موچه‌ بۆ هێزی كاری ناوماڵ؟! … سه‌لام عه‌بدوڵڵا-خانه‌قین

ئه‌گه‌ر دایكێك یان كچێك له‌ كۆمپانیاییه‌كی په‌له‌وه‌ڕ رۆژانه‌8سه‌عات مریشك به‌خێو بكات، له‌به‌رامبه‌ریدا كرێی كار وه‌رده‌گرێت، به‌ڵام ئه‌گه‌ر رۆژانه‌ له‌ماڵه‌وه‌ رۆژانه‌ به‌بێ پشوودان15سه‌عات خه‌ریكی به‌خێوكردنی منداڵ، پاككردنه‌وه‌و چای و چێشتلێنان و جێی نووستن راخستن و پێخه‌ف هه‌ڵگرتن وجلشۆردن و ئوتوكردن و خزمه‌تكردنی مێوان و رێكخستن و ئه‌وانی تر له‌ ماڵه‌وه‌ ببێت كه‌ ناشكرێ له‌به‌ر ماوه‌ی كاركردنه‌كه‌و سه‌ختییه‌كه‌ی له‌گه‌ل كاری كۆمپانیاو چێشخانه‌ به‌راوردبكرێت، كرێی كاره‌كه‌ی وه‌رناگرێت!

ئێمه‌ باش ده‌زانین كه‌ زۆركه‌س هه‌یه‌ كاری دایك و كچانی ناو ماڵ به‌ ئه‌ركێكی ئاسایی مێیینه‌ چاوی لێده‌كه‌ن و ته‌نانه‌ت هه‌ندێكیش هاواریان لێهه‌ستاوه‌و ده‌ڵێن: داواكاری كه‌مپینی (موچه‌ بۆ دایكان) بڕه‌ پاره‌یه‌كی زۆری تێده‌چێ. گه‌رچی دایك هه‌ر له‌ماڵه‌وه‌ كاره‌كانی ده‌كات، به‌ڵام كه‌سانی وا هه‌ن ده‌ڵێن: ئه‌وه‌ نییه‌ له‌ وه‌ڵاتانی ئۆروپا موچه‌ی یان یارمه‌تی به‌ دایك و كچی بێكار ده‌ده‌ن! یان ده‌ڵێن (منه‌تی نییه‌، خزمه‌تی منداڵی خۆیان ده‌كه‌ن... بۆچی منداڵ ده‌هێنن) ... ژن هه‌ر بۆ كاری ناو ماڵ باشه‌و له‌كاتێكدا به‌به‌رچاوی هه‌مووانه‌وه‌ 99%ی مێیینه‌ كاری ناوماڵ ده‌كه‌ن، ده‌ڵێن"جا كێ ده‌ڵێ هه‌ر ژن كاری ناوماڵ ده‌كات؟... هتد...، ئه‌مانه‌ مشتێكن له‌ خه‌رواری نموونه‌ی تێفكرینی پیاوسالاری!

نه‌خێر كاری ناوماڵ به‌هه‌موو مانایه‌ك، سوخره‌كاری و پڕۆكێنه‌و ئه‌وه‌ی ئه‌نجامی بدا گیان و روحی له‌راده‌به‌ده‌ر ماندوو ده‌بێ، بۆیه‌ نابێ به‌ كه‌سێكی بێكار چاوی لێ بكرێت. ئه‌و به‌ڕێزانه‌ وه‌ك هه‌ندێ پیاوی فینله‌ندی له‌سه‌ر مێزی مه‌یخواردن"به‌ شۆخی"ده‌ڵێن: ژنه‌كه‌م زۆر ئازایه‌، پاش گه‌ڕانه‌وه‌ی له‌ كاركردن، كاره‌كانی ناو ماڵ و په‌روه‌ده‌كردنی منداڵه‌كانیش ئه‌نجامده‌دا".

تا دایكێك یان كچێك له‌ناو ماڵ بمێنێته‌وه‌و كاره‌كان ئه‌نجامبداو به‌مه‌ به‌شداری له‌ به‌رهه‌مهێنانی كۆمه‌ڵایه‌تی بكات، ده‌بێ موچه‌یان بۆ دابین بكرێ، وئه‌م داواكارییه‌ حه‌ق و هوشیارییه‌كی مرۆییانه‌، نه‌ك كۆمه‌ك و به‌زه‌یی و سۆزداری بۆ دایك و كچی"داماو" وهه‌روا جێبه‌جێكردنی بۆ كوردستانیان سه‌ربه‌رزییه‌كی بێ وێنه‌یه‌ له‌به‌رده‌م حكومه‌ت و گه‌لانی دنیا:

ئه‌گه‌ر ئه‌بره‌هام لینكۆڵن كۆیله‌ ئه‌فریقییه‌كان له‌ناو ئه‌یالاته‌ یه‌كگرتووه‌كانی ئه‌مریكا رزگاركرد، به‌ڵام به‌داخه‌وه‌ هێشتا له‌ جیهان هه‌نگاوی جددی نه‌نراوه‌ بۆ رزگاركردنی زۆرینه‌ی هه‌ره‌ زۆری مێینه‌ له‌ حه‌قاره‌ت و زه‌لیلی و بێزاركه‌رو شێتكه‌رانه‌ی كاری ناوماڵ و ئێستا ئه‌م هه‌نگاوه‌ له‌ كوردستانه‌وه‌ وه‌ك هه‌وڵێكی بچووك ده‌نێین و به‌ زمانی دایكمان ده‌ستیپێده‌كه‌ین بۆ دابینكردنی موچه‌ بۆ ئه‌نجامده‌رانی و له‌داهاتوودا ده‌یخه‌ینه‌ به‌رده‌ستی حكومه‌ت و په‌راه‌مانی كوردستان و رای گشتی هه‌موو جیهان و حكومه‌ته‌كان و رێكخراوه‌ جیهانییه‌كان.

ئه‌مه‌ په‌یام و به‌شداری ئێمه‌یه‌ له‌پێناو ژیانێكی مرۆییانه‌.

سه‌لام عه‌بدوڵڵا-خانه‌قین

7/5/2009

This email address is being protected from spambots. You need JavaScript enabled to view it.

07701929872

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.