محه‌مه‌د ئه‌حمه‌د

• یاساناسێك: له‌ رێی یاساییه‌وه‌ رێگه‌ پێدراوه‌ دانیشتوانی ناوچه‌دابڕاوه‌كان به‌ژداربن له‌ هه‌رڵبژاردنه‌كانی حكومه‌تی هه‌رێم.
• سیاسه‌ت مه‌دارێك: به‌ژداریكردنی كوردانی ناوچه‌دابڕاوه‌كان له‌ به‌رژه‌وه‌ندی هه‌ردوو حزبی ده‌سه‌ڵاتداردایه‌.

بۆ ده‌ستنیشان كردنی سه‌رۆك و ئه‌نجومه‌نه‌كانی "نوێنه‌ران و پارێزگاكان"، سه‌رجه‌م وڵاتانی دیموكراتی خواز له‌ ماوه‌یه‌كی ده‌ستنیشانكراودا هه‌ڵبژاردن ئه‌نجام ده‌درێت و تێدا سه‌رجه‌م هاوڵاتییانی وڵات له‌ ناوه‌وه‌ و ده‌ره‌وه‌ به‌شدار ده‌بن.

بۆ ئه‌م مه‌به‌سته‌ به‌ باشمان زانی كه‌ رای چه‌ند هاوڵاتییه‌كی ناوچه‌ دابڕێنڕاوه‌كان بزانین سه‌باره‌ت به‌ به‌شداریكردنیان له‌ هه‌ربژاردنه‌كانی هه‌رێم.

حه‌مید وه‌لی، هاوڵاتییه‌كی 60 ساڵی دانیشتووی شاری "خورماتوو"وه‌ ووتی: ئێمه‌ی كورد ساڵانێكی زۆرمان به‌ خه‌بات به‌سه‌ر برد بۆ ئازادكردنی وڵاته‌كه‌مان و به‌رقه‌رار بوونی ئازادی و به‌ ئاره‌زووی خۆمان كه‌سێك هه‌ڵبژێرین بۆ سه‌رۆك و كه‌سانێكی شییاو بۆ په‌رله‌مانه‌كه‌مان ده‌ستنیشان بكه‌ین، ئێستا له‌پاش هه‌موو ئه‌و خه‌باته‌ و شه‌هیددانه‌ و به‌هه‌رێمبوونی به‌شێك له‌ كوردستان، كێشه‌ی ناوچه‌ دابڕاوه‌كان چاره‌سه‌ر نه‌كراوه‌ و كه‌ ئه‌بوایه‌ سیاسه‌ت مه‌داره‌كانی كوردستان ماوه‌یه‌ك پێش ئێستا به‌پێش مادده‌ی "140" چاره‌سه‌ر بكرایه‌، ئێمه‌ ئاواته‌ خوازین هه‌رێمی كوردستان ئه‌م كوردانه‌ی ناوچه‌ دابڕاوه‌كان پشتگوێ نه‌خات بۆ به‌شداری كردن له‌ هه‌ڵبژاردنه‌كانیان، چونكه‌ ئێمه‌ش كوردین و مافی ئه‌وه‌مان هه‌یه‌ بنچینه‌ی حكومه‌ته‌كه‌مان ده‌ستنیشان بكه‌ین.

به‌ژداریكردن له‌ هه‌ڵبژاردنه‌كانی هه‌رێم و ده‌ستشانكردنی كه‌سانی شیاو له‌لایه‌ن كوردانی ناوچه‌ دابڕاوه‌كان مافێكی ره‌وای خۆمانه‌، ئه‌مه‌ ووته‌ی "سه‌میره‌ عه‌لی"ـیه‌ كه‌ چالاكوانه‌ له‌ بواره‌كانی ئافره‌تاندا، ئه‌و له‌ درێژه‌ی قسه‌كانی ووتی: دۆخه‌كه‌ی ئێمه‌ جیاوه‌زه‌ و له‌ شاره‌كانی (كه‌ركوك و خورماتوو و جه‌ه‌ولا. . . سه‌رجه‌م كوردانی شار و شارۆچكه‌كانی ده‌ره‌وه‌ی هه‌رێمی كوردستان) كوردی زۆرهه‌ن و بێبه‌ش بوونه‌ له‌ هه‌ڵبژاردنه‌كانی هه‌رێمی، بۆیه‌ داواكارم له‌ ده‌سه‌ڵاتدانی هه‌رێم بڕیارێك ده‌ربكه‌ن بۆ یه‌ژداریكردنمان له‌و هه‌ربژاردنانه‌.

