ئەم دەستەواژەیە ھەمووان گوێیان لێبووە، وەک پەندێکی باویشی لێھاتووە بۆ جیاکردنەوەی کەس و ناکەس لەیەکتر. کاتێک بە کەسێک دەگوترێت فڵان کەس کوڕی عایلەیە، راستەوخۆ ئاماژەیەکت دەداتێ کە کەسێکی باشە و پێی ئارام دەبیت.
ئەوەی کوڕی عایلە لەوانی تر جیادەکاتەوە کۆمەڵێک پێوەرن، کە ئەو پێوەرانە دروست ناکرێن بە کەسی تر و دەبێت کەسەکە ھەڵگری ئەو بنەمایانەبێت و ریشەیەکی بۆماوەیی کۆمەڵایەتی و خێزانیشی ھەیە.
ئەوانەی کوڕی عایلەن، خێزان و پاشخانی کۆمەڵایەتییان ھەمیشە مەدەنییە، واتە لەسەر بنەمای تێگەیشتن و عەقڵ گەورەکراون و فێرکراون، نەک بە ھەڕەمەکی.
ھەمیشە رەچەڵەکییان دیارە و بەلای کەمەوە ٧ پشتییان ناسراوە و دەچنەوە سەر خێزانێکی ناسراو لە رووی کۆمەڵایەتی و سیاسی و ئابووری و فەرھەنگی و ھوونەرییەوە.
ھەڵسوکەوت و شێوازی جل و بەرگ و ئاخاوتنییان جیاوازە لە خەڵکی ئاسایی و گرنگی بە خۆیان دەدەن و چاولێکەرنین. ناو و ناوبانگ و پێگەی کۆمەڵایەتییان دەپارێزن و وەک پاسەوانی رابردووی باوک و باپیرانییان مامەڵە دەکەن، بەڵام کۆنەپەرستنین.
خاوەنی گوفتاری خۆیانن و پیاوی بڕیارن و کوڕی تەنگانەن، بەڵام ناگلێن بە کێشەی کەسانێکەوە کە لە ئاستی ئەواندا نەبێت.
بڕوایان بە پۆڵێنی چینایەتی ھەیە لەسەر بنەمای رۆشنبیری و فەرھەنگی و ناوبانگ و ئەزموونی پێشینانییان، نەک تەنھا لایەنی دارایی. ھەمیشە ھەنگاوێک لە پێش خەڵکی ئاساییەوەن و قۆناغێک لە پێشترن لە بیرکردنەوەدا، چونکە راھێنراون کە ئایندەبینبن.
بواری رۆشنبیری و کەشی روناکبیری ئاوێتەی ژیانی خۆیان و بنەماڵەکانییانە و بەشێکی گرنگی یادگارییەکانییان بریتییە لەو جۆرە کۆبونەوە خێزانییانە.
گەورە و بچوک و نان و نمەک رێزگیراوە لایان و بەڵێن ناشکێنن، چونکە کەسایەتی خۆیانییان خۆشدەوێت.
بە کورتی کوڕی عایلە ئەوانەن کە خاوەنی ئامانجن لە ژیانداو بڕوایان بە شتێک ھەیە کە لەسەری بژین و گەشە بکەن و خاوەن مەبدەئن، جا ھەرچیبێت.
---
ھەمان پێوەر بۆ کچی عایلەش راستە.