رۆژانە ئەو گۆتەیە ''خۆم و گشت منداڵەکانمی وە قوربان دەکەم''!!! لە نێو کوردان دووبارە و چەندبارە دەکرێتەوە، ئەگەر یەک قیچ لە رووی دەروونیی و جڤاکییەوە لەو گۆتەیە هوورد ببینەوە ئەوە دەردەکەوی کە یەک فەرهەنگی فرە پاشداما مێشک و هۆشمەندیی تاکی کوردی داغان و داگیر کردییە و میللەتەکی یەکجار ناشارستانیی و دوور لە ژیانی پێشڤەڕۆیانەی سەردەممان هەیە.
کێشەکە نە لە خۆ وە قوربانکردنەکەیە نە لەوەیە کە خۆ وە قوربانی چ و کێ دەکرێ. . چونکە دەکرێ مرۆڤ هەر یەکەو وە پێی ئاست و پێگەیشتن و جۆری هۆشیارییەکەی تشتەک یان کەسەک لە کنی شایەنی ئەوە بی خۆی لە پێناودا وە قوربان بکا کە لە زۆربەی بارەکاندا خودپەرستیی و توندڕەویی نەرێنیی و تاکبینیی و بیروباوەڕە نەگۆڕ و بەستەڵکەکان هاندەرن و زۆر وە دەگمەن وەک رەفتارەکی گۆڕانخوازانە و شۆڕشگێڕانە وە قازانجی مرۆپەروەریی و پێشکەتن و گەشانەوەی مرۆڤ چ وەک تاک چ وەک جڤاکیی تەواو دەبی. . بەڵکە کێشەکە لەوە دایە کە تاکی کورد کتومت وەک ئەوەی کە خاوەنی تشتەکی مادییە - وەک زەوەی، خانیی، ترومبێل، یان هەر سامانەکی دیکە وە شێوەی پارە یان هەر کەلوپەلەک - وە هەمان جۆر و شێوە و شێواز خۆی وە خاوەنی ئەو منداڵە دادەنێ کە لەوەوە پەیدا بووە و زۆر نامرۆییانە ماف وە خۆی دەدا منداڵەکەشی بکاتە قوربانی ئەو تشت یان ئەو کەسەی کە خۆی وە قوربانی دەکا یان زۆر جار وە هۆی تەمەن یان هێندەک پێگەی کەسیی و جڤاکیی خۆی تەنێ منداڵەکەی وە شایەنی ئەو وە قوربانکردنە دەزانی و خۆی لێ دەرباز دەکا!
لە هەمووشی نەرێنییتر لەو بارەوە ئەوەیە کە کاتەک ئەو کەسە منداڵەکانی وە قوربانی سەرکردەیەک یان پیاوەکی دینیی دەکا - کە هەرە چاکەکانیان هێندەی زیان وە مرۆڤەکان دەگەیەنن هێندە سوودیان پێ ناگەیەنن - لێ لەوەش نەرێنییتر هەیە ئەویش ئەوەیە کە منداڵەکەی وە قوربانی دینەک و خودایەک دەکا - کە گوایە بڕوای پێیان هەیە جا وە راستییە یان هەر وە قەستییە و لە پێناو هێندەک لە بەرژەوەندییە خودپەرستییەکانی ئەوها خۆی نمایش دەکا - ئەوە لە کاتەکدا ئەگەر دین یان خودا یەک قیچ راستییان تێدا هەبی ئەوە بێ گومان هیچ پێویستیان بەوە نابی هیچ کەسەک لە پێناویاندا بکرێتە قوربانیی وە تایبەتییش منداڵ کە هەرگیز ناکرێ و ناشێ هیچ کەسەک خۆی وە خاوەنی بزانی و وەک کەلوپەلەک لێی بڕاوانی و وەکاری ببا.