سه‌رۆكی ژوری پارێزه‌رانی خورماتوو، پارێزه‌ر "ئه‌حمه‌د حه‌مید"، سه‌باره‌ت به‌ بابه‌ته‌كه‌مان ووتی: له‌به‌ر ئه‌و دۆخه‌ تایبه‌تییه‌ی كه‌ هه‌رێمی كوردستان هه‌یه‌تی، له‌ رێی یاساییه‌وه‌ رێگه‌ پێدراوه‌، حكومه‌تی هه‌رێم ئه‌توانێت فه‌رمانێكی ره‌سمی ده‌ربكات و له‌ پاش ئاماده‌كارێكان، ئه‌توانرێت كوردانی ناوچه‌دابڕاوه‌كان به‌ژداربكات له‌ هه‌ڵبژاردنه‌كانی خۆی.

چاودێرێكی سیاسی كه‌ پێی باشنه‌بوو ناوی بوترێت ووتی: ئه‌بوایه‌ ماوه‌یه‌ك پێش ئێستا حكومه‌تی هه‌رێم و سیاسه‌تمه‌داره‌كانیان ناوچه‌ دابڕاوه‌كان بخرایه‌ته‌ سه‌ر خۆی به‌پێی ده‌ستوری عێراق، به‌ڵام مشتومڕی سیاسێكان تاوه‌كو ئێستا وایكردوه‌ ئه‌و كاره‌ ئه‌نجام نه‌درێت، ئه‌و چاودێره‌ سیاسییه‌ش له‌ درێژه‌ی قسه‌كردنه‌كانی ووتی: ئه‌وه‌ش ناشارێته‌وه‌ كه‌ كوردانی ناوچه‌ دابڕاوه‌كان به‌پێی هه‌ڵبژاردنه‌كانی پێشو زۆرینه‌ی ده‌نگه‌كانیان بۆ هه‌ردو حزبی ده‌سه‌ڵاتی هه‌رێمی كوردستان بوونه‌ و ئینجا بۆ ئه‌وانی تریش، به‌ڵام راده‌بڕین و ده‌نگ دان مافی هه‌رتاكێكه‌ سه‌ر به‌ هه‌ر لایه‌نێك بێت.

له‌كۆتاییدا ئه‌وه‌ ماوه‌ته‌وه‌ بیڵێن، كه‌ به‌پێی ده‌ستوری عێراقی ئه‌بوایه‌ ئێستا ناوچه‌دابڕێنڕاوه‌كان كێشه‌كه‌یان چاره‌سه‌ر كرابێت و له‌پاش ریفڕاندۆم ئه‌وناوچانه‌ ئێستا سه‌ر به‌ هه‌رێمی كوردستان بوونایه‌ و هه‌ر وه‌ك هاوڵاتییانی هه‌رێم ده‌نگی خۆیانیان بدایه‌، به‌ڵام كێشه‌ یه‌ك له‌دوای یه‌كه‌كانی حكومه‌تی عێراق بون به‌ به‌ربه‌ست بۆ گێرانه‌وه‌ی ئه‌و ناوچانه‌ و هه‌ر نه‌ك ئه‌وه‌ش به‌ڵكو ئێستا تیرۆریستان به‌ هه‌مو هه‌وڵێكیانه‌وه‌ رۆژانه‌ كرداری تیرۆریستی زیاتر ده‌كه‌ن ئه‌ویش بۆ ئه‌وه‌ی ئه‌و ناوچه‌دابڕێنڕاوه‌كان كه‌وتونه‌ته‌ نێوان حكومه‌تی به‌غدا و هه‌رێمی كوردستانه‌وه‌.

This email address is being protected from spambots. You need JavaScript enabled to view it.

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

كۆبونه‌وه‌كه‌ ئیجابی بوو..! محه‌مه‌د ئه‌حمه‌د – خورماتوو

كۆبونه‌وه‌كه‌ ئیجابی بوو، ئه‌و دێڕه‌یه‌ كه‌ له‌ دوای هه‌موو كۆبونه‌وه‌كانی نوێنه‌رانی كورد له‌گه‌ڵ حكومه‌تی مه‌ركه‌زی به‌غدا ده‌وترێت، كه‌ زۆربه‌ی كۆمه‌ڵانی خه‌ڵكی كوردستان نازانن ناوه‌ڕۆكی ئه‌و كۆبونه‌یانه‌ چییه‌.

كێشه‌ و گرفته‌كانی نێوان هه‌ردوو حكومه‌تی هه‌رێم و به‌غدا ئه‌وه‌نده‌ زۆرن كه‌ بگاته‌ ئه‌و راده‌یه‌ هه‌موو ساڵێك بۆ ده‌ستنیشان كردنی بودجه‌ی هه‌رێم له‌لایه‌ن حكومه‌تی مه‌ركه‌زی به‌غداوه‌، ئه‌بێت وه‌فدێكی هه‌رێم سه‌ردانیان بكات، ئه‌مه‌ جگه‌ له‌ كێشه‌كانی "نه‌وت و غاز و جێبه‌جی كردنی مادده‌ی 140 و چه‌ندین كێشه‌ی تر كه‌ تاكو ئێستا چاره‌سه‌ر نه‌كراوه‌".

له‌ دواهه‌مین سه‌ردانی وه‌فدی حكومه‌تی هه‌رێم بۆ به‌غدا، له‌ رۆژی 29/4/2013 به‌سه‌رۆكایه‌تی نێچیرڤان بارزانی و شاندی یاوه‌ری، سه‌ردانی چه‌ندین به‌رپرسی حكومی و حزبی حكومه‌تی فیدڕالی عێراقیان كرد، له‌و كۆبونه‌وه‌یانه‌دا تاوتوێی چه‌ندین كێشه‌ی هه‌ڵبه‌سێنراو كرا كه‌ گرنگترینیان "بودجه‌ی حكومه‌تی هه‌رێمی كوردستان و ئه‌و كێشه‌ سیاسییه‌ی كه‌ ئه‌مڕۆ له‌ عێراقدا بونی هه‌یه‌".

ئه‌م سه‌ردانه‌ی وه‌فده‌ كوردێكه‌ له‌ پاش پشتگوێخستنی په‌رله‌مانتارانی كورد دێت له‌ په‌رله‌مانی عێراق بۆ په‌سه‌ندكردنی بودجه‌ی هه‌رێم و كشانه‌وه‌ی سه‌رجه‌م په‌رله‌مانتاران و وه‌زیره‌ كورده‌كانی ناو حكومه‌تی مه‌ركه‌زی به‌غدا.

ئه‌وه‌ی جێی سه‌رسوڕمانه‌ پاش دانوستاندن و گه‌یشتن به‌ چاره‌سه‌ركردنی كێشه‌كان، دوای ماوه‌یه‌ك هه‌مان كێشه‌ دووباره‌ سه‌ر هه‌ڵده‌داته‌وه‌ و پێویستی به‌ وه‌فدێكی تر ئه‌بێت بۆ چاره‌سه‌ر كردنی، ئایا كاتی ئه‌وه‌ نه‌هاتووه‌ ئیتر به‌یه‌كجاری كێشه‌كان چاره‌سه‌ر بكرێن و چیتر پێویستی به‌ سه‌ردانی وه‌فد نه‌بیت؟.

وه‌ك ده‌زانین له‌ پاش دژایه‌تی كردنی كورد و دروستبونی شه‌ڕ له‌گه‌ڵ حكومه‌تی مالیكیدا ئێستا عێراق له‌ ره‌وشێكی هه‌ستیاردایه‌ كه‌ له‌ ناوچه‌ سوونه‌ نیشنه‌كان خه‌ڵك به‌چه‌كه‌وه‌ دژی حكومه‌تی مه‌ركه‌زی به‌غدا وه‌ستاون و ته‌نانه‌ت گه‌یشتۆته‌ ئه‌و راده‌یه‌ هێزه‌چه‌كداره‌كانی عێراق له‌ چه‌ندین شار ده‌ربكرێت و هێزی چه‌كداری عه‌شیره‌ته‌كان جێگرییان بكه‌ن، بۆیه‌ ئێستا به‌ هه‌لێكی باش ده‌زانرێت بۆ گه‌ڕانه‌وه‌ی ناوچه‌ دابڕێنراوه‌كان بۆ سه‌ر هه‌رێمی كوردستان و چاره‌سه‌ر كردنی كێشه‌كان به‌ یه‌كجاری و بڵاوكردنه‌وه‌ی هێزی پێشمه‌رگه‌ له‌و ناوچانه‌ بۆ ئه‌گه‌ری دروست بوونی هه‌ر رووبه‌رووبونه‌وه‌یه‌ك.

