نووسه‌ره‌ ناسراوه‌کان

عاقیبەتى ئیجابیەت لەگەڵ مالیکیدا     ...سیروان محمد گەنجانى

رۆژانى پێشوو شاندى کوردى بەخۆ و بەنوسراوى خواست و داواکانى کوردەوە گەیشتنە بەغاى پایتەخت، زنجیرەیەک کۆبونەوەیان لەگەڵ هاوپەیمانى شیعەکان و خودى مالیکیش ئەنجامدا، پاشان وادەیەکیان بە مالیکى داوە بۆ وەڵام دانەوە.

بێگومان هەرلە کۆبونەوەى یەکەمەوەڕا جەخت لەوە کراوەتەوە کۆبوونەوەکان ئیجابى بوون، ئەو دیمەنە پڕ پێکەنین و غەمز و لەمزاویانەى کۆبونەوەکانیش هەر واى دەگەیاند دیدار و بەیەک گەیشتنێکى خۆش و پڕ کەیف و نوکتە بەڕێوە چووە ؛ گەرچى ئەم وشەى ئیجابى یە هەڵگرى واتایەکى مژدەبەخش و گەشبینى یە بەگشتى ؛ بەڵام لە بەر ئەوەى هەمیشە ئایندەیەکى پراکتیکى ئیجابى بەدوادا نەهاتووە، زۆرى بەکارهێنانى ئیجابى بوون رەزاى قورس بووە، بەجۆرێک ئەوکاتانەى بەتایبەتى لە کایە سیاسیەکاندا بەکار دەهێنرێت ئیتر واتە هەویرەکە ئاو زۆر دەکێشێت، بەکارهێنانى واتا کۆڕو کۆبونەوەیەکى پڕ لە موجامەلە، واتە جەلسەیەکى پڕ لە مۆز و شەربەت و کێک..

لە تەمەنى حوکمڕانى ئەو سەرکردە شیعەیەدا بەردەوام ئەمڕۆى لەدوێنێ جیاوازبووە ؛ جیاوازبووە بۆ خستنى نەیارە سیاسیەکانى، بۆ دادگایى کردنى هەر سونبوڵێکى مەزهەبى یان گەورەیەکى نەتەوەیى

مالیکى هەنوکە سەرقاڵى هەڵبژاردنى پارێزگاکانە، ئەو پەڕى کۆششى دروست و ئاشکراو نهێنى خستۆتەگەڕ نەک بۆ بردنەوەیەکى ئاسایى ؛ بەڵکو بۆ بردنەوەیەکى ساحیقى گەورەى وا بەتەواوى و بێ رکابەر دەست بەسەر عێراقدا بگرێت..

بەو پێودانگەى دەسەڵاتى ئەمنى و سەربازى و ئیدارى لە کۆى ئەو پارێزگایانەى هەڵبژاردنى تێدا ئەنجام دەدرێت بەدەست حیزبەکەى مالیکى و سێبەرەکانى مالیکیى یەوەیە پێشبینى بردنەوەى گەورەى بۆ دەکرێت..بردنەوەیەک زیاتر لە حاڵى حازر چنگى لە لەکایەى سیاسى و شادەمارى ئابوورى عێراقى نوێ گیر دەکات..

گەرچى دەسەڵاتى مالیکى و بوونى حیزبەکەى لەم پارچە هەرێمەى لەمەڕ ئێمە دوورە بەڵام گرفتەکە ئەوەیە کاردانەوەى باڵادەستى ئەوان پریشکى بەسەر ئاسمانى ئێمەشدا دەبارێت، تا ئێستا لەکاتێکدا دەسەڵاتى ڕەهاى بەسەر عێراقدا نیە توانیویەتى هەموو عێراق کۆنترۆڵ بکات و پەیتا پەیتا مەشخەڵەتى بەرچاویش ڕوو بەڕووى هەرێمى کوردستان بکاتەوە ؛ رۆژێک بە دروستکردنى ئۆپەراسیۆن و رۆژێک بە کەم کردنەوەى بەشە بودجە و سەدان رۆژ بە جێ بەجێ نەکردنى بەندە دەستووریەکانى تایبەت بە خواستەکانى کوردو...هتد.

لە ٢٠٠٣ وە بەردەوام هەلى گرنگ لەدەست کورد دەرچووە، لەبەرامبەریشدا لایەنە عەرەبیەکان زیاتر خۆراگربوون و زیاتر ووزەو توانایان هاتۆتەبەر؛ لەو بوارەشدا سەرسوڕمانی لەوەدایە هەندێجار بە بەکارهێنانى لایەنە کوردیەکان ئەوان توانیویانە ماڵى خۆیان کۆبکەنەوە یاخود نەیارە مەزەبى و حیزبیەکانیان ببەزێنن...لەوێ رۆژەوە بەردەوام ئێمە مەزەندەى رەقەم و خاڵمان نەکردوەو تەنیا بە زەردەخەنەو کێک و شەربەتەکانیان دڵ ئارام بووین، ئێستاش لە هەڵمەتى هەڵبژاردنیەوە ئایندەى دەسەڵاتى مالیکى لەعێراقى پاش هەڵبژاردنەکاندا تروسکاییەک بۆ ئیجابیەتى راستەقینە ناهێڵێتەوە..

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.