌یه‌ به‌هۆیه‌وه‌ تا ئێستاش ده‌یان پیاوی ساڵانچوو ده‌وره‌ی ده‌ده‌ن جارهه‌یه‌ به‌ده‌م توڕه‌ییه‌که‌وه‌ گلله‌یی له‌یه‌کترده‌که‌ن: ده‌به‌سه‌ فران ئه‌وه‌ نیوسه‌عاته‌ دێم و ده‌ڕۆم ئه‌وجا نۆره‌ی منه‌ له‌کن جۆباری دانیشم هه‌سته‌ جێم که‌ ! کاک برایم سابیری ده‌نگخۆش هه‌رزوو زوو مێزی دوکانه‌که‌ی ده‌کرده‌ دمته‌ک لۆ گه‌یاندنی ئاوازه‌کی نوێ ی خۆی له‌شیعری جۆبار . وه‌ک ته‌رازووی سه‌رمێزه‌که‌ ویژدان هه‌میشه‌ دادوه‌ری مافه‌کانی له‌وێ پارسه‌نگ کردیه‌ هه‌رچه‌نده‌ ڕه‌فته‌کانی کۆن و تۆزاوین به‌ڵام هه‌رگه‌ردێکی تۆزه‌کان مێژووێکی هه‌ڵگرتووه‌ له‌مۆزه‌خانه‌ ده‌چێ و شایسته‌یه‌ خه‌ڵوه‌ندێکی ته‌لیسماوی شیعربارگه‌یه‌ . زۆرانێک ڕۆژانه‌ به‌به‌ر دوکانه‌که‌ ڕه‌ت ده‌بن هه‌ناسه‌یه‌کی ئۆخه‌ی هه‌ڵده‌کێشن به‌یادی خۆشه‌ویسته‌ کۆچ کردووه‌کانیان هه‌روه‌ها‌ تا ئیستاش هه‌وارێکی وێژه‌ و شیعر له‌شاره‌که‌ هه‌ر ئاوه‌دانه‌ . ده‌گمه‌نه‌ خۆشه‌ویستێک ڕاگوزه‌ری بازاڕی کۆیه‌ بووبی له‌خانه‌ی درێژه‌‌ ‌پاشه‌که‌وتی مێشکدا به‌چاوانی وێنه‌یه‌کی چاوه‌تروکه‌یی ئه‌م دوکانه‌ی نه‌گرتبێ ؟

                             Dlshadtakana@yahoo.  com

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

له‌گه‌ڵ فرمێسکی مۆم و ئه‌شکی شینی دوو چاوم

نوقمی ده‌ریای خه‌مێ بووم به‌ئاسته‌مودوو ماوم

چه‌وته‌بوو چه‌رخی گه‌ردوون منی ته‌نیای وه‌لانا

خه‌رمانه‌ی عیشقی سوتاند داغی به‌جه‌رگه‌وه‌ نا

له‌م‌ ‌تاراوگه‌ی خه‌مۆکیم به‌دبه‌خت گۆشه‌ گیراوم

ئاوێزه‌نی ده‌ردێک بووم بێ ده‌رچه‌م‌ تێیدا ماوم

گه‌ردانی هزری و ده‌روون تاسه‌ی به‌ڕۆحمه‌وه‌ نا

ئازار هه‌ستمی هه‌راسان چه‌نگی به‌بێنمه‌وه‌ نا

‌

وێڵی دوورگه‌ی خه‌مێ بووم له‌بیرم کردوه‌ ناوم

هێنده‌‌ په‌رش و په‌رێشان حه‌ز به‌ژیانم نه‌ماوم

لێوان لێو ‌هه‌ناسه‌ سارد پێکی مه‌ینه‌تیم هه‌ڵنا

ئێستێکه‌ش‌ تار و خه‌ڕۆم تاجی پیریم له‌سه‌رنا

                   This email address is being protected from spambots. You need JavaScript enabled to view it.

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

ئۆباما ده‌به‌مه‌ کۆشکی سپی . .