چونكه‌ با دووباره‌ توشی هه‌مان كێشه‌ی پێشتر نه‌بینه‌وه‌ كه‌ له‌ "رێكه‌وتننامه‌ نۆزده‌ خاڵێكه‌ی هه‌ولێردا" له‌پاش ماوه‌یه‌ك به‌هیچ شێوه‌یه‌ك ئه‌و رێكه‌وتننامه‌یه‌ جێ به‌جێ نه‌كرا، ئه‌مه‌ش ئه‌و گه‌مه‌ سیاسیه‌ی به‌رپرسانی به‌غدا ده‌سه‌لمێنێت له‌گه‌ڵ وه‌فده‌كانی حكومه‌تی هه‌رێم، چونكه‌ له‌كاتێكدا توشی ته‌نگه‌شه‌ی سیاسی ببن بۆ خۆده‌ربازكردن هه‌موو مه‌رجێك قبوڵ ده‌كه‌ن، به‌ڵام هه‌ر كه‌ ده‌ربازیان بوو ئیتر هه‌ركه‌سه‌و قسه‌یه‌ك ده‌كات و پابه‌ندی رێكه‌وتننامه‌كه‌یان نابن، هۆی ئه‌مه‌ش بۆ ئه‌وه‌ ده‌گه‌ڕێته‌وه‌ كه‌ حكومه‌تی عێراقی به‌ یه‌كجار به‌رگه‌ی دژایه‌تی كردنی كورد و عه‌ره‌بی سوونه‌ ناگرێت.

بۆیه‌ داواكارم له‌ وه‌فده‌كه‌ی حكومه‌تی هه‌رێم چیتر باوه‌ڕیان به‌و به‌ڵینانه‌ی حكومه‌ته‌ تاكڕه‌وه‌ێكه‌ی به‌غدا نه‌بێت و توشی هه‌مان هه‌ڵه‌ی پیشتر نه‌بن.

This email address is being protected from spambots. You need JavaScript enabled to view it.

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

رق و کینەکانی هەڵبژاردن وای کردوە خەڵکی لەپێناودا سەردەبڕن. . !... محەمەد ئەحمەد – خورماتوو

هەڵبژاردن، ئەو پرۆسەیە کە هەموو هێز و قەوارە سیاسسیەکان لە پێناویدا بە ملیارەها دۆلار و ئەوپەڕی شەڕی راگەیاندنی بۆ دەکەن و ئەنجامەکەشى دەرچوونی کاندیدەکانیتی لەپەرلەمان یاخود ئەنجومەنی پارێزگا و قەزاکان بۆ خزمەت کردنی خەڵکی وڵاتەکەی.
ماوەیەکە لایەنە سیاسیەکان لە عێراق و ناوچە کوردستانیەکانى دەروەوەى هەرێم هەستاون بە پروپاگەندە بۆ کاندیدەکانیان و پەیداکردنی دەنگی زیاترن ئەمەش پرۆسەیە لەبنەڕەتدا پرۆسەیەکى دیموکراتیە، بەڵام مەخابن لەم وڵاتەدا پروپاکدنەى هەڵبژاردن دوور لەگیانى یەکتر قبوڵکردن لەرێگەی تەلەفزیۆن و رۆژنامە و سایتەکانی ئەلکترۆنیەکانەوە هەستاون بە شکاندنەوەی یەکتر، بەڵام ئەمجارەیان جیاواز لە جارەکانی تر رق و کینەی هەڵبژاردن وای کردوە بەوپەڕی بێ ویژدانییەوە چەندین کاندیدى هەڵبژاردنەکان تیرۆر کران و کار گەیشتە ئەوەى کەوا کەسێکى کورد سەرببرێت کە تەنها پۆستەری کاندیدێکی هەڵواسیوە. ئەم کارەساتەش لەبەروارى 17/4/2013 پێشمەرگەیەکی لەقی 5ـی پارتی دیموکراتی کوردستان، بەناوی " سیروان سەمیر وەلی" لە کاتی هەڵواسینی پۆستەری کاندیدی لیستی برایەتی و پێکەوە ژیانی کوردە فەیلیەکان لە گەڕەکی زەیونەی شاری بەغدا، چوار کەس هەڵدەکوتنە سەری و بەشێوەیەکى زۆر هۆڤانە بەچەقۆ سەری دەبڕن و بەیەکجاری ملی لەلاشەی جیا دەکەنەوە، ئایە هەڵواسینی پۆستەر بۆ کاندیدێک تاوانە کە ملی لەلاشەی جیا بکرێتەوە و بەیەکجاری کۆتایی بەژیانی بهێنرێت.

