ئەو رۆژانە وەك چۆن هەموومان لەنزیكەوە شاهیدی رووداوە گەرمەكانی رۆژهەڵاتی ناوەڕاست و رووخانی سیستەمە دیكتاتۆرەكانی وەك تونس و میسر و ئێستاش لیبیاین، هاوكات لەگەڵ گەرمی داخوازییەكانی شەقامی عەرەبی بۆ رووخان و گۆڕانكاری لەپێكهاتەی ئەو سیستەمە ئۆتۆكرات و نادیموكراتیكانەدا كە لەهەموو روویەكەوە ژیان و سەرچاوەكانی داهاتی هاوڵاتییان مۆنۆپۆڵكردوە، رۆژ بەرۆژ زیاتر دەبی و ئاستی خواستی جەماوەری ئەو وڵاتانەش بۆ فەراهەمكردنی ئازادی و عەداڵەتی كۆمەڵایەتی و گۆڕان بۆ دروستكردنی سیستەمێكی تەندروستی دیموكراسی و خۆشگوزەرانی لە وڵاتانی عەرەبیدا بە خێرایی پێش دەكەوێ، لەگەڵ ئەوەشدا ئێمە لەهەرێمی كوردستانیش لەو ماوەیەدا شاهیدی كۆمەڵێك رووداوی هاوشێوەی ئەو وڵاتانە بووینەوە، دیارە ئاشكرایە كە ئێمە ناتوانین رەوشی ئەمڕۆی هەرێمی كوردستان لەگەڵ ئاستی رووداوەكانی شەقامی عەرەبی بەراورد بكەین، بەپێچەوانەی ئەوەی كە ئێستا لەهەرێمی كوردستاندا ئۆپۆزسیۆن بە هەموو شێوەیەك هەوڵدەدا كە بەراوردی ئەم رووداوانەی ناوخۆی كوردستان و ئاستی ناڕەزایەتی و خواستی جەماوەری كوردستان بكات، لەگەڵ ئەو رەوشە ئالۆزەی كە هەیە لەشەقامی وڵاتە عەرەبیەكاندا، كۆمەڵێك كەموكوڕی و گلەیی هاوڵاتیانی هەرێمی كوردستان كە پەیوەندی بەژیان و گوزەرانی خەڵك و خزمەتگوزارییەكانەوە هەیە، بەراورد ناكرێ لەگەڵ ئەوەی كە روویداوە لە وڵاتانی عەرەبیدا، دیارە بە دیوێكی دیكەدا بەكارهێنانی ئەو تەوژمە لە ناڕەزایەتییەكانی شەقامی عەرەبی لەلایەن میدیاكانی هێزی ئۆپۆزسیۆن رۆژانە دەرخەری ئەو راستیەن.
بەڵام ئایا دەكرێ ئەوەی كە لەشەقامی عەرەبیدا هەیە و لەپێكهاتەی ئەو وڵاتە نادیموكراتیانەی عەرەبیدا هەیە، لەگەڵ پێكهاتەی حكومەتی هەرێمی كوردستان بەراورد بكری؟ لەگەڵ ئەوەی كە كوردستان تازە لەقۆناغی گواستنەوە و ئەزموونكردنی دیموكراسی و هەنگاو بەرەو دروستكردنی حكومەتێكی موئەسەساتی و سەقامگیری و ئاسایش دایە، لەلایەكی دیكە كۆمەڵێك كێشەی سەرەكی حكومەتی هەرێمی كوردستان لەگەڵ حكومەتی ناوەندی بەغدا و مەسەلەی ناوچەدابڕاوەكان بەتایبەتی كەركووك، كە دەبێ بە هەموو لایەنەكان كار بۆ چارەسەركردن و گەڕانەوەی ناسنامەی كوردستانیبوونی بكەن.
