لەو دەمەدا جوامێران بە قامکی دەست دەژمێردران ، پێشمەرگایەتی مل لە چەقۆ سوین بو ، بەگژداچونەوەی بەعسیە عروبەچیە کەڵبەتیژەکان سانا نەبو ، لێ ئەو لەولاوە دڵگەرمانە کێبڕکێی گیان فیدایی و پێشمەرگایەتی دەکرد ، خۆزگە ئەو ڕێکەوتە نەسازایە کە ھەندێ ھاوڕێ بناسی ، چونکە دابڕانی ئەبەدی لێیان دەبێتە زامێکی بەسوێ و سەختی ساڕێژ نەبوی ئەبەدی .لاوێکی ھێمن و پڕ فیکر ، تەژی لە مەعریفەت ، سیخناخ لە ڕۆشنبیری و لێوانلێو لە بەرخودان ، منی لاوی کەمئەزمون و پڕھەڵچونی نەتەوەپەروەری ، بەڕەنگار بونەوەی ستەمی عروبەم تێکەڵ بە چەوساندنەوەی چینایەتی کردبو ، بە ھەژمونێکی حەماسیەوە کەشکۆڵم ھەڵگرت و ملی ڕێم گرتە بەر و پێدەشتەکانم بڕی و ھەردە و تەلانەکانم خستە ژێر ھەنگاوەکانم و بەجۆشەوە ژیانی خۆشی شارم توڕ دا لە پێناوی ھەڵگرتنی چەکی شەرەفی بەڕەنگاری بەرەو دەم زێ و دەشتی کۆیە چوم ، تا وەکو ھەمو ئەو لاوە مێرخاسە یاخی بوانەی دی لە ستەم منیش ببم بە پێشمەرگە و پشکێ لە شکۆمەندیم بەرکەوێ .
ساڵی 1982 لە گوندی کڵێسە ژوانم لەگەڵ شەھید مولازم سیروانی پورزامدا ھەبو ، یەکانگیری ھێزێکی پێشمەرگەی حزبی شیوعی بوم ، ئەو ھاوڕێیانەی ئەو دەمەم نایەنەوە یاد ، بەڵام لە ڕێگەی شەھید مولازم سیروانەوە بە شەھید بورھان و شەھید ئارام و ھاوڕێ ئەسکەندەر ئاشنا بوم ، لە ڕۆژی دواییدا بە تایبەت لەگەڵ ئەو چوارەدا دانیشتنمان ساز کرد ، دوای چەند ڕۆژێ مانەوەم لە دانیشتنێکی دو بە دو لەگەڵ شەھید بورھاندا کەوتینە ڕاوێژ ، ئەو بە ناو حزبەوە قسەی دەکرد و منیش حزبم وەکو خوداوەندێکی خاوەن گشت ئیرادەم لا وێنا بو ، بڕیارەکەی پێمگەیاند و وتی : دەبێ بگەڕێیەوە ناو شار و ھەندێ ئەرکی حزبی ھەیە ڕایپەڕێنی ، بە شەرمێکەوە وتم دەتوانم بزانم ئەرکەکان چین ؟
وتی : ھەندێ بریندار و نەخۆشمان ھەن و ھەر جارەی یەکێکیان دەنێرینەوە ناو شار و دەبێ جێگە و ڕێگەیان بۆ دابین بکەیت و ببیتە چاوساغیان و چارەسەریان بکەی ... ئیتر من گفتوگۆ و چەلەحانێم نەکرد ، چونکە بڕیاری حزبم وەکو ئایەتی قوڕئانی موسڵمانان بە دەست لێ نەدراو و لاقە نەکراو و بڤە دەزانی و نەدەکرا سێودو لە جێبەجێ کردنی بکەم .
مانگی نەخایاندبو گەڕآبومەوە ناو شار ، بەوەش دێتەوە یادم کە وەرزی ھاوین بو چونکە ئەو دەمە لە سەربان خەوتبوم ، Tanya Muhammad ی خوشکە چکۆلانەم ھات و لە خەو ھەڵی ساندم و وتی : ئەو پیاوە ھاتوە بۆ لات دەڵێ برادەری تۆم .
وتم : کێیە ؟
وتی : نازانم ، بە چاوی خەواڵوەوە بە پلیکانەکاندا ھاتمە خوارێ و تەماشام کرد کەسێک لە حەوشەکەدا بەدەم چاوەڕوانیەوە لەگەڵ دایکمدا قسە دەکات و چاوی لە پلیکانەکانە ، تا بە تەواوی لێی نزیک نەبومەوە و گوێبیستی قسەی نەبوم نەمناسیەوە .
شەھید بورھان ھاتەوە ناو شار ، کادیرێکی لێھاتو ، لێھاتویەکی بەتوانا ، بەتوانایەکی بوێر ، بوێرێکی پڕبەرنامە ، پڕبەرنامەیەکی ئاوێتە بە کردەوەی شۆڕشگێڕانە ، جودا لە بەرگی شاخ بە بەرگی شارەوە ھاتبو بۆ لام تا خەباتی شاخ و شار پێکەوە گرێ بدا ، زیاد لە 10 مانگ لە ماڵی خۆمان شاردمەوە و شەوان چاوساغی بوم بۆ جێبەجێ کردنی ئەرکە حزبیەکان ، بە چەند کەسێکی دۆستی باشم ناساند ، جیا لەوەی بە کارامەیی سەرکردایەتی دەکردین و دەرفەتی ڕۆشنبیر کردن و ئاشنا کردنی زیاتر بە مارکسیزم - لینینزم و ئابوری سیاسی و ماتریالیزمی دیالیکتیک منیشی گرتبوە ئەستۆ ، شارەزاییەکی چڕوپڕی لە ڕۆشنبیری گشتیدا ھەبو ، مامۆستا و ڕابەرم بو ، ڕێپیشاندەر و قیبلەنمام بو .
دایکمی زۆر خۆشدەویست و سەرسام بو بە بوێری و کەسایەتی ، دڵسۆزی و میھرەبانی دایکم ، بە ڕۆژ لە خزمەتیدا بو کام خواردنی بە دڵ بوایە بۆی ئامادە دەکرد و بە ھیچ کلۆجێ ماڵەکەی جێنەدەھێشت و وەکو پاسەوانێکی گوێڕایەڵ گوێ قوڵاغ دەبو لە پێناوی پاراستنی ژیانی بورھان بە چرکەش غافڵگیر نەدەبو ، بۆیە شەھید بورھان زۆر جار دەیوت : مەکسیم گۆرگی دایکتی بناسیبایە ڕۆمانێکی دیکە و شاکارێکی دیکەی بۆ دایکت دەنوسیەوە ، پێوەی دیار بو زۆر ھەستی بە ئارامی دەکرد .
مخابن ، بورھانی پاڵەوان ، ئەو لاوە دڵگەرمەی مەرگی خۆی لە پێناوی ئایندەی گەلەکەی خستبوە لاوە ، لە پلانێکی خیاناتاوی گڵاودا دەسگیر دەکرێ ، خۆی نەما تا بۆمان بگێڕێتەوە ، لێ زیندانیە سیاسیەکانی ھاوخەباتی لە جەللادخانەکانی عروبەدا دەگێڕنەوە : ھیچ ئەشکەنجەیەک نەما لە بەرامبەریدا ئەنجامی نەدەن ، ھیچ دڕندایەتیەک نەما دەرھەقی پیادەی نەکەن ، ھیچ جەلادێ نەما خۆی بە ئازاردانی تاقی نەکاتەوە ، ھیچ شێوازێکی لێکۆڵینەوە نەما لە دژی پەیڕەو نەکرێ ، بەڵام ھیچیان نەیانتوانی ھیچ ڕازێ ، ھیچ نھێنیەکی حزبی لێ دەربھێنن ، بۆیە لە ساڵی 1985 وێڕای ونجڕ ونجڕ کردنی جەستەی ، شیتاڵ شیتاڵ کردنی پێستی ، ئینجا فەرمانی سێدارەی بۆ دەردەکەن و جێبەجێی دەکەن ، شەهید بورهان دەگاتە ڕیزی کاروانی سوری خەبات و شەھید دەکرێ و بە دڵسۆزیەوە دەیسەلمێنێ :
*** شیوعیەت لە مردن بەھێز ترە و لە پەتی سێدارە بەرز ترە ***
لە ھەموی ناخۆشتر وێڕای شەھید بونی خۆی و قوربانیدانی خانەوادەکەی تا ئێستا یەک بابەت ، یەک پەرەگراف ، یەک کۆپلە ، یەک دێڕ ، یەک ڕستە ، یەک وشە و تەنانەت یەک پیت کە لە لایەن حزبی شیوعیەوە نوسرابێتەوە لە سەر ئەو شەھیدە خۆڕاگرە گیانبەخشەم نەخوێندۆتەوە ، تۆ بڵێی سەرکردە نەکردە بودەڵەکانی ئێستا بتوانن بە پاژنەی پێی بورھانەکان بگەن ؟ !
درود لە گیانی شەھیدی گومناو
کڕنوش بۆ گلکۆی
پیرۆزی بۆ ئارامگای
یاد و یادەوەریت بەخێر ھاوڕێ گومناوەکەم
