دەمێکە کەڵکەڵەی سوپاسنامەیەکم بۆ ئەوەی ئاراستەی جەنابتانی بکەم، چی لە تۆ شاراوە بێت ؟ لە ترسی ئەم خەڵکە بێ ویژدانەی لای خۆمان نەمدەوێرا و دەترسام تۆمەتم بۆ هەڵبەستن و وا بزانن پشکم هەیە لەو چۆڕە نەوت و غازەی ئێوە بە کولەمەرگی بەڕێوەی دەبەن .
بە هەر حاڵ کە دەڵێم خەڵک بێ ویژدانە ڕەنگە هەندێک دۆست و ئەحباب لۆمەم بکەن و وا بزانن ١٨٠ پلە بام داوەتەوە و بە دژە سەنگەری گەل وەسفم بکەن، نەخێر قوربان مەسەلەکە لەوەدا نیە، بەڵکو دەمەوێ ئەوە وەبیر خەڵک بهێنمەوە ئەگەر ناهەقی نەکەن، ئەوا دەبێ هەموو بە یەک دەنگ هوتافی ( ئاشتی هەورامی، تۆ دیدە و گلارامی ) بکێشن و بڵێن : ( کێتان دەوێ کوردەکان، وەزیری سامانە سروشتییەکان ) . چونکە تۆ :
١ - دۆمەڵان
٢ - قارچک
٣ - ڕێواس
٤ - کاردو
٥ - بەڕەزا
٦ - کنگر
٧ - لووش
٨ - قوڕادە
٩ - پەڵپینە
١٠- گۆیژ
١١- مەندێ
١٢- کوزەڵە
١٣- هۆزەلاو
١٤- تۆڵەکە
١٥- ئاڵەکۆک
١٦- بەڕوو
١٧- مازوو
١٨- قەزوان
١٩- چاوبازە
٢٠- ترشۆکە . . . زۆری تریش
کە ئەمانە دوا بە یەکی سامانی سروشتین ؟ لە سایەی سەخاوەت و فەخامەتی بەڕێزتانە کە هەر هەمووی فری و خۆڕایی کراوە کەچی ئەو خەڵکە هیچی لەبەر چاو نیە و لە هیچ و خۆڕا قسە و قسەلۆک دەکەن، ئێوە تەنها بە نەوت و غازەکە ڕازین و ئەوانیش هێندە بەدنمەکن باسی ئەو هەموو گژ و گیایە ناکەن کە تۆ دەستیانت بۆ بە کار بردنیان واڵا کردووە، بێ شەرمانە بە ڕۆژ لە ( جادە، کوچە، کۆڵان، چاخانە، چێشتجانە، لە بازاڕ و ڕۆژنامە و ڕادیۆ و تەلەفزیۆن ) ەکانەوە و بە شەویش بەدەم خەوەوە دەڵێی نەوتفرۆشەکانی جارانن هەر بانگ دەکەن : ( نەوت، نەوت ! )، سەیرە ئەم خەڵکە چاو و ڕوویان نیە ! نازانم بۆچی بۆ ئەو هەموو سامانە سروشتییەی بە خۆڕایی خراوەتە بەردەستیان شوکرانەت ناکەن و نمەک نایان گرێ و بۆ دوو بەرمیل نەوت و دوو بوتڵە غازی حیز کە تۆ بۆ پارتی و یەکێتی دەیفرۆشیت ئاوها چاویان چووە ؟ بە مەرجێک ئەو دوو حزبە یان جوانترە بڵێین : ( ئەو دوو بنەماڵە ) قوڕبەسەرە نیو بە نیو لە نێوان خۆیاندا وەکو دوو برا حەپەلووشی دەکەن، هەرچەندە نازانم زەکات و سەرفترەی بۆ کەسانی وەکو ئێوەومانانی لێ دەردەکەن یان نا ؟ ! ئەگەر بەشی ئێوەی لێ بدەن و پشکی کۆمپانیا بیانیەکان بدەنە لاوە و خوا دوایان بڕێ خۆشیان ڕەوەیەک مەکتەبی سیاسی و سەرکردایەتی و ئەنجومەن و مەنجومەنیان بە دواوەیە و دیوەخانانەی ئەنفالچییەکانیش لەولاوە بوەستێ، ئیتر دەبێ چییان بۆ بمێنێتەوە ؟ !
دەتوانم دەست بە قوڕئاندا بدەم، بەو پێغەمبەرە نازدارەیش کە قوڕئانی بە خەڵات بۆ هاتۆتە خوارەوە، بە ڕیشی پان و درێژ و کورت و تەنک و قەوارە جیاوازی ئیسلامییە پەپکە خواردووەکانی کوردستان قەسەم، کە بە پارەی نەوتی حەرام دەیانەوێ دەوڵەتی ئیسلامیی کوردستان وەسەر پێ بخەن و شەریعەتی ( وآمر بالمعروف و انهی عن المنکر ) پیادە بکەن و نەوتی مونکەر بۆ خۆیان بە مەعروف دەکەن . بەسەری ئەو سەرکردانەی کە ناتوانن گٶڕان لە خۆیاندا بکەن و دەیانەوێ گۆڕان لە کوردستاندا بکەن ! لەو هەموو نەوتەی جەنابت بۆ مەلایی و جەلالی هەڵیدەهێنجیت، یەک قەترە نەوت لە ماڵەکانیاندا نیە و هەمووی بەسەر ئەملاولادا دابەش دەکەن، بەڵام جگە لە میللەتی ڕەش و ڕووت و قوڕ بەسەر کە خەون بە پارەی نەوتەکەوە دەبینن .
کاکە ئاشتی، دەزانی مەگەر حکومەتی هەرێمی کوردستان لە میللەت بێبەش تر و قوڕ بەسەر تر و داماو تر بێ، سەرباری ئەو هەموو نەوتەی دوژمنان لەبەری حەساونەتەوە، بەم ڕۆژگارە حکومەت و میللەت داڵدەیەک شک نابەن و سایەیەک نیە تیایدا بحەسێنەوە، پێکەوە بە جووتە بە دوای خانووی کرێدا دەگەڕێن !
ئهو بابهتانهی له کوردستان نێت دا بڵاودهکرێنهوه، بیروبۆچوونی خاوهنهکانیانه، کوردستان نێت لێی بهرپرسیار نییه.