حەمە غەفور

من خۆم لەو شوێنەوە کە مەبدەئیەن ئینتیمای سیاسیم گرێدراوە لەگەڵ ئیرادەی ئازادانەی خەڵکی ناڕازی بە دژی حوکمی نوێنەرانی چینە داراو دەوڵەمەندەکان، کە پایەی سەرەکیی بنیاتنانی کۆمەڵگایەکی باشترو بانترو شکۆدارترە بۆ هاوڵاتیان، دیارە هیچ ئومێدێکم بەوە نییە لە چوارچێوەی یارییە پارلەمانیی‌و ناپارلەمانییەکانی حزب‌و لایەنە بەشداربووەکانی هەڵبژاردنی کوردستاندا، بەئاستەمیش بێت مۆرکێکی ئەو ئینتیمایەی من بە هەر تەوافوق‌و سازان‌و کواڵیسییەکیشەوە ببینرێت کە لە یاری ناوکۆیی نێوان ئەم پێکهاتە سیاسیانەدا ڕووبدات، بە مەبەستی پێکهێنانی حکومەتێکی لانیکەم جۆری ئەوەی ئۆپۆزیسیۆن‌و بزووتنەوەی گۆڕان زیاد لە حەد بانگەشەی بۆ ئەکات. بەڵام وەک لە یاساو ڕێساو زیکزاگە سیاسییەکانی خۆیاندا هاتووە، توولەڕێگایەک لەبەردەم ئۆپۆزیسیۆن‌دا هەیە بۆ دوورخستنەوەی پارتی لە دەسەڵات، یاخود لانیکەم لە پێکهێنانی حکومەتی داهاتوو، ئەویش دروستکردنی ئیئتیلافێکی زۆرینەیە لە ئۆپۆزیسیۆن‌و یەکێتی، کە بەپێی یاسای عێراق ئەتوانن کابینەی حکومەتی داهاتوو لەوان پێکبێت، ئایا ئۆپۆزیسیۆن کارامەیی ئەوەی تێدایە لەم گەمە دیموکراسی‌و یاساییەی خۆیاندا تەک بە پارتی بداتە دواوەو سازان‌و ئیئتیلافێکی گەورەی وەها پێکبێنێت کە هەم پارتی بخاتە دەرەوەی بازنەی دەسەڵات‌و خۆیان بچنە نێو حەلەبەی حوکمڕانییەوە!؟ هەم ئاشتی کۆمەڵایەتیی لەم گەمە دیموکراسییەدا بە سەقامگیریی بمێنێتەوە!؟ یاخود هەر لیستەو بەجیا چاوەڕووانی لوتفی هەژموونیی پارتییە لە کێکی دەسەڵات‌و حکومەتی ئاییندە شەریکیان بکات!؟

لە سپی نیوزەوە وەرگیراوە؛ (سەرچاوەیەکی یاسایی رایگەیاند" بەپێی یاسا دەکرێت گەورەترین کوتلەی سیاسی راسپێردرێت حکومەت پێکبهێنێت، بۆ ئەمەش دەکرێت گۆران‌و یەکێتی‌و ئیسلامیەکان گەورەترین کوتلەی پەرلەمانی پێک بهێنن".

سەرچاوەکەی سپی نیوز کە نەیویست ناوی ئاشکرا بکرێت ئاماژەی بۆ ئەوە کرد کە بەپێی یاساکانی هەرێم لە مادده‌ی ( 58 )دا باسی ئه‌وه‌ نه‌كراوه‌ مافی ئەو لایەنەیە کە گه‌وره‌ترین قه‌واره‌ی هه‌ڵبژاردن بێت حكومه‌ت پێکبهێنێت، به‌ڵكو ئەو مافە دەدرێت بە گه‌وره‌ترین كوتله‌ی په‌رله‌مانی کە گۆران‌و یەکێتی‌و ئیسلامییەکانن‌و دەتوانن ئەو کوتلەیە دروست بکەن.

