دواجار ھاوڕێ و دۆستی خۆشەویستمان، ڕۆڵەیەكی تری كوردەواری، (ھاوڕێ ڕەحیمی), دوای ١٠ مانگ تێپەڕبوون بەسەر راگەیاندنی ئەنجامەكانی ھەڵبژاردنی پەرلەمانی ھۆڵەندا، بوو بە پەرلەمانتار لەسەر لیستی گەورەترین پارتی براوەی ھەڵبژاردن و دەسەڵاتدار بۆ چوار ساڵی داھاتوو. ناوبراو، ڕۆژی سێشەمە ١٨/١/٢٠٢٢ لە مەراسیمێكی فەرمیدا، لەبەردەم سەرۆك و ئەندامانی پەرلەمان، سوێندی یاسایی دەخوات و دست بەكار دەبێت.
ھاوڕێ ڕەحیمی لە دایكبووی شاری سەردەشتی ڕۆژھەڵاتی كوردستانە و لەگەڵ خێزانەكەی ماوەیەك لە شاری سلێمانی ژیاوە.
زانیاری زیاتر ...
**ناو: هاوڕێ ڕەحیمی**
تەمەن: ٤٣ ساڵ
باری خێزانی: خێزاندار و خاوەن دوو منداڵە
خانەوادە: كوڕی تێكۆشەری دێرین عەلی ڕەحیمییە
ئاستی خوێندن: دەرچووی زانكۆی ئەمستەردام
پسپۆری: ئای تی
پارت: پارتی گەل بۆ ئازادی و دیموکراسی.
ژمارەی ڕیزبەندی لە لیستی كاندیدەكان: ٤٤
چۆن دوای ١٠ مانگ بوو بە پەرلەمانتار؟
ھۆكارەكە دەگەڕێتەوە بۆ ڕیزبەندییەكەی.
پارتی گەل بۆ ئازادی و دیموکراسی، ٣٤ كورسی بەدەست ھێناوە، ھاوڕێ ڕەحیمیش لە ڕیزبەندی ٤٤ بوو. دوای ئەوەی بەشێكی بەرچاو لە سێ دەیەكەی یەكەم، پەرلەمانییان جێھێشت و چوونە ناو حكومەت و پلەی سەرۆك وەزیران و وەزیر و وەزیری دەوڵەتییان پێسپێردرا، دەرفەتی زێڕین بۆ ھاوڕێ ڕەحیمی ڕەخسا و خەون و ھیوایەكەی ھاتەدی. ھاوڕێ پێشووتر ئەندامی ئەنجومەنی شارەوانی ڤێسپ بوو و ڕێكخراوێكی خێرخوازیشی بەڕێوەدەبرد.
ھاوتای (دیلان یەزیلگۆز) كە لە ئێستادا وەزیری داد و ئاسایشی ھۆڵەندایە و پێشتریش پەرلەمانتار بووە، ھاوڕێ ڕەحیمی دووەم ھاوڵاتی ھۆڵەندی بە ڕەچەڵەك كوردە لەسەر لیستی لیبڕاڵەكان متمانەی پەرلەمانتاری وەردەگرێت.
بەناوی یەكێتی نیشتیمانی كوردستان پیرۆزبایی لێدەكەین و ھیوای سەركەوتنی بۆ دەخوازین. وەك چۆن پێشووتر ھاوكار و پشتیوانی بووین، بۆ داھاتووش ھەروا دەبین.
.......
ئەمستەردام/ ١٧/١/٢٠٢٢
بەختیار بەكر/ نوێنەری یەكێتی لە ھۆڵەندا