- سەركردایەتی یەكێتی زۆر بێوێژدانانە و ناعادیلانە هەڵسەنگاندنی بۆ توانا و كەفائەتی كادیرەكانی خۆی هەبووە
- لەناو یەكێتیدا خەڵك هەبوو لە مەكتەبی سیاسی لە كادری عەسكەری لە دێهاتەكانی كوردستان لە هەرگوندەك ئافرەتێكی هەبووە بۆ ڕابواردن
- هەركەس گەشتبێتە سەركردایەتی یەكێتی بە لێهاتویی نەبووە، هەمووی بە تەعینكردن بووە، تەنانەت بۆ مەكتەب سیاسیش بەتەعینكردن خەڵك دانراوە
- كۆسرەت رەسوڵ مەفرەزەی دروست كردبوو دەیناردنە سەر دەوڵەمەند و مقاول و بازرگانەكان، پێیان دەوتن لەماوەی ئەوەندە رۆژ ئەوەندە پارە دەهێنن بیهێنن، ناهێنن دەكوژرێن
حاکم شۆڕش حاکمی سهردهمی شۆرشی یهکێتی نیشتیمانی کوردستان
دڵشاد خورشید مستهفا ناسراو به حاكم شۆڕش خهڵكی ههولێره، لهو شارهش گهوره بووه و خوێندنی تهواو كردووه، دواتریش كۆلیژی قانون سیاسهی له بهغدا خوێندووه، دهرچوی 1980 – 1981 ه، پێشمهرگه و كادرێكی دێرینی یهكێتیه و وهك خۆی وتی خێزانهكهشی بههۆی ئهو وهزعه سیاسیهی له كوردستان ههبووه پهرت و بڵاوبوون، لهپاش رێككهوتنی 1983 یهكێتی لهگهڵ حكومهت 11 كهس له خانهوادهكهی دهسگیر كراون و زیندانی كراون كه حهوتیان له خێزانی خۆی بووه و باوك و دایك و دوو برای هاوسهرهكهشیان لهگهڵ بووه كه كادری یهكێتی بووه و لهگهڵ خۆی كاری سیاسی كردووه، ههروهها ئهوهش ناشارێتهوه كه تا یهكێتی و كوردستانی جێهێشتووه وهك دهڵێت “ تاساڵی 1989شهریكم لهههموو جوانی و ناشیرینییهكانی یهكێتی، بهڵام لهوكاتهوه یهكێتی نیم و خۆم بهبهشێك لهوان نازانم” ئێستا لهوڵاتی سوید دهژی و بۆ چهندین جار له ئهنجومهنی شارهوانییهكانی سوید ههڵبژێردراوه و له بازاڕی كاری سوید كار دهكات و كاندیدێكی حزبی سوسیال دیموكراتهكانی سویده بۆ ههڵبژاردنی داهاتوو
بهشی یهکهم
رزگار ڕهزا چوچانی / سوید
* چۆن بوو لە خوێندنەوە بیرتان لە سیاسەت كردەوە و تێكەڵی سیاسەت بوون؟
-
من لە سەردەمی منداڵیم كاتێ شۆڕشی ئەیلول حەزم بە كاری نەتەوەیی دەكرد و بەردەوام بیرم دەكردەوە، كاتێك شاخێكم دەبینی وێنەی مەلا مستەفا بارزانیم دەهاتە بەر چاو، كاتێك دەیان وت پێشمەرگە من وێنەی مام هاشم باپیرم دەهاتە بەرچاو كە خەڵكی گوندی ئاقوبانە و خزمی خۆشمە، باسیان دەكرد تەمەنێكە پێشمەرگەیە، بۆیەش بەردەوام عەتفم بۆ نەتەوە و وڵاتەكەم هەبوو. نسكۆی 1975 ی شۆڕشی كوردیش كاریگەری لەسەر هەموو تاكێكی كورد هەبوو، بە تایبەتی گەنج و ئەوانەی كە زیاتر خوێندنەوەیان هەبوو. ئێمە كۆمەڵێك برادەر بووین خەڵكی خوێندەواربووین لە چایخانەكانی هەولێر دادەنیشتین و بیروڕامان دەگۆڕییەوە، دوای نسكۆ دەنگۆیەك دروست بوو كە بەعس عەگال لەسەر نەتەوەی كورد دەكات و شكستی شۆڕشیش شكستی نەفسی بوو بۆ زۆر لە خەڵكی كوردستان، بەڵام ئەو كاتیش خەڵكێك هەبوون باوەڕی بەهەڵسانەوە هەبوو، من ئەو كات زانیم هێزێكی سیاسی و چەكداری خۆی راگەیاندووە كە یەكێتی نیشتیمانی كوردستان بوو، بۆیە لە ساڵی 1976 من پەیوەندیم بە كۆمەڵە و یەكێتییەوە كرد، یەكێكیش بووم لە دروستكەرانی كۆمەڵەی خوێندكارانی كوردستان لە هەولێر.
* بەڵام بەر لە چونە شاخ تۆ و فەرید ئەسەسەرد و نەجدەت ئاكرەیی تەنزیمێكتان بۆ خۆتان دروست كردبوو ئەوە چۆن بوو؟ چۆن دواتر چوونە ناو یەكێتی بۆچی نەجدەت ئاكرەیی نەهاتە ناو یەكێتی كە یەكێك بوو لە ئێوە؟
- ئێمە ئەو كۆمەڵە گەنجە خوێندەوار بووین باوەڕمان بەوە هەبوو كە شۆڕش توشی شكست دەبێت و سەركەوتنیش دەبینێت، بەڵام میللەت نامرێ، ئێمەش كۆمەڵێك گەنج بووین هەستی نەتەوەیی و نیشتیمانیمان هەبوو، باوەڕمان بەوە هەبوو دەبێت هەوڵبدەین باوەڕی میللەت نەمرێ بە شۆڕش و بزووتنەوەی كوردستان، بۆیە لە نێوان خۆمان مونەزەمەیەكمان دروستكرد بە ناوی “لجنە التحزیریە لجیش تحریر كردستان” كە من بووم د. نەجدەت ئاكرەیی بوو، فەرید ئەسەسەرد بوو، وشیار عابد بوو، چەند كەسێكی تریش لە هەولێر لەگەڵمان بوون كە ناوەكانم رەنگە لەیاد نەبێت، هەروەها چەند كەسێكی تریش لە كەركوك و سلێمانی هەبوو بە واستەی كاك نەجدەتیش چەند كەسێكمان لە دهۆك هەبوو، بەڵام هەر هەموومان لە نێوان 15 - 20 كەس دەبووین شتێكی وا گەورە نەبوو، بەڵام تەنها لە پێناو ئەوە ئەو كارەمان كرد بڕوای میللەت نەمرێ بە هەڵسانەوە، ئێمە كارمان ئەوەبوو بەیاننامەمان دەنوسی و لە شار بڵاومان دەكردەوە، دەمان هاویشتە ناو ماڵەكان و لە نێو شار فڕێمان دەدا، تەنها مەبەستمان بەرزكردنەوەی ورەی خەڵك بوو. ئەو كات باوكم مودیری دائیرەی زەریبە بوو، لە دائیرە لە لای ئەو كاربۆن و قەڵەم و كاغەز و ئەو شتانەم دەهێنا و بۆ ئەو مەبەستە بە كارمان دەهێنا، فەرید ئەسەسەرد لە نوسین باش بوو، هەروەها نەجدەت ئاكرەیی و وشیار عابدیش، شتەكانمان باسدەكرد ئەوان دەیاننوسی و بڵاومان دەكردەوە. ئێمە بەردەوام بووین تا ساڵی 1976 كە یەكێتی دامەزرا ئیدی من بە واستەی برادەرێك كە ناوی سامی قادرە كە هاوڕێ تەلەبەیم بوو لە ڕێی ئەوەوە من پەیوەندیم كرد بە یەكێتی و دواتریش من بوومە ئەلقەی وەسڵ لە نێوان یەكێتی و ئەو برادەرانەی خۆمان، ئیدی ئێمە خۆمان حەلكرد و چوینە ناو یەكێتی، بەڵام نازانم بۆچی باسی چوونە ناو یەكێتیم لەگەڵ نەجدەت ئاكرەیی نەكرد، ئەوەم بیر نایە، كە هاوڕێمان بوو لەگەڵمان بوو.
* لە شاخ كارت لە مەحكەمە دەكرد، مەحكەمە لەناو یەكێتیدا سەر بە كوێ بوو، لە كوێوە سەرپەرشتی دەكرا؟
- بە حوكمی ئەوەی دەرچوی كۆلیژی یاسابووم كە چومە شاخ لە مەحكەمە كارم دەكرد، لەوێ تەجروبەی دادگا شتێكی نوێ بوو، حاكم سەردار كاری تێدا دەكرد لەگەڵ حاكم فەرهاد كە لە ئیزاعە بوو، منیش لە تەنزیم ناوم پۆڵا بوو، كە چوومە مەحكەمەش ناوم بوو بە حاكم شۆڕش، یەكێك لە مەشاكیلەكان ئەوەبوو كە مەحكەمە لە خوارەوە نەبوو، بەس لە سەركردایەتی هەبوو، سەر بە ئەوێ بوو، دیارە حاكم فەرهاد وازی هێنابوو من و حاكم سەردار دوو نەفەر بووین كارمان تێدا دەكرد و جەمال ئاغاش سەرۆكی مەحكەمە بوو، دواتر برادەرێك هات كە مفەوەزی پۆلیس بوو بە حوكمی ئەوەی شارەزاییەكی هەبوو هێنامانە لای خۆمان بۆ تەحقیقكردن، ئەو خەڵكانەشی كە لە خوارەوە دەگیران و بە پێویست دەزانرا دەهێنرایە سجنی سەركردایەتی، چونكە وەك وتم مەحكەمە لەوێ بوو.
كاری مەحكەمە تەنها مەسەلەی خیلافاتی نێوان خەڵك لەسەر زەوی و زار و كێشەی پێشمەرگە و ئەو خەڵكانەبوو كە جاسوس بوون، دامەزراندنی ئەو دادگاش یەكێك لە پێویستییەكان بوو، چونكە پێشمەرگە لە خوارەوە بە نایاسایی ئیجرائاتیان لەگەڵ خەڵك دەكرد، خەڵكیان دەگرت و سزایان دەدا و عیدامیان دەكرد، بۆیە بیرمان لەوەكردەوە كە دەبێت لە شۆڕشدا بنچینەكانی دەوڵەت دروست بكەین، چونكە بڕوامان بەوە هەبوو كە سبەی دەچینە شار و حكومەت دەبەین بەڕێوە، بۆیە من و حاكم سەردار و حاكم فەرهاد چوینە لای مام جەلال و پێمان وت ئێمە دەمانەوێت سترەكتۆرێك دابنێین بۆ دادگا، پێمان وت لە خوارەوە هەندێك ئیجرائات دەكرێت وەك سزادان و عیدامكردن و ئەو شتانە عەدالەتی تێدا نییە و بۆ سومعەی شۆڕشیش باش نییە، چونكە ئێمە هێزێكین باس لە عەدالەت و سوسیالیزم و دیموكراسی دەكەین، ناكرێت بەبێ مەحكەمە خەڵك سزا بدەین، مام جەلالیش وتی كوڕینە من لەسەدا سەد لەگەڵتانم.
* مەحكەمە بۆی هەبوو سەركردەیەكی یەكێتی لەئاستی سەركردایەتی سزا بدات؟ یان تا چەند توانی ئەو كێشانە چارە بكات كە لەپێناویدا دامەزرا؟
- ئەو دادگایەی ئێمە دەسەڵاتی ئەوەی نەبوو كە سەركردە سزا بدات، تۆ دەزانی سەرەتای شۆڕش شتی جوان هەیە، ئەو خیلافات و ئەو كەموكورتی و ئەو پۆخڵەواتییەی ئێستا ئەو كات نەبوو، بەڵام نەشتوانرا هەموو كێشەكان چارە بكات، چونكە ئێمە لەناو شۆرش بووین، دەوڵەت نەبووین قانون و دەستورمان هەبێت و كاری لەسەر بكرێت. لە شۆرشدا شتی باش و خراپیش هەیە، مەحكەمەی شۆرشیش دەستی نەدەگەیشتە هەموو ئەو جێیانەی كە پێشمەرگەی لێیە، بۆیە خەڵك گیراوە پارەی لێسەنراوە، خەڵك گیراوە ئیعدام كراوە و شتی تریش، بۆیە ناتوانم بڵێم هەموو كێشەكان چارەسەر كران.
* تاچەند تەدەخولات لە كارەكانی مەحكەمەی شۆرش هەبوو؟
- تەدەخولات هەبوو، زۆرجار توشی رقەبەرایەتیش بووین، چونكە من ئەو كاتیش بە كەسێكی عیناد ناسرابووم و رازی نەبووم كەس بەبێ قانون لای ئێمە بڕیاری لەسەر بدرێت، خەڵكی باڵەكایەتی و بالیسان شاهیدی ئەو راستییەن و ئەو پێشمەرگانەش كە لەگەڵ من بوون دەتوانن ئەو راستییە بسەلمێنن، زۆركات وتراوە فڵان عیدام بكەن، فڵان سزا بدەن، بەڵام رازی نەبووم بە هیچ تەدەخولاتێك بۆیە ویژدانم ئاسودەیە.
* تۆ لە شۆڕشدا هەم وەك پێشمەرگەیەك، هەم رۆڵی حاكمیشت هەبووە، هەمیش بەرپرسی كەرتی رێكخستن و بەرپرسی تەنزیماتیشت كردووە، ئەو كوتلە و گروپ گروپەی ئەمڕۆی یەكێتی تاچەند بوونی هەبوو لەو سەردەمانە؟
- ئەوە ئەساسێكی مێژوویی هەیە، تەنانەت ئەو كاتیش بەر لەوەی بچینە شاخ كە لە شار بووین هەستمان دەكرد ئەو كوتلە و شتە بوونی هەیە، بەڵام كاتێك تۆ لە شاریت و لە نزیكەوە تێكەڵی شۆرش نیت ناتوانیت شتەكان وەك خۆی ببینی، چونكە تۆ حەماسەتت هەیە و بڕوات بە قەزیەكەیە، بۆیە هەموو شت جوان دەبینیت، بەڵام كاتێك كە چومە شاخ شتێكی ترم بینی، لەشاخ كوتلەی سجنمان بۆ دەرچوو، كوتلەی شەهید ئارام و مام جەلال و نازانم چی و چی سەریان هەڵدا، بۆیە دەڵێم بەڵێ ئەو ململانێیە بوونی هەبوو، لەوێش ئەوە شتێكی كۆنە لەناو یەكێتی، بەڵام لە سەرەتاوە ئەو خەت وخەتكارییە ئەو تەئسیرە نێگەتیفەی بەسەر یەكێتییەوە نەبوو. سەرەتا كە ئێمە چووین هەتا 1983یش ئەندامانی سەركردایەتی نێوانیان باش بوو لەگەڵ پێشمەرگە نانیان دەخوارد، ئەو دیوارەی ئەمڕۆ لە نێوان كادر و سەركردە و پێشمەرگە هەیە بوونی نەبوو، دواتر ئێمە و خەڵكیش بۆمان دەركەوت خەت وخەتكاری و پیاو پیاوانێ بوونی هەیە، ئەو پیاوپیاوانێی ناو یەكێتی لە 1983 ەوە زۆر بە زەقی و بە ئاشكرا دەركەوت، چونكە لە كاتی مفاوەزاتەكە پارە و ئیمتیازات هاتە ناوشۆڕش و هەر كەسە و بەشی خۆی دەویست.
* بۆچی تۆ وێڕای هەبوونی بڕوانامە و ئەو هەموو ماندوبوونەت نەبوویتە ئەندامی سەركردایەتی؟ لەناو یەكێتی جگە لەوە كە خاوەن بڕوانامە و رابردوو پاك بیت، مەرجێك هەبوو بۆ بوون بە ئەندامی سەركردایەتی و تۆ نەگرێتەوە؟
- بەڵێ مەرجی رانەگەیەنراو هەبوو، بەڵام خەڵك و پێشمەرگە هەستی پێدەكرد، زۆركات پێشمەرگە و كادرەكان بە منیان دەوت حاكم شۆڕش سێ مەرجەكە لە تۆدا نییە، بۆیە نابیتە ئەندامی سەركردایەتی، منیش دەموت سێ مەرجەكە چییە؟ دەیانگوت عارەقخۆر نیت، كۆنكان نازانیت، باڵاشت بەرز نییە، لەناو شۆڕش لە دوای 1983 ئەوانەی تا بەیانی دادەنیشتن ویسكی و عارەقیان دەخواردەوە و كۆنكانیان دەزانی ئەوانە لە پێشەوە بوون، من وەكو دیاردە باس دەكەم ناوی كەس ناهێنم، لەناو یەكێتی ئەگەر لەهەر گوندێك بۆ ڕابواردن ژنێكت هەبوایە بەڕاستی تۆ قارەمان بویت، لەناو یەكێتیدا خەڵك هەبوو لە مەكتەبی سیاسی لە كادری عەسكەری لە سەرتیپ لە كادری سیاسی بۆ ڕابواردن لە دێهاتەكانی كوردستان لە هەرگوندەك ئافرەتێكی هەبووە، بەڵام وەك وتم ئەوانە دیاردەی زەقی ناو یەكێتی بوون، ئەگەر وەكو تاكیش قسە بكەیت و ناویان بهێنیت ئەوەندە پۆخڵەواتی لە شاخ هەبوو لە ریزەكانی یەكێتی لە باس نایەت، وەك زێرابێك وایە تا زیاتر سەریهەڵدەیتەوە زیاتر بۆنی دێت، بۆیە نامەوێ ناوی كەس بهێنم، راستییەك هەیە لەناو یەكێتی لەسەركردایەتی هەتا خوارەوە هەموو كەس دەیزانێت كەسەركردایەتی یەكیتی نیشتیمانی بەهۆی ئەو دەستەو تاقم و تەكەتولاتە زۆر ناعادیلانە ڕەفتاری لەگەڵ كادر و پێشمەرگە كردووە.
* بونی ئەو دیاردانە تاچەند كاریگەری لەسەر بڕوای پێشمەرگەكانی یەكێتی هەبوو؟
- كاریگەری زۆری هەبوو، خەڵكیشی سارد دەكردەوە، لە شەش مانگی چوونمان بۆ شاخ خێزانەكەم كە ئەویش كادر بوو، پێی وتم دڵشاد تۆ خەریكی چیت، ئەمە هەمان ئەو شتانەی تێدایە كە یەكێتی رەخنەی هەیە لەسەری لە شۆڕشەكانی پێشخۆی، ئەوە كەی شۆڕشە ببینە چەند فەرق و جیاوازی لە ژیانی سەركردە و كادرەكان هەیە، بزانە ئەو هەموو پۆخڵەواتییە، چونكە ئەوانەی خەریكی پیاوپیاوانێ بوون ژیانیان زۆر باش بوو، ئەوەی پیاوی یەكێك لە سەركردەكان بوایە نەك پیاوی یەكێتی، ژیانی لە هەموو یەكێتییەك باشتر بوو، ئەوەش كاریگەری لە حەماسەت دەكرد و خەڵكی پشت سارد كردبوەوە.
*تۆ بەپێی پەسەندبونی پەیڕەو و پرۆگرامێك یەكێتیبوونت قبوڵ كرد، تاچەند لەناو یەكێتی هەستت بەلادان دەكرد لە پەیڕەوەكەی؟
- وەكو لادان بەشێك لە ئاكارەكان لادان بوو، نمونەیەكی بچوك من وتم خەڵك هەبووە لە كادرەكان لە هەر گوندێك بۆ رابواردن ژنێكی هەبووە، لە پەیڕەویش دەڵێت دەبێت كادر دەستوداوێن پاك بێت ئەوە لادان نییە؟ بەپێی پەیڕەوی یەكێتی دەبێت كادر و ئەندام رابردوو پاك بێت، ئێستا ئاشكرابوو كە كۆمەڵە كەسێك فایلیان هەبووە سەر بە موخابەرات بوون، ئێستاش لەناو سەركردایەتی یەكێتین، ئایا مانەوەی ئەوانە لادان نییە لە پەیڕەو؟ بۆ مەسەلەی ئاشبەتاڵی یەكێتی، بەڵێ لە مێژووی یەكێتی و لە خەباتی شاخدا یەكێتیش ئاشبەتاڵی هەیە، برۆ نامیلكەی دروستبوونی یەكێتی بخوێنەوە “یەكێتی نیشتیمانی بۆچی” دەزانی كە راگەیاندنی یەكێتی لەسەر ئەساسی ئەوە بوو ئەوان دەیان وت پارتی رابەرایەتی پێنەكرا، ئاشبەتاڵی كرد، شۆڕشی پێنەكرا، بەڵام لەساڵی 1989 یەكێتی بۆ خۆیشی ئاشبەتاڵی كرد و وازی لە شۆرش هێنا و باسی ئاشبەتاڵەكەی خۆیان ناكەن، لە قاسمە رەش سەركردەكانی یەكێتی كە نەوشیروان و كۆسرەت و ملازم عومەر و هەموویان بوون كۆبونەوەیان بە هەموو كادرەكانی یەكێتی كرد، بە ئاشكرا پێیان وتین ئێمە دەتوانین تا سێ مانگ یارمەتی كادر بدەین، بۆیە سێ رێگە لە بەردەمتانە یان تەسلیم بوونەوە بە عێراق یان دانیشتن لە ئێران، یان چونە خاریج، ئیدی هیچ رێیەكی تر نییە، باشە ئەوە ئاشبەتاڵ نییە؟!! ئاشبەتاڵە، چونكە بەیەك دێڕ باسی مقاوەمەیان نەكرد و پێیان وتین ئەو سێ رێگە هەیە كە هەر سێ رێگەكە واز هێنانە، تەنانەت سەركردایەتی نەیتوانی یەك پێشبینی و پێشهات بۆ ئایندە بخاتە بەردەمی كادرەكان كە رۆحی مقاوەمە لەلایان زیندوو بمێنێتەوە، ئەوەش واتای ئاشبەتاڵێكی رانەگەیەنراوە كە ئەوەش نەریتی هەموو پارتە كوردییەكانە كە هیچ كات ئامادەنین دان بەشكستی خۆیان بنێن لەكۆنگرەیەك بۆ دیاریكردنی هەڵە سیاسییەكان و راستكردنەوەیان لەپێناو پێشكەوتنی حزبەكانیان.
* بۆچی لەناو هەولێر خەڵكێك هەبوون بەر لە كۆسرەت رەسوڵیش یەكێتی بوون، بەڵام وەك ئەو دیار نین لەناو یەكێتیدا؟
- لە راستیدا من لەگەڵ كۆسرەت نێوانم نییە، هۆی ئەوەیە كە كۆسرەت قەد كەیفی بە من و رائید جەلال نەدەهات، چونكە كاتێك هاتە ناو یەكێتی ئاخر كەس بووین چوین بە كۆسرەتمان وت بەخێر بێی بۆ ناو یەكێتی، ئەویش بە ئەنقەست نا بەڵكو كاتێك چوین بەخێرهاتنی بكەین لە سماقولی من و رائید جەلال چووین، تەماشامان كرد خەڵكێكی زۆر راوەستاوە بۆ ئەوەی بچن بەخێرهاتنی بكەن، ئەوجا ئەویش زۆر كەیفی بەوە دێت حەزدەكات دیوەخانەكەی دایم قەرەباڵغ بێت و خەڵك وەسفی بكات، نەك بارەگای حزب و حكومەتەكەی، واتە كۆسرەت حەزی بە قەرەباڵغی دیوەخانی شەخسی خۆی هەیە، نەك قەرەباڵغی بارەگاكانی یەكێتی، ئەوەش یەكێكە لە حەزەكانی ئەو، ئێمەش وتمان دەی وەڵا ئێمە عەجەلەمان نییە با چۆڵ بێت ئەوجا دەچین، ئەوەش بوو بە ڕقی شەخسی ئەو پیاوە لە ئێمە، دروستبوونی كەسێكی تریش لەناو یەكێتی كە هەولێری بێت جگە لەكۆسرەت رەسوڵ بۆ ئەوە دەگەڕێتەوە ململانێ و كێبەركێكانی ناو یەكێتی لەسەر ئەساسی تەنزیم و فكر و دڵسۆزی نەبووە، بۆیە خەڵك ناتوانێت لەناو یەكێتی بە لێهاتویی خۆی دروست ببێت، ئەوەش وایكردووە كۆسرەت رەسوڵ دەوری هەبێت لە رێگرتن لە دروستبوونی هەر هەولێرییەك كە لە دەرەوەی بازنەی كۆسرەتی بێت، سەركردایەتی یەكێتی وەك پێشتر باسمكرد زۆر بێوێژدانانە و ناعادیلانە هەڵسەنگاندنی بۆ توانا و كەفائەتی كادیرەكانی خۆی هەبووە و پێوەریش وەلائی شەخسی بووە، نەك دڵسۆزی بۆ خاك و نیشتیمان و حزبەكە، كۆسرەت كاتێك بووە یەكێتی مەرجی لەگەڵ سەركردایەتی هەبوو، ئەوكات كەس نەدەبووە پێشمەرگە، ئەو بەسەركردایەتی وت من دێمە دەرەوە و ئەگەر ببمە بەرپرسی مەڵبەند سەد كادریش لەگەڵ خۆم دەهێنمە دەرێ، سەركردایەتیش خەنی بوون وتیان كەس نابێت بە پێشمەرگە ئەو سەد كادر لەگەڵ خۆی بهێنێت بۆ نایكەین؟ بۆیە دكتۆر كەمال خۆشناوی رەحمەتیان دەركرد و كۆسرەتیان لە جێی ئەو كردە مەسئولی مەڵبەند، ئەوجا هەركەس گەشتبێتە سەركردایەتی یەكێتی بە لێهاتویی نەبووە، هەمووی بە تەعینكردن بووە، تەنانەت بۆ مەكتەب سیاسیش بەتەعینكردن خەڵك دانراوە، ئەو راستییەش دەبینین ئەمرۆ نەوشیروان و رەوتی “ڕەگ” لەبەیاننامەكانی خۆیان دانیان پێدا ناوە، راستە كۆسرەت رسوڵ لایەنی باش و خراپی هەیە، یەكێك لە شتەكانی ئەوەیە كۆسرەت باوەڕی بە تەنزیم نییە و سەربازیش نییە، واتە كەسێكی عەسكەریش نییە، جارو بار دەبیستم كە گوایە دەوری هەبووە لەشەڕەكان، بەڵام من جارێك كۆسرەت رەسوڵم نەبینیوە بەدەست و بازوی خۆی شەڕێك بكات تەنها بە پیاوەكانی وتووە ئەوە بكەن و ئەوە بڵێن، بەڵام لەلایەكی تریش لێزان بووە، بۆیە سەركردایەتی و مام جەلال گوێیان لێدەگرت، چونكە مەڵبەندی سێ كە كۆسرەت بەرپرسی بوو پارەی هەموو مەڵبەندەكانی تریشی دابین دەكرد، كۆسرەت رەسوڵ مەفرەزەی دروست كردبوو دەیناردنە سەر دەوڵەمەند و مقاول و بازرگانەكان، پێیان دەوتن لەماوەی ئەوەندە رۆژ ئەوەندە پارە دەهێنن بیهێنن، ناهێنن دەكوژرێن، بۆیە دەیتوانی پارەیەكی باش بۆ یەكێتی خڕبكاتەوە، ئێ جەلال تاڵەبانیش پێویستی بەكۆسرەت بوو، ئەو پارەیەكی باشی كۆدەكردەوە بۆ یەكێتی، ئیدی ئەو پارە شەرعی بووە یان نا، من ملاحەزەم لەسەری هەیە، بەڵام یەك رۆژ مام جەلال نەیپرسی ئەرێ ئەو پارە لە كوێ دەهێنن و چۆنتان دەست دەكەوێت؟ گرنگ ئەوە بوو پارە ببەن كە كۆسرەت پارەی بۆ مام جەلال دەنارد مام جەلال دەیگوت ئافەرین ئەی قارەمانەكەی یەكێتی نیشتیمانی كوردستان، بەڵام نەیدەوت ئەو پارەیەتان لەكوێ هێناوە؟! بۆیە جەلال تاڵەبانی لەخۆشی ئەو پارە وەرگرتنە بۆ یەكێتی بە باشی گوێی لەكۆسرەت دەگرت، ئەوەش وای لەو پیاوە كردبوو كە توانای ئەوەی هەبێت رێگە لەدروست بوونی خەڵكی تر بگرێت كە هەولێریبێ و لەناو یەكێتیدا و لە دەرەوەی بازنەی كۆسرەت رەسوڵ بێت.
لهژماره 25 ی گۆڤاری ههڵبون ئهم بهشهی ئهم دیمانه بڵاو کراوهتهوه
ئهو بابهتانهی له کوردستان نێت دا بڵاودهکرێنهوه، بیروبۆچوونی خاوهنهکانیانه، کوردستان نێت لێی بهرپرسیار نییه.