هەرەوەها ئەو سەرچاوەیە وتی " لە عیراقیش هەر وایە هەموان هەڵبژاردنی ٢٠١٠ ی پەرلەمانی عێراقمان لەیادە کە لیستی عێراقییە زۆرترین دەنگی هێنا، بەلآم دروستکردنی حکومەت درا بە لیستی هاوپەیمانی نیشتمانی شیعە‌و مالکی بۆ پێکهێنانی حکومەت راسپێردرا".
ئەو سەرچاوەیە باسی لەوە کرد کە خۆشی ئەو مەسەلەیە لەوەدایە کە ئەو دەستپێشخەریە بارزانی کردی‌و بەرێێکەوتنامەی هەولێر ناوزەد کراو هەر ئەویش ئەندازیاری بوو. )

٢٧ئەیلوول١٣

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

بەشێکی زۆر لە خەڵکی کوردستان، خۆشباوەڕییەک زۆریان هەیە بەوە کە گۆڕان ڕەنگە باشتر بێت لە پارتی‌و یەکێتی! منیش پێموایە ڕەنگە هەندێ چاکسازی ڕووبدات تەنانەت ئەگەر گۆڕان بە ئۆپۆزیسیۆنیش بمێنێتەوە! هەر ئێستا لە پێشبڕکێی بەڵینداندا پارتی‌و یەکێتی بەرنامەی باشتر لە گۆڕان ئەخەنەڕوو. ئەو دوو حزبە تاقیکردنەوەی خۆیان داوەو ناجح نەبوون، بۆیە گڵۆڵەیان کەتۆتە لێژی‌و متمانەی جەماوەریان لە دەستداوە. بەم دوادواییە بۆیان جۆرناکرێتەوە. بەڵام لەبیرتان نەچێت کە گۆڕانیش سۆشیال - لیبڕاڵیزمی بۆرژوایی نوێنەرایەتی ئەکات. وە سەرئەنجام نوێنەری چینی بۆرژوازی کوردستان ئەکات، ڕەنگە نوێنەری هەندێک لە بۆرژوازیش بێت نەک هەمووی!! گۆڕانکاریی هەر هێندە ئەبێت کە نوێنەرێکی نوێی بۆرژوازی بە دەنگی خەڵکی یان بە تەقسیمکاری دابەشکردنی دەسەڵات، ئەچێتە نێو دەسەڵات یان تەنانەت ڕەنگە حکومەتیشی بەدەست بێت.

جیاکاری‌ و هەڵاواردن‌و بێمافی‌و بێمەسکەنی‌و بێکاری و زۆر دەردی تر هەروا باقی ئەمێننەوە. بە سەرکەوتنی گۆڕان نە پارتی لە عەرز ئەدرێت، نە موعجیزە ڕووئەدات! گۆڕان لە دەمی نەوشیروان مستەفاوە ئەڵێ بەشداری دەسەڵات دەکەن. واتە بە ڕێکەوتن لەگەڵ پارتیدا دەسەڵات دابەش ئەکەن. ئیتر چی لە دۆخەکەی ئێستا ئەگۆڕێت!؟ بۆ نمونە؛ بزوتنەوەی گۆڕان ئەتوانێت یەک جەردەو مافیای پارتی‌و یەکێتی بداتە دادگا!؟ ئەتوانێت بەڵێنی وەها بدات، بەڵام ئایا عەمەلییە کارێکی وەها؟ یان ئەوکەسانەی نێو گۆڕان خۆیان کە تۆمەتبارن بە دزی‌و خۆدەوڵەمەندکردن‌و کوشتنی بەکر عەلی‌و . . تد ئەباتە بەردەمی یاساو لێپێچینەوە؟ یان نەوشیروان مستەفا ڕائەکێشرێتە دادگا لەسەر کوشتاری قڕناقاو پشتئاشان‌و کوشتاری کۆمۆنیستەکان؟ چاوەڕوانیی ئەمە لە ئۆپۆزیسیۆن یان گۆڕان ئەکرێت!؟

کەسانێک کە چاوەڕوانی زۆریان لە بزووتنەوەی گۆڕان هەیە، هەق وایە پێوەرێک دانێن بۆ لەمەحەک دانی گۆڕان. بۆ نموونە؛ ئایا یەکەم کاری گۆڕان لێپێچینەوە ئەبێت لە نەوشیروان مستەفا وەکو تۆمەتباری کوشتاری قڕناقاو پشتئاشان‌و سەرپەرشتیاری سەرەکی کوشتاری کۆمۆنیستەکانی کوردستان؟ وەڵامی ئەم پرسیارانە پێوەرن بۆ کەسانێک کە سیاسەتی بنەماڵەیی پارتی‌و یەکێتی نیگەرانی کردون‌و بەهەر نرخێک قایلن گورزێک بدرێت لە پاتی‌و یەکێتی. وە خۆشباوەڕ بەمەی کە گۆڕان لە عەرزیان ئەدات! بزووتنەوەیەک کە ئیدیعای سەروەر کردنی یاسا ئەکات، ئایا یەکەم لێپێچینەوەی یاسایی لەگەڵ سەرۆکی گۆڕاندا ئەخاتە دەستووری خۆیەوە؟