ئەو هۆشمەندییە نامرۆیی و ناشارستانییەی کوردان - تێکڕای کوردان وە خۆشمەوە* - هەر تەنێ لە منداڵ وە موڵک زانین وەک کەلوپەلەک و منداڵ وە قوربانکردن و وەستانەوە دژ وە ماف و ئازادییەکانی مرۆڤان راناوەستی بەڵکە وەک دوژمنەکی سەرسەخت و قین لە دڵ هێرش دەکاتە سەر تێکڕای گیانەلەبەران و رووەکان و تەنانەت خاک و خٶڵ ئاو و هەوا و سەرلەبەری سروشتیش؛ تاکی کورد بێجگە لەوەی رۆژانە وە گفتار هێرش دەکاتە سەر ئاژەڵان کە لە لایەک هەرچی رەوشت و هەڵسوکەوتی نەرێنیی و ناشیرینی مرۆڤ هەیە دەخاتە پاڵیان و لە لایەکی دیکەشەوە کەسە ناحەزەکانی بەرانبەر خۆی بەو ئاژەڵانە دەچووێنی کە ناو و ناتۆەرەی نابەجێ و ناڕەوای لێنانە و وە رەوشتی خراپ پێناسەیان دەکا: وەک (سەگی سەگباب! لە پشیلە بێ نمەک ترە! لە گێدرێژ کەرترە! شەمشەمەکۆرە تاریکپەرستەکان! پەپووی وێرانکەر! و چەندی جوونی دیکەی وەک ئاژەڵ، هێستر، بەراز، گۆلک، بزن، مەڕە هێڕە،. . . هتد، لە رەفتاریشدا وە ئارەزووی خۆپەرستانەی خۆی لەنێویان دەبا و وەکاریندەهێنی و ئازار و ئەشکەنجەیان دەدا، وە سەدان جار وە چاوی خۆم دیتیتم وە بێ ئەوەی هیچ پێویستییەکی هەبی تەنێ لە پێناو حەز و چێژوەرگرتنی نەخۆشانەی خۆی تا رادەی کوشتن لە سە و پشیلە و ئاژەڵانی دیکەی دایە، وە بێ هیچ پەنگانەوەیەک گیا و گوڵ و گوڵزار دەشێڵی و وە تەنیشت هەر درەختەک دابچی چرۆیەکی ناسک یان لکەکی لێ دەقرتێنی، وە بێ ئەوەی هیچ پێویستییەکی هەبی ئاگر لە پوشوپەڵاش و دارستانەکان بەردەدا و کانی و رووبار و دەریایەکان پیس دەکا و زبڵ و پیسایی لە دەشت و دەر دەڕێژی، وە کورتییەکەی هەرچی جوانیی و باشیی و سوودمەندیی ئاژەڵ و رووەک و سروشت هەن ناشیرینیان دەکەین و وە خراپ دێنە بەرچاوانانمان و تێکیان دەدەین و وە پێی پێویست سوودیان لێ نابینین و لەنێویان دەبەین!
ئەو هەڵسوکەوت و رەوشت و رەفتارە نەرێنیی و دزێوانەمان هەر لەو گۆڕە پەیدا نەبوونە بەڵکە مێژووەکی دوور و درێژە لەگەڵمانن، دیارە بێجگە لە هۆکارەکانی وەک ژینگەی جوگرافیای رامیاریی و کاریگەریی داگیرکاریی و جۆر و شێوەی دین و ئەفسانە و دابونەریت و پیاوسالاریی نێو میللەتەکەمان هۆکاریی سەرەکیی ئەوەیە کە تا ئێستا دەسەڵاتی کوردی - کەسانی سیاسیی و رۆشنبیریی - لە کۆن و نویدا جا وەهێز و مەزن بووبی یان چووک و لاواز هەردەم لە هەردوو رووی بەرخۆدان و فەرهەنگییدا لە پاش میللەت بوونە و هیچ نەخشە و پلانەکی ئەوتۆیان نەبووە کە بتوانن وە گوێرەی توانستەکانی میللەت پێشڕەویی بکەن، لەبەرئەوە ئێمە پێش هەر تشتەک پێویستمان وە شۆڕشەکی رۆشنبیریی هەیە کە وە پشتبەستن وە زانست و هزر و فەلسەفەی پێشڤەڕۆیانەی گەلان پەیکەری گشتیی کەونەپارێزانەی دین و دابونەریت و پیاوسالاریی و هەرچی پێی دەگوترێ فەرهەنگی کوردی هەڵبوەشێنینەوە و وەک میللەتان وە ژیان و گوزەرانی سەردەمییانە پەیوەیست ببین.
___________________________________
* کە دەبێژم (تێکڕای کوردان وە خۆشمەوە) واتە هەموومان وە تایبەتییش سیاسیی و رۆشنبیرەکانمان ئەوهاین، لێ کە ئەمن و کەسانەکی دیکە لەمێژە هزر و فەلسەفەی یەکسانییخوازییمان وەک گفتار و رەفتار وەرگرتییە هەمیشە لە کۆشش داین خۆمان و میللەتەکەمان لەو رەوشت و هەڵسوکەتە نەرێنییانەی ئاماژەمان پێ دان پاک بکەینەوە، ئومێدەوارم هەڵە بم لەو تێڕامانەم لە مرۆڤی کورد، لێ ئەفسووس ئەو تێڕوانینەم لە کن دروست بووە، کە ئەوەش تێڕوانینمە زۆر راستتر و چاکترە دەریببڕم نەک وەک خۆوەزۆرزانەکی گەمژە بکەومە ستیاشی میللەتەکەم و پتر سەرگەردانی بکەم!
dxunce@yahoo. co. uk
وە پێی ئەو مێژووەی تا نهۆ کە وە شێوەیەکی پوخت ساغ بوویتەوە. . دین جیهانبینیی زۆربەی زۆری مرۆڤەکانی چاخە دێرینەکان بووە، واتە سەردەمانەک کە مرۆڤ زانست و زانیارییەکی ئەوتۆی نەبووە تا بکاری هزرمەندانە بەرسڤی پرسیارە فەلسەفییەکان بداتەوە پەنای بردیتە بەر ئەندێشە و لەسەر ئەفسوون ئەسپی خۆی تاو دایە. . سەرەنجام وە ناچاریی دینی وەک فەلسەفە ئافەریدە کردییە و (بەنگ - حەشیش) ئاسا خۆی پێ سەرمەست کردییە.