 
بەگوتەی شایەدحاڵەکانى ئەو رووداوەش، دەمەو ئێوارە پێشمەرگەی شەهید بە جلی مەدەنییەوە لە کاتی هەڵواسینی پۆستەری کاندیدی حزبەکەی لە گەڕەکی زەیونەی شاری بەغدا، چوار کەس گەلەکۆمەی لێدەکەن و بەچەقۆ لێدەدەن و دواتر بەوپەڕی بێویژدانییەوە سەری دەبڕن.

پێش ناشتنى تەرمى ئەو شەهیدەش بباوکی شەهید سیروان لەمەراسیمى بەخاکسپاردنی کوڕەکەیدا بەو پەڕی باوەڕیەوە دەڵێت: کوڕەکەم سەری بەرزکردم و خۆی بۆ کوردستان بەخت کرد . . . کوڕەکەم بووە شەهیدێک لە شەهیدەکانی رێگای رزگاریخوازی کوردستان.

This email address is being protected from spambots. You need JavaScript enabled to view it.

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

سەیر و سەمەرەکانی هەڵبژاردن..! محەمەد ئەحمەد - خورماتوو

هەڵبژاردن، یان خەباتی قەڵەم، پرۆسەیەکی نوێیە و پەیدا بوونی لە کوردستان و عێراقدا دەگەڕێتەوە بۆ پاش پرۆسەی ئازادیکردنی عێراق،  کە تێیدا پاڵێوراوان هەموشتێکی مەحاڵ دەکەن بۆ بەدەستهێنانی دەنگی زیاتر بۆئەوەی سەرکەوتوبن لەو پرۆسەیەدا.
ئەم سەرەنجانەی خوارەوە دەخەمە روو بۆئەوەی هەر کاندیدیک سوودی لێوەربگرێت و چیتر تووشی هەمان هەڵەی کاندیدانی پیشوی خۆیان نەبنەوە.

# رۆژێکیان پێشمەرگەیەک 20 کارتی 10 هەزاری لە ناو موبایلەکەیدا بوو، بکاتە 200، 000 دینار، لە کاتێدا لێیم پرسی ئەم هەمو باڵانسە چی دەکات لە ناو موبایلەکەت، ئەویش ووتی: هەڵبژاردن خۆشبێت تێر کارت و نانین...!!؟ تومەزە ئەم برادەرە کارتی لە یەکێک لە کاندیدەکان وەرگرتووە بۆئەوەی دابەشی بکات بەسەر ئەوکەسانە کە دەنگی پێ ئەدەن و بۆخۆی هەمویانی داخل کردوە.

# کاندیدیکی تر بۆ پەیداکردنی دەنگی دەنگدەران رووی لە ناوچە عەرەب نشینەکان کرد و هەستا بە دابەش کردنی ( پارە، عەزێ بۆ ئافرەتان، ، کارتی موبایل و دشداشەو عەگاڵی عەرەبی بۆ شێخی عەشیرەت و دارودەستەکانی)، ئەم کاندیدە بەڕێزە لە پاش هەڵبژاردن دەنگێکی زۆر کەمی هێنا و بەیانیانێکی زوو لە موبایل دەقیڕاند بەعەرەبی ئەیووت (وین دشداشاتی وین فلوسی، هیجی هیج من ...)، بەواتای ( کوانی دشداشەکانم کوانی پارەکانم، ئاوها و ئاوها لە ....)، بێگومان ئەو خاڵانە هەموی قسەی نابەجێ و ناشرین بوون.

# هەموتان ئەزانن پێش رۆژێک لە دەنگدانی هاوڵاتییان، پۆلیس و سەرباز دەنگی خۆیان ئەدەن، ئەویش بەمەبستی پاراستنی ئەمنی هاوڵاتییان لە رۆژی دەنگدان و مەشغولنەبوونی سەرباز و پۆلیسی بەدەنگدانەوە، لە یەکێک لە بنکەکانی دەنگدان، چەندکەسێک کە دەنگیان بۆ کاندیدێک کۆ ئەکردەوە، بە هەڵپە هەڵپ خەریکی دابەشکردنی کارتی موبایل بوون بەسەر سەربازەکاندا کە بەووتەی خۆیان نزیکە (5، 000، 000) پێنج ملیۆن دینار لەو رۆژە کارتیان دابەش کرد بەسەر سەرباز و پۆلیسەکاندا، دواتر چوم بۆ لایان ووتم ئاخر ئەمانە زۆربەیان خەڵکی خواروی عێراق و شوێنەکانی ترن بۆیان نییە دەنگ بە کاندیدێکی ئەم ناوچەیە بدەن، ووتی چی؟ یەعنی کەسیان ناتوانن دەنگ بە (فڵانی کاندید بدەن)، دیارە نەیزانیوە هەرکەسێک لە هەرپارێزگارێک ناتوانیت دەنگ بە کاندیدەکانی پارێزگایەکی تر بدات.

# یەکێکی تر لە سەیر و سەمەرەکانی هەڵبژاردن، هەمومان بینیمانە و ئەیزانین دابەشکردنی خۆراک لەلای (بایەعی) دابەش ئەکرێت، بەڵام لەکاتی چونم بۆ روماڵکردنی هەواڵەکانی هەڵبژاردن لە یەکێک لە گوندە عەرەب نشینەکانی سەر بە شارۆچکەی خورماتوو، لەدوورەوە بینیم خەڵکی ئەو گوندە دەورەیان لە ئۆتۆمبێڵێک دابوو، کە نزیک بومەوە لێیان خەریکی دابەشکردنی (رۆن و برنج و ئاردی سفر...چەند شتێکی تریش)، بەخۆمم وت یاخوا هەموو مانگێک هەڵبژاردن بکرێت بۆئەوەی فەقیر و هەژار تێربخۆن.

# برادرێک بۆمی گێڕایەوە و وتی: بەس نییە لای ئێوە کارتی موبایل و خۆراک دابەش دەکەن، لای ئێمە لەبەر دەنگدان بە لیستی (*****)ـی حزبی فڵانی، زۆر کەس دەمانچە و لاپتۆپی وەرگرت.

# یەکێک لە سەیرو سەمەرێکی دێکە کە هیچ عەقلێک نییە باوەڕی پێ بکات، ئەویش ئەوەیە لە شاری "موسڵ" لە ماوەیەکی زۆر کەمدا زیاتر لە نیو ملیۆن دەنگدەر زیادکرا، یەعنی سوبحانە الله لە ماوەی دوو - سێ ساڵدا نیو ملیۆن کەس لە دایکبوون و بوون بە سەرووی 18 ساڵ.

# لە هەمووی سەیرتر، لە باشوری عێراق چەند لیستێکی ئەو ناوچانە بۆ هەر دەنگێک (100$) دراوە و لەپاش پێدانی ئەو بڕە پارەیە بە قورئان سوێندراوە کە دەنگ بە لیستەکەیان بدرێت.

ئەمە هەندێک لەو کارانەیە کە بە چاوی خۆم بینیویانمە یان برادەرەکانم بۆمیان گێراوەتەوە، ئاخۆ بە شاراوایی چەندین و چەندین شتی تر کرابێت و کەسێک یان هەر کەس پێیان نەزانێت.
پرسیار: تۆ بڵێی ئەم کاندیدانە بۆ هەموو شتێکی مەحاڵ ئەکەن بۆ ئەوەی دەنگی زۆرتر بەدەست بێنن؟ ئاخۆ تۆ بڵێت ئەوەندە بە پەرۆشبن بۆخزمەتکردنی خەڵک و وڵات، چونکە بوون بە بەرپرس بە واتای ئەوەیە بەرپرسبێت لە هەمبەر خزمەت کردن بە خەڵک و وڵات، یان لە ناخی خۆیاندا شتی تریان دانابێت و ئەوەندە هۆکارەکەی بەهێزبێت کە هەرچی بکرێت بیکەن بۆەئەوەی ببنە خاوەنی کورسی.

This email address is being protected from spambots. You need JavaScript enabled to view it.

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.