روژانه د جهی كاری و دناڤ مال و ههمی جهێن گشتیدا چهند جاران ئهم ڤی ئاخڤتنی دبێژین یان مه گوه لی دبیت؟ دهستهواژهیا "پشتی دهمهك دی ئهز دی ڤی كاری كهم" یهكه ژڕێكێن نهشیان و تهمبهلیی، ژبهركو مه ههمیا دژیانا خۆدا سیناریۆیێن جودایێن نهشیانی ههنه و ئهو سیناریۆژی دبنه ئاستهنگ و رێكی لمه دگرن كو ئارمانجێن خۆ ب دهستڤه نهئینین ههر ژراوهستیانێن كێم دپێشكهڤتنێدا و ههتاكو دبنه بهربهستێن مهزن و نهشیانێن ب ئێكجاری.
وان سیناریۆیێن خۆ ژرهنگی نهشیانی و گیرۆكرنا كاران بۆ دهمێن درهنگتر نیشا ددهن، مه بهرهڤ رهوشا لاوازی و ئیفلیجیی دبهن چونكی ئهم خۆ لپشت بزاڤ و كارێن دیێن رۆژانه ڤهدشێرین.لگۆری هندهك كهسێن دیتر دهما بهرسڤهكا ئهرێنی و بلهز نابینن تویشی ههلنگفتنی دبن و ب ساناهی خهونێن دهێنه ههلوهشاندن، دراستیدا ئاستهنگ و زهحمهتی تشتێن ئاساییه و دڤێت ههر دهمهكی مرۆڤ چاڤهڕێی رویدانا وان بیت و بهرههنگارییا وان ژی كارهكی فهره و ئهگهر مه شیان نهما خۆ لبهر وان ئاستهنگان بگرین وی دهمی ژیان دی یا رهنگ و بێتام بیت.ئهگهر تو شیای پێشبینیا رویدانا ئاستهنگان بكهی ژبلی كو دوی هزرێدا بی ژیان ب ئاوایهكی سرووشتی و ساناهی دی بڕێڤهچیت، وی دهمی چ تشتهك نكاریت خواستێن ته سارڤه بكهت و رێكی ل پێشكهڤتنا ته بگریت و وی دهمی شیانێن تهیێن عهقلی دی وهراری كهن.چێدبیت هندهك جاران ته پێدڤی بڤی چهندی ههبیت سیناریۆیین نیشادانا هێزی ههبیت ههتاكو رژدی لدهف ته پهیدا ببن كو تو سارڤه نابی و خۆ رادهستی دلساریی ناكهی و سهرباری هندی ژی دهلیڤهێن پتر بۆ بنهجهكرنا تشتێن ته دڤێت ئهنجام بدهی بۆ ته هێنه پێش، ب رامانهكا دی دڤێت تو سیناریۆیان بگوهوڕی ژ: "نابیت ژیان بڤی زهحمهتیی بیت" بۆ سیناریۆیهكا راستتر: ژیان تژی ئاستهنگ و زهحمهتیه و ئهوه كو وهدكهت ژیان جوان و بتامتر بیت.
تو نزانی كهنگی و ل چ جههكی دی بهرههنگاری ئاریشه و ئاستهنگێن ژیانی بی، گرفتێن مهزنتر وی دهمی بیت كو تو بخۆ ئاستهنگا بێخیه رێكا خۆ و ژینگهههكا پڕی تهمبهلی بۆ خۆ چێكهی.هندهك پێشنیاریێن نهرێنی بێژی بۆچی ئهز لهزاتیی دكهم...سوباهی ئهز وی كاری كهم...یان ژی دی پیچهك بێهنا خۆ ڤهدهم و پشتی هینگی دی دهست بكاری كهم...پرسیار ژی ئهوه بۆچی ئهم پلانی بۆ هزرێن ههڕفتن و شكهستنا خۆ دادڕێژین؟
ژئهگهرێن سهرهكی ئهوه مه باوهڕی ههیه كو ساناهیتره خۆ ژئهرك و كارێن خۆ بدهینه پاش و ژبهر هندی ژی ئهم وان كاران گیرۆ دكهین و چێدبیت مه ترسا سهرنهكهفتنی ژی ههبیت.وهلی كهسێن سهركهفتی پلانێن دهستنیشانكری ههنه بۆ ژناڤبرنا ئاستهنگان یان ههر نهبیت كێمكرن و سڤكرنا وان ئاریشه و ئاستهنگان، ئهو خۆ فێری هندی دكهن چهوا بهری ئهو ئاستهنگ مهزنتر لی بهێت خۆ ژی دهرباز بكهن.پێنگاڤا یهكی ژی بۆ سهرهدهریكرنی دگهل سیناریۆیین نهشیانی ئهوه ئهم وان ئاستهنگان بنیاسین پشتی ڤی یهكی تویّژینی بكهین كا ئاستهنگێن ناڤخۆ و دهرڤه چنه كو بوونه سهدهم ئهم ئارمانجێن خۆ بدهستڤه نهئینین، چێدبیت جارا یهكی ئاستهنگێن دهرهكی زهحمهتتر بن بۆ سهرهدهریكرن كو ل دهرڤهی دهسهڵاتا مهنه و ئهگهر مه ئهو ئاستهنگ كرنه ناڤخۆ دی كهڤنه بن دهسهڵاتا مه، ههڤڕكیا ب راستی ئهوه سیناریۆیێن ژناڤبرن و خۆ دهربازكرنی ژ ئاستهنگان ژلایی مه بهێته چێكرن.یهك ب ژباشترین رێكێن زاڵبوونا بهسهر ئاریشهیان ئهوه ئاریشه بهێنه دابهش كرن بۆ پرتین بچویك ب شێوهیێكی كو بكارین سهرهدهریی لگهل بكهین و ههر یهكهك ب جودا بهێته بنهجیه كرن...چونكی سهركهفتنهكا بچویك دی هاندانهكا باش بیت ههتاكو ئاستهنگهكا مهزنتر بهێته ژناڤبرن.
ئهو بابهتانهی له کوردستان نێت دا بڵاودهکرێنهوه، بیروبۆچوونی خاوهنهکانیانه، کوردستان نێت لێی بهرپرسیار نییه.