هەر لە ووتارەکەیدا دوێنێی نەوشیروان مستەفا بەڕوونی داوای ڕێکەوتن ئەکات لەگەڵ پارتی. کوردستان جێگایەکە پارتی بە ئابووریی زاڵە بە میلیشیا زاڵە. بەداخەوە وەهمی قەومیش زۆرتر لە بەرژەوەندی پارتیدایە لەنێو خەڵکیدا. پاشخانی فکری‌و ئایدیۆلۆژی بزووتنەوەی گۆڕانیش هەر کوردایەتییە، بەڵام ڕۆشنبیرانێکی چەشنی مەریوان وریا قانع و ئاراس فەتاح بوونەتە بانگەشەکاری هەڵمەتی هەڵبژاردن‌و داوا لە خەڵکی کوردستان ئەکەن، بەشداری دەنگدان‌ بکەن‌و بە دەنگدان بە گۆڕان سزای پارتێ‌و یەکێتی بدەن! ئەگەر وورد بینەوە زیاتر لەم بانگەشەیە، دەرئەکەوێت ئەمە تەڵەیەکەو بۆ خەڵکی کوردستان دانراوە، هەتا خەڵکی دەستهەڵگرن لە شێوازی خەباتکارانەی خۆیان‌و ناڕەزایەتییەکانی چەندی ساڵەیان بسپێرن بەم وەکیلانەی پەرلەمان کە لەڕێی بزووتنەوەی گۆڕانەوە لەنێو هۆڵی پارلەماندا بیقڵیشیننەوەو تەپڵلێدەن و بوتڵی ئاو بهاوێژن! ئەمە ئیتر کەی گۆڕانکارییەک بوو خەڵکی عومرێکە لەپیناویدا تێئەکۆشێت!

خەڵکی کوردستان تاقیکردنەوەی ١٧ی شوباتیان هەیە چۆن بزووتنەوەی گۆڕان، خۆی کردە دەمڕاستی ئەو ڕابوونە جەماوەرییە، وە کردیە کارتێکی سیاسی بەدەستییەوە بۆ گفتوگۆ کردن لەگەڵ دەسەڵاتدا. پاشان لە چوار ساڵی رابردوودا هەم دەسەڵاتیش‌و هەم ئۆپۆزیسیۆنیش هاتوونەتە سەر ئەو باوەڕەی کە هەردوولا تەواوکەری یەکترین بەرانبەر بە خەڵکی ناڕازی. بهێننە بەرچاوتان ئەگەر لە ١٧ی شوباتدا ئۆپۆزیسۆن نەبوایە، ئەگەر زۆر بوو دەسەڵاتی بنەماڵەیی ڕاماڵرایە! ئێستا ئێمە لەنێو وەهمی هەڵبژاردنێکی دیکەدا نەئەبووین بۆ شەرعییەتدانەوە بە هەمان دەسەڵات بە هەندێ گۆڕانکاری شکڵی‌و هاتنی هەندێ دەموچاوی تازە بۆ نێوی. چینی بۆرژوازی کوردی، وە حزبەکانی، لە هەر کات زیاتر ئەمڕۆژانە پێویستیان بە ئۆپۆزیسیۆنێک هەیە تا فیلترەیشنی ڕەخنەو ناڕەزایەتی جەماوەری‌و کرێکاری بکەن‌و ئاراستەکەی بگرنە دەستی خۆیانەوە، نەک جڵەوی لەدەستیان دەربچێ‌و قەڵای دەسەڵاتی خۆماڵی بهێننە خوار. ئەوسا هەم دەسەڵات‌و هەم ئۆپۆزیسیۆن پێکەوە شتێکیان نامێنێتەوە شەڕی لەسەر بکەن‌و هەردوولایان زەرەرۆمەند ئەبن.

کەواتە هەڵبژاردن ئەو یارییەیە کە هەم دەسەڵات هەم ئۆپۆزیسیۆن سازو گەرمیان کردووە هەتا ڕیزی ناڕەزایەتی بەرهەقی خەڵکی لەنێو خۆیاندا بتوێننەوەو ئیحتیوای بکەن. بایکۆت کردنی هەڵبژاردن بەرگرتنە بەم سیاسەت‌و پیلانەی دەسەڵات‌و ئۆپۆزیسیۆن پێکەوە! هێشتنەوەی متمانەیە لەنێو خەڵكی کوردستاندا، لەسەر کارابوونی بەردەوامیدان بە ناڕەزایەتییەکانیان تا هێنانە ئارای دەسەڵاتێکی خەڵکی کە زۆرترین ماف‌و ئازادییەکان بۆ چین‌و توێژە کرێکارو زەحمەتکێشەکانی کوردستان دابین‌و مسۆگەر بکات. نەک جێگرتنەوەی بە بەڵێنی بێکردار لە هەردوولاوە!