سه‌رباقی بزێوی چه‌قاوه‌سووی ناو پۆل لاوه‌ کورده‌ی بیست و دوو نه‌ورۆزه‌یی که‌سایه‌تیه‌کی خۆشویستووی هه‌مووانه‌ هه‌رده‌م مه‌ردانه‌ له‌مه‌یدانه‌، پشتی پێده‌به‌سترێ له‌خوێندنه‌ پیشه‌ییه‌که‌ی سه‌رکه‌وتوو زیره‌که‌، گه‌نجیکی قۆزی به‌رچاوه‌ براده‌رایه‌تی هه‌مووان ده‌کات به‌ته‌نگیانه‌وه‌یه‌، قسه‌خۆش و به‌زمگێڕه‌ فشه‌ی به‌گاڵته‌ی دێ . نه‌ک هه‌رزمانه‌ بیانیه‌که‌ باش ده‌زانێ به‌ڵکو کوردیه‌که‌شی ڕه‌وانه‌ باش پێ ی ده‌دوێ به‌س نوسینه‌که‌ی بێ خاڵ و نوقته‌ی سه‌روژێری پیته‌ کوردیه‌کانه‌ وه‌ک نوسینی ئایه‌تی ناو نوشته‌ی کۆلکه‌ مه‌لا فاڵچیه‌کانه‌ ئه‌گه‌ر وێرابیتت بیکه‌یه‌وه‌ بیخوێنیه‌وه‌ ! هاوپۆله‌کانی به‌سه‌رسوڕمانه‌وه‌ داوایان لێده‌کرد ناویان به‌کوردی بنوسێ چونکه‌ لایان وێنه‌کی جوان و له‌خه‌تخه‌تۆکه‌ ده‌چوو نه‌یان ده‌زانی کوڕه‌ش به‌و ناونوسیه‌ هه‌مووانی له‌مامۆستا دابڕی، ئه‌ویش به‌سه‌ری دا قیڕاند: وازبێنێ خه‌ریکی خوێندن بن . ‌له‌نکاو کوڕه‌ هه‌ستا پێوه‌ بڕواته‌ سه‌رپێشاو ته‌نگاوبوو ما‌وه‌یه‌که‌ خۆی ڕاگرتیه‌ هێنده‌ به‌په‌له‌ ده‌یویست بڕوا بگاته‌ سه‌رکوپه‌ڵه‌ سپیه‌که‌ی ئاوده‌سته‌ ڕۆژئاواییه‌که‌ ! مامۆستاکه‌ش مشه‌وه‌ش بوو نه‌کا نه‌یه‌ته‌وه‌ ! ده‌نگی دا: ها کێوه‌ ده‌چی ؟ پۆله‌که‌ له‌شریقه‌ی پێکه‌نینێیاندا، کوڕه‌: چی یه‌ لۆ لێم ناگه‌ڕێ ی ؟ ده‌چم ئۆباما ده‌به‌مه‌ کۆشکی سپی !

                       Dlshadtakana@yahoo.  com

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

چاوانی تۆ میوانخوازه‌ میوانداری چاوانمه‌

‌به‌میوانی هه‌ردوکی بم خه‌نده‌ی‌‌ میوانانمه‌‌

‌له‌میوانگه‌ی شکۆداریت سه‌رتۆپی میوانانم

له‌م ده‌روازه‌ میوانبازه‌ هه‌ستێکی‌ میوانمه‌

ئه‌وهه‌سته‌‌‌ نه‌سته‌ مه‌سته‌ ئه‌ڤینی گیانمه

خه‌ڵوه‌تی په‌رستنه‌‌ ‌‌عه‌شقی ڕوون ڕه‌وانمه‌

له‌ڕووگه‌تا ده‌ڕوانم تامه‌زرۆی هه‌سته‌وانم

مه‌زه‌ و پێکی مه‌ستانه‌ی ئێشکی‌ شه‌وانمه

ئێشکگری هۆنه‌رانه‌‌‌ وێنه‌ی‌ شیعری دوانمه

تۆپکی سه‌رنوسه‌ چاوان خۆشگۆی دیوانمه‌‌‌

دره‌نگه‌ ‌شه‌وێ له‌خه‌وی منیش ئێشکه‌وانم

ڕه‌وانه‌ وێژه‌ بێژیم حونه‌ری تۆی جوانمه‌

                This email address is being protected from spambots. You need JavaScript enabled to view it.