١
رۆژی زمانی دایکە؛
بەکوردی دەگمێنێ - کۆتر
هێشوە وشەی کوردی گرتووە- مێو
پڕن لە وردە چەوی پیت- کانی
جلی کوردی لەبەردایە – گوڵەگەنم.
٢
بۆ فێربوونی زمانی کوردی
خولێکمان بۆ؛
کەروێشک و
کەوو
کۆتر و
گورگ کردەوە؛
تەنیا گورگ؛
فێری زمانەکە نەبوو.
٣
بەرەبەیان
لەرۆژی زمانی دایکدا
خۆر بە کوردی بە پەنجەرەی ماڵەکانی گوت:
بەیانیتان باش.
٤
نێرگز بە زمانی کوردی
نامەیەکی بۆ رێواس نارد؛
درەنگە هەستە،
سەرت لەبن بەفری بنار بێنە دەرێ.
رۆژی زمانی دایکە
٥
لەرۆژی زمانی دایکدا
پیفۆک،
دەفتەرێکی لەسەر ڕانی داناو
بەپیتی کوردی،
بیرەوەریەکانیی دەنوسییەوە.
٦
چۆلەکە چووە سەر دارتێکی کۆڵانەکەمان و
بە منداڵی گەڕەکەکەمانی گوت؛
لەسەر بەرگی کتێبەکانتان بنووسن؛
هەنگوین و شەکرە زمانی کوردی
٧
مێرولە
لە دیوانەکەی حاجی قادرەوە
پیت پیت شیعری؛
(لەکوردی حەز نەکا کوردێ..).
دەگوازێتەوە شارەکەیان.
٨
لەرۆژی زمانی دایکدا
پشیلە ئاڵایەکی سپی بەدەستەوە بوو و
بەزمانی کوردی
بە پۆلە مشکێکی دەگوت:
رۆژی ئاشت بوونەوەیە ئازیزان.
٩
لەناو هەموو دلۆپە بارانێک
پیتێکی کوردی.
گوڵ بوو بەچەپکێک وشەی؛
کەسکو سوور.
١٠
لەرۆژی زمانی دایکدا
با- شەڕی بە باخچە نەفرۆشت و
گوتی:
ئەمرٶ رۆژی پشوودانە.
١١
لەرۆژی زمانی کوردیدا
ڕەنگاڵە
دەنووکی بە بەفر شت
زمانی لەپیت و وشەی بێگانە،
پاککردەوە.
١٢
ڕاوکەرەکان
قەفەسەکانیان شکاند و
کەوەکانیان ئازاد کرد
رۆژی زمانی دایکە
١٣
لەرۆژی زمانی دایکدا
کۆرپەکان
بەناوی کوردی ناو دەنێێن و
بەو ناوانەش دادەچینەوە،
کە کوردی نین.
١٤
لاڵەکان ؛
زمانیان دەکرێتەوە
لەرۆژی زمانی دیکدا
١٥
لەرۆژی زمانی دایکدا
خودا،
رانکۆچۆغەیەکی شینکی کردەبەرو
کڵاشێکی هەورامی کردە پێێ و
بەکوردی
فریشتەکانی خۆی دواند
١٦
لەرۆژی زمانی دایکدا
لقێکی دار هەرمێکە ،
کتیبەکەی ئەمین باڵداری بەدەستەوە بوو؛
(ئەلف و بێی کوردی)
-------------------------
سەرچاوە: کتێبی ؛ لەگەڕەکی باڵندانە ماڵەکەم.