١٥-٩-١٣

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

ئەگەر سەرنجی ڕاگەیاندنی لیژنەی هەڵبژاردنی یەکگرتووی ئیسلامی بدەین، بەتایبەتی ئەم دەربڕینەی؛ (ڕاگەیاندنی لیژنەی هەڵبژاردنی‌ پارێزگای سلێمانی یه‌كگرتوی‌ ئیسلامی‌ كوردستان وه‌ڵامی‌ لێدوانه‌كانی‌ عه‌تا سه‌راوی ئه‌ندامی ئه‌نجومه‌نی ناوه‌ندی یه‌كێتی ده‌داته‌وه‌و ده‌ڵێت، "بانگەشەكەی دەچێتە ژێر حوكمەكانی یاسای تیرۆری هەرێمی كوردستان‌و عێراقەوە‌و حەقوایە داواكاری گشتی بێتە دەنگ".) چیمان بۆ دەرئەکەوێت!؟ پێئەچێت ئەم لێدوانانەی سەراوی یەکگرتووی ئیسلامیی لە خەوێکی خۆش ڕاچڵەکاندبێت! بۆیە بە نیشاندانی لوتف‌و ماریفەتێکی میانڕەوییانەوە بەرامبەر بە قسەکانی عەتا سەراوی بەنیازە، یەکەم، شۆکبوونی خۆی بشارێتەوە، دووهەمیش، ڕوخساری دزێوی دیموکراسی‌و ئەم هەڵبژاردنە گاڵتەجاڕەمان بڕێک بۆ سپی تر کاتەوە!! قەل بە قەل ئەڵێ، ڕووڕەش!! یەکگرتووی ئیسلامی، خۆی لە داوێنی بەرەی تیرۆریزمی ئیسلامییەوە پەیدابووە، ئێستا ئەبینین هانا بۆ یاساو ڕێسای دژە تیرۆر ئەبات سەبارەت بە لێدوانە نیمچە ڕەسمییەکانی عەتا سەراوی، دەربارەی ڕادەستنەکردنی دەسەڵات بە شێوەی دیموکراسییانە لە لایەن یەکێتییەوە.بەڵام واقععیەت ئەوەیە، عەتا سەراوی ڕاستییەکەی ووتووە سەبارەت بەم گاڵتەجاڕەی ناوی لێ نراوە هەڵبژاردن.پێناچیت ئەم لێدوانانەی سەراوی بە تەنیا ڕای خۆشی بێت! چونکە لە بنەڕەتەوە هەڵبژاردن کەڕنەڤاڵی چەواشەکاریی ئەو حزبانەیە کە بە زەبری تیرۆرو چەک‌و میلیشیا چەند هەزار فیرعەونیان بەسەر سامان‌و دەسەڵاتی کوردستانەوە پێگەیاندووەو خۆیان کردۆتە لۆمپنی دەسەڵاتبەدەست‌و هەمەکارە لە کوردستان.ببڕو بکوژ هەر خۆیانن!

ئێمە کۆمۆنیستەکان، ڕاشکاوانە ڕامانگەیاندووە، کە لەژێر سایەی ئەحزابی میلیشییایی‌و چەند حزبێکی مافیایی خاوەن کۆمپانیای بازرگانی کردن بەسەر سیاسەتەوە، هەڵبژاردن مانای نییە! لێدوانەکانی عەتا سەراوی بەڵگەو پاڵپشتییەکی واقعی ئەم حوکمەی ئێمەیە سەبارەت بە هەڵبژاردن.سەراوی زۆر ڕاشکاوانە ئەڵێ، لێدوانەکانی ئەو ڕای سەرکردایەتی یەکێتی نیشتمانیشە.لە کوردستانێکدا دوو حزبی دوو بنەماڵە کۆنتڕۆڵی هەموو شتێکیان لەژێر دەستدا بێت، میلیشیای سەدان هەزارییان ڕاگرتبێت، شەڕی براکوژییان ئەنجامدابێت، بێ سڵەمینەوە دەستیان تێکەڵ کردبێت لەگەڵ دوژمنانی کوردستانداو سوپای دەوڵەتانیان هێنابێتە سەر سەری خەڵکی کوردستان، بۆ شکستپێهێنانی بەرامبەر، هەمووشی لەپێناو دەسەڵات‌و ئەم پێگەیەی ئێستایاندا بووبێت، چۆن لە هەڵبژاردنێکی گاڵتەجاڕی وەهادا کە هەر هەموو بەشداربووانی، ڕۆژی سەد جار تانەو تەشەری لێئەدەن‌و باسی تەزویرو ساختەکاری کردن ئەکەن تیایدا، دەسەڵاتی سیاسی بە شێوەی دیموکراسی‌و ئاشتیانە دەستاو دەستی پێئەکرێت!؟ ئەوە سەرێکی قەرزکراوە ئەگەر ئەم خۆشباوەڕییەی لێ بووبێتە ڕاستیی!

کەسانێک کە لە ناو ئۆپۆزیسیۆن یان یەکگرتووی ئیسلامییەوە، دڵی خۆیان بەم هەڵبژاردنە خۆشکردبوو، بە لێدوانەکانی سەراوی تووشی شۆک هاتوون‌و سەریان داویەتی بە دیواری حەقیقەتدا.لەوەش گرنگتر، فەزای زاڵی خۆشباوەڕیی بەم هەڵبژاردنەی بە تەواوی هەژاندووە.

دەرئەنجامێکی واقعی کە هەر ئینسانێکی ووریاو بە ئینساف ئەتوانێت لەم ماجەرایەو لەم هەڵبژاردنە‌، وە لە بانگەشە چەواشەکارییەکانی هەموو لایەنەکانی بەشدارەوە بەدەستیبێنێت، نە چاکسازی‌و بە دامەزراوەیی کردنە، نە شەریک کردنی هاوڵاتیانە لە داهات‌و سامانی ووڵاتدا، نە دژایەتی کردنی گەندەڵییە، نە دەستاو دەست کردنی دەسەلاتی سیاسییەو نە هیچ شتێکی ترە، ئەگەر سەرنجی بانگەشەکان بدەین، بە ڕوونی دیارە کە چ کەرەسەیەکی شەڕێکی تەبلیغاتی تەواو بۆ بەرپابوونی جەنگ‌و ئاشوبێکی دیکەی نێوان ئەم حزبانە لەسەر چۆنێتی دابەشکردنی سامان‌و داهات‌و دەسەڵاتی کوردستان سازو ئامادە کراوە!؟ پارتی ئەڵێ؛ ئێمە براوەین.یەکێتی هەروا، وە ئۆپۆزیسیۆن هەروا.باشە ڕاگەیاندنی ئەم نەتیجانە هەر لە ئێستاوە چ واتایەکی تری هەیە، جگە لەمەی کە هەموویان ئەبێت بیبەنەوە، دەنا ئەیقەومێنن! عەتا سەراوی وەکو کەسێکی سەربازی ئەم ڕاستییەی بێ ڕەتووش ووتووە.لەم نێوەدا خەڵک‌و دەنگی هاوڵاتیان کراوەتە کایەی دەستیان‌و لەنێو ئەم کایەو قومارە پارلەمانییەدا وەکو کارتی گوشار بەکاریان دێنن.سبەی کاتێک هەراکە نیشتەوە، ئەگەر هەموو لا ڕازی نەبوون بە دەرئەنجام، جگە لە جەنگ، چی شتێکی تر جێگای ئەم گاڵتەجاڕە ئەگرێتەوە بۆ یەکاڵا کردنەوەی دەسەڵات!؟

بەڵام ئەمە هەموو شانۆییەکە نییە.خەڵکی کوردستان ڕۆڵی سەرەکی‌و گرنگ‌و یەکاڵاکەرەوە ئەنوێنن لەم یارییەدا.ئەم خەڵکە لەپێناو ئێستاو ئاییندەی خۆیان‌و نەوەکانیاندا، نابێت ئەم چەواشەکاریانە بەرچاویان بگرێت.ئەم حزبانە هەڵبژاردن ناکەن، بەڵکو تەنیا لەم هەڵبژاردنەدا پەنجەمۆری ئەوانیان پیویستە.پاشان خۆیان هەموو بڕیارێک ئەدەن بێ گەڕانەوە بۆ ڕای ئێوە.بۆ ئەوەی ئەم شەرعییەتە لە ئێوە وەرنەگیرێت، پێویستە ئەم هەڵبژاردنە بایکۆت بکەن.بەشداری تیا مەکەن.لە ماڵ مەچنە دەرەوەو گوێ بە بانگەشەکانیان مەدەن.بەم کارەشتان هەر لە ئێستاوە بەر بە جەنگی دابەشکردنی دەسەلاتی ئەوان ئەگرن، وەک چۆن عەتا سەراوی ڕایگەیاندووە.ئێوە خەڵکی کوردستان عززەتی نەفسی خۆتان‌ بەرز ڕاگرن، کەرامەتی هاوڵاتییبوونی خۆتان مەسپێرن بە بانگەشەی هەرزانبەهای ئەم کۆمەڵە حزبە بەشدارەی هەڵبژاردن‌و بەشداری ئەم گاڵتەجاڕەیان مەکەن! بایکۆتی هەڵبژاردن بکەن‌و بەم کارەشتان هەم چەواشەکارییەکان ئەڕەوێننەوە، هەم بەرئەگرن بە بەرپابونی شەڕێکی دیکە!

٣ئەیلوول١٣

ئەمستردام

This email address is being protected from spambots. You need JavaScript enabled to view it.

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

لەژێر گوشاری ڕای گشتی جیهان‌و بزووتنەوەی دژی جەنگدا، لەلایەک، لەولای تریشەوە، بەهۆی ناکۆکی هاوپەیمانەکانییەوە لەگەڵ سیاسەتی وەشاندنی گورزی سەربازی- سنووردار یان بێسنوور- دژی گوایا ڕژێمی ئەسەد، سەرۆکی ناشەڕەنگێزی ئەمریکا، ئەم ڕۆژانە ئازایەتیی ئەوەی تێدا بەدیناکرێ وەکو جۆرج دەبلیو بوشی هاوڕێی، دیوە شەڕەنگێزییەکەی نیشانی جیهان بدات سەبارەت بە بەرپاکردنی جەنگێکی کۆنەپەرستانە لە سوریاو ناتوانێت بڕیاری جەنگ دەربکات!

هەڵوێستی دوودڵ‌و لەرزۆکی (متردد) ئۆباما لەو درۆ شاخدارەوە سەرچاوەی نەگرتووە، کە هێشتا بەتەوای ڕوون بووبێتەوە یان نا کە ڕژێمی سوریا چەکی کیمیایی بەکارهێنابێت، بەڵکو لەو شوێنەوەیە کە خەڵکی جیهان، وە خەڵکی ئەمریکا لە پێشیانەوە تەحەمولی جەنگێکی تری ئەمریکا ناکەن لە چەشنی ئەوەی عێراق، ئەم هەڵوێستەی ئۆباما پاشەکشەیە لەبەردەم هەڵوێستی دژی جەنگی خەڵکی جیهاندا. وە هاوکێشەی سیاسەتی جیهانیش بە ئاقاری دژی ئەمریکادا گۆڕانی بەسەردا هاتووە.

مەنسور حکمەت لە دژی جەنگی ئەمریکا لە عێراق ووتی: تەنیا ویژدان‌و کاردانەوەی جیهانیی شارستانی ئەتوانێت بەر بە جەنگی ئەمریکا بگرێت لە عێراق! بە داخەوە ئەوسا سیاسەتی جیهان‌و ڕیزبەندیی هێزەکان جۆرێکی دیکە بوو، بزووتنەوەی دژی شەڕیش لە ئاستێکی دیکەدا بوو، بۆیە نەیتوانی بەر بەو جەنگە بگرێت. بەڵام ئەمجارە، جیهانی شارستانی بە کردەوە لەنێو پارلەمانی بەریتانیاو لەنێو کۆنگرێسی ئەمریکادا ئامادەگیی هەیەو پەنجە ئەکات بە چاوی ئۆباماش‌و بوشی کۆنە حەریفیشیدا بەرامبەر بە بڕیاری بەرپاکردنی ئەم جەنگە!! ئەمە خۆی سەرکەوتنێکی بەرچاوی جیهانی شارستانییە بەسەر دەوڵەتێکی ملهوڕی چەشنی ئەمریکادا. من خۆم ڕام وایە ئەمریکا زەحمەتە بتوانێت جەنگێکی چەشنی عێراق بەرپا بکات. بەڵام ڕەنگە بۆ پاساودانی هەڵوێستەکانی خۆی موشەکبارانێک ئەنجامدات!

١ئەیلوول١٣

ئەمستردام

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.