دیارە خۆپێشاندان و ناڕەزایەتی دەربڕینی هاوڵاتیان یەكێك لە پێوەرەكانی دیموكراسیە و خۆپیشاندان و رێپێوان بۆ خستنەڕووی داواكارییەكان مافێكی دەستوری و دیموكراسی هەموو هاوڵاتیانە لەچوارچێوەی ئازادییە دەستەبەركراوەكاندا، بەو جۆرەی لەسنوری یاسا و رێساكان دەرنەچێت و كاری توندوتیژی و زیانگەیاندن بە ئابووریی خەڵكی لێنەكەوێتەوە، گەیاندنی خواست و پێداویستییەكانی هاوڵاتیان بۆ بەردەم بەرپرسانی هەرێم و پەرلەمان مافێكی سەرەتایی هەموو تاكێكی كۆمەڵگایە، بەڵام ئەوەی كە ئێستا روودەدات بەكارهێنانی ئەو مافەیە لەلایەن هێزی ئۆپۆزسیۆنەوە بۆ مەرامە سیاسیەكانی خۆی، كەموكوڕی و گلەیی هاوڵاتیان لەنەبوونی خزمەتگوزاری و عەدالەتی كۆمەڵایەتی و دیاردەی گەندەڵی لەناو دامودەزگاكانی حكومەتدا وەك یەكێك لەماتریاڵە هەرە زیندوەكانە بۆئەوەی ئۆپۆزسیۆن بەهێز بكات، ئەوەش دیاردەیەكی زۆر ئاساییە كە لەزۆربەی وڵاتە دیموكراتیكەكاندا بوونی هەیە و ئەوی ئۆپۆزیسیۆن بەهێز دەكات و زیندووی دەكاتەوە، بوونی كەموكوڕی و گەندەڵی ناو دەسەڵاتی سیاسیە، ئۆپۆزسیۆن هەمیشە كار لەسەر ماتریاڵەكانی كەموكوڕی و گەندەڵی و ناشەفافیەت دەكات، بەڵام لەكوردستان ئەوەی كە هەیە و دەكرێ زیاتر لەرۆڵی چاودێریكردنی ئۆپۆزسیۆن بەسەر دەسەڵاتەوە بۆ چارەسەركردنی كەموكوڕی و گرفتەكان، قوڵتركردن و دروستكردن و ئاڵۆزتركردنی زیاتری رەوشەكەیە، بۆیە هێزی ئۆپۆزسیۆن لەبری ئەوەی كە رۆڵی راستەقینەی خۆی بگێڕی بۆ چاودێریكردن بەسەر دەسەڵاتەوە بەدوای ئینتقامی سیاسیدا دەگەڕێ و بۆتە بەشێكی ئەساسی لەئافراندنی كێشە و گرفتەكانی ئەمڕۆی كوردستان بەگشتی.لەبری هەڵگری گوتاری دروستكردن، هەڵگری گوتاری وێرانكردن و رووخانی ئەوەی كە هەشە و چەندین ساڵە هەوڵ بۆ دروستكردنی دەدرێ، ئایا هەڵوەشاندنەوەی حكومەت و پەرلەمان كە ئێستا بۆتە ئەجندای سەرەكی داخوازییەكانی هێزی ئۆپۆزسیۆن دەتوانێ چارەسەری ئەو كێشە و گرفتانە بكات، كە بۆ خۆیان رەخنەی رووبەڕوو دەكەنەوە؟ ئایا ئاستی سەقفی داخوازییەكانی هەموو هاوڵاتیانی كوردستان گەیشتۆتە ئەو رادەیەی كە هێزی ئۆپۆزسیۆن بانگەشەی بۆ دەكات، هەموو هاوڵاتیانی كوردستان لەگەڵ ئەو داخوازییەدانە، ئەگەر بەشێوەیەكی زۆر وەرتر سەیری ئەو رەوشە بكەین، دەزانین كە خواستی جەماوەری بە ئەو سیناریۆیەی كە لە ئارادایە زۆر كەمترە و هاوڵاتیانی هەرێمی كوردستانیش ئێستا لە هەموو كاتێك زیاتر بیر لە ژیان و ئاسایش و سەقامگیری و خۆشگوزەرانی دەكەنەوە.
تیبینی: ئەم وتارە لە گۆڤاری سڤیل ژمارە 75دا بڵاوكراوەتەوە