نووسه‌ره‌هه‌میشه‌ییه‌کان

ڕێکەوت، ٩ ی سێپتامبەری ٢٠١٣ م، بەرامبەر بە ٩ ی - ڕەبیع ئەوەل - ی ١٤٣٤ ی هیجری، شوێن :- کەنارەکانی دەریا، ئاستەنبوڵ بەشە خۆر ئاواکەی، دیمەن :- خۆ پیشاندان و داواکاریی دیکتاتۆرە ڕاکردووەکان .هەر یەك لافیتەی خۆی بڵند،

لەوێ لافیتەکەی - ع .ع .ساڵح -، چەند ووشەیەکی خوار و خێچە، پەیامنێرەکان دەڵێن لەبەر هۆکاری کەم دەرامەتیی سەرۆکی ڕاکردووی ناوبراو، ئەرکی نووسینەکە خراوەتە ئەستۆی، وەزیری کەم خوێندەواری ڕۆشنبیریی پێشووی ئەو ووڵاتە، بۆیە ماڵ وێرانیەکی هێند بێ زەوقانە و، بڕێ فەزاحەتی گرامەریی سواری ملی داڕشتنەکە بووە، کورتەی داواکارییە نووسراوەکەی ساڵح دەڵێت :- لە پاداشتی ساڵ و عەیام دڵسۆزیم بۆ ئێوەی ئەهلی یەمەن، کە لە پاڵ نیوە تەمەنێك پڕ لە هیلاکەت و، هەوڵی بوونیادی مادیی و مەعنەویتان، هاوکات زۆر لە خۆ بووردوانەش فەلسەفەی چەمکەکانی دێمۆکراسی و، کرۆکی ئەدای ڕاستەقینەی مافەکانی مرۆڤیشم، تەنها و تەنها لە پشت مایکرۆفۆنەکانەوە فێر دەکردن، ئەفسووس گوێتان لێ نەگرتم، ناچار دەڵێم :- نەخڵەتابن وەك - بن عەلی - و، - حوسنی - و دۆستانی تری دڵساف و بەش خوراو و، خۆ نەویستی ترم ئێوەش بەشم بخۆن، چوونکە لایەنی کەم سێ بەشی عەدەن و سەنعا، جگە لە ئەملاکی - ساڵحانی سەلەف -، یا سەرجەم پڕۆژەی زەغمی دۆست و ئەحباب، هەر لە دۆشینی بزنە لاتێکەوە، تا دەگاتە دادۆشینی بزنسە زەبەلاحەکان، هەموو تاپۆی ڕەنج و ئارەقەی ماندووێتی نێو چەوانی، خۆم و خانەوادە تێکۆشەرەکەم بوون، سا موختەسەر و بە دوو ووشە - هەندێکیم بدەنەوە -، تا لەمە زیاتر نەبووینەتە ڕیسوای سەر خاکی توورکان،

 _____________________________

- بەشار - ی هاو ستایڵی حوکمی ساڵح، لە لافیتەکەیدا تەنها سێ ووشەی گۆڕیبوو، - ساڵحانی سەلەف بە شامی شەریف -، عەدەن و سەنعا بە دیمەشق، ئەم نووسیبوی :- بە تاپۆی ڕەشی عوسمانلی هەمووی بێ منەت، هی - ئەسەد - ی باوکمن، سا ئەی موشاغیبانی فەیس بووك، نیوەی ئەم موڵکانەم بدەنەوە و، چیتر ئەم ئازادییە بە مۆساد داڕێژراوەی، دژی سووریای شێر و، ئوممەی عارەبیتان لێ - مەبرووك -،

 ______________________________

ئەوەتا لافیتەی - بەشیر - یش، خەلیفە ئاسا چوون فەتوایەکە، :- هۆ گەنجانی تێکدەر ئەم سیستەمی دەرماڵە و، ئەم بوودجەی - بەیتوولمالە -، ئەم هەزاران شەڵتە پڕ زێڕ و، جەواڵە سەرلێو لە مەرجانە، کۆنتڕۆڵ و چۆنێتیی خەرجیان، هەر بە خۆم و موبەشیرانی خەڕتووم حەڵاڵە، هۆ شوێن کەوتووانی فەسادی حووڕییەت، گەنجانی فڕیوو خواردووی گەمە سەهیۆنیزمیەکانی نێو فەیس بووك، من هەر لەم پایتەختی خەلافەتەوە، کە لە نموونەیی ترین سیستەمی عەلمانیەتدا، ئاینەکەمانیان وەك چاویان، لە جامخانەی وویژدانی شەقامەکانیاندا پاراستووە، من چوون نەوەی بە شەجەرەی هەقی حەزرەتی بیلال، لە ڕێی فەرزی شەرعەوە فرمانتان پێ دەکەم، کە هەرچی زوو ترە، یەك لە سەر پێنجی داهاتی سۆدانم بدەنەوە و، باقییەکەی بۆ خۆتان دیاریی و تەبەڕووك، ئاخر توو ئاینتان، ئەگەرچی دڵنیاشم کە مەبدەئی سێ بەشی گەنجانتان ئێستاکە، وەك ئەم بووتڵە ووێسکی یەی دەستم بەتاڵە، قەت خەلیفەیەکتان دی لە سۆدانە ئیتاڵیا ئاساکەی جارانی حوکمڕانیمدا، مەودای نیو سەدە دەسەڵات، واتا پەنجا ساڵ داهێنانی زانستی و ئاوەدانی و هتد ..، دوور لە درووشمی - باتیڵانە - ی نێرەمووك، وەك من لە کووشتن دا یەکسان و، وەك بۆدی گاردەکانیشم خاوەن شا ئەخلاقی سلووك ؟

 ____________________________

خۆ پیشاندانی دیکتاتۆرەکان وەکوو جیوە بێ ئۆقرەیە، هاتنی سەرەتای ساڵی - ٢٠١٤ ی م = یەکی موحەڕەم ی ١٤٣٥ ی هیجری - یش، کە ساڵی مەحەکی سەرتاسەریی و، یەکلایی کەرەوەی سەرجەم بڕیارەکانی مێژووە، ئاوەڵا تر دەرگای هانا هێنانی، بۆ سەرۆك و پادشا و میرە هەڵهاتووەکان خستۆتە سەر پشت، ئەم کارەی سەرانی ئێستای توورکیا، تەنها قەرزێکە و لە پێناوی لێقەومانی سبەی خۆیاندا دەیدەن، دوێنێ شەقامێکی سووری تاران ووتی :- ئەحمەدی نەژاد زۆر بە چانس تر بوو، کووچەی مەرویش ووتی ساڵی پار ئەم فێڵ زانە، توانی لە پاڵ پاسپۆرتە ناو و پیشە ساختەکەیدا، بڕێك یۆرۆ و توومانی خوێناوییش، لەگەڵ هەڵهاتنی خۆیدا ئاودیوو بکات، بەڵام لە توورکیایەکدا کە جگە لە بەهای مرۆڤ، نرخی هەموو کاڵاکانی تر ئاوا گران بن، ئیتر زۆر نابا و ئەمیش پەنای قەرز بۆ پادشای ئۆردون دەبات،

 ________________________________

 پەتڕۆلیزمانی کەنداو سەرجەم، لە ئاست بێ دەنگیی پێشتری کۆشکی سپیدا و، دووا تریش لە ئاست هەڵوێستی ئەو دۆستە هەرە نزیك و ئازیزەدا ئەبڵەق و حەپەساو، سەیرە !! ئامریکا ئەو ماوەیە لەو نەوتەی ئەیبرد، هەر بە خامیی نیوەی دەکردەوە بە سەر، ئاگری شەقامە ڕاپەڕیوەکانی کەنداودا، ئەم ڕاو نراوە دۆش داماوانەش بە حوونجەیەکی پچڕ پچڕ، بە سڕف و نەحوویەکی شەق و شڕ، لە بان ڕیزە ڕەشماڵێکی ڕۆخی مەڕ مەڕە، کۆدەنگانە ئەم لافیتە سەوزەیان نووسیبوو :- ئێمەی دووژمنی زانستی کۆکتێل بە بەر بەرەڵایی ئامریکی، ناکۆك لەگەڵ گفتوو گۆ سنوور بەزێن و، ڕەفتار ئیبلیسیەکانی ناو مایکرۆسۆفتەکەی یەهوود، ئێمەی تا دوێنێ خاوەن موقەدەس ترین پێگە و، ئەمڕۆش قۆچی قووربانی دەستە تێکدەرەکانی فەیس بووك، بێ ئاگا لە چەند زمان و قەڵەمێکی سەر شێتی ناو خوود، سێ ئەمیر و یەك سووڵتان و دوو مەلیك، شەش هەڵهاتووی دەستی مەتەڵی ڕیفۆرم و، فشاری شەقامی گۆڕڕان ێك، کە مەبەستیانە کلتووری عەشایری جوانمان، یا شێوازی پیرۆزی حوکمڕانیی شاقوولی = عاموودی باوو و باپیرانمان، بگۆڕن بەو سەر کێشیە ڕیسك خووڵقێنەی، ناویان ناوە دەسەڵاتی ئاسۆیی = ئوفووقی، ئێمەی خاوەن قەتارێك وەلی عەهد و پرنس و ئەمیرە، خاوەن تابوورێك کەنیزەك و ژنی مەحرەم، خاوەنی پڕ بە ڕێژەی لمی عەرعەرێك، نەوە و بنەچەی ئەسڵ زادەی جیاواز، لە مرۆڤی ئەنتیکە و ئاسایی، دوای سوپاسگووزاریمان بۆ تیکە نانی ئەستانە و مەڕ مەڕە، بۆ قاوەی تورکیی خێر خوازان، ئەوانەی وەك پەناهندەی سیاسی و سێکس، ئێمەیان پاراست لە کووشتن، کووشتنێکی حەتمی بە دەستی ئەو گەنجە کەم ئەزموون و دەست لە پشت دراوانەی، دوور نییە سبەی دەستی کاوبۆیەکانی تاکساس بگرن و، بە قاچی پیسی ئەوان خاك و کلتووری عارەبیی پیرۆزمان لەکەدار بکەن، بەڵێ ئێمەی دەستخەڕۆ، ناچار داوا لەو گەنجە ڕاپەڕیوو و حوکمڕانانەی ئەمڕۆی کەنداو دەکەین، چ ئەملاکێك کە پێشتر هەبوومان، ئەو بلیارەها دۆلارانەی کە نزیکە قەڕنێکە، بۆ ڕزگار کردنی فەڵەستین پاشەکەوتمان کردبوون، ئەو سامانە لە بن نەهاتووانەی بۆ بەختەوەریی - موستەسعیفان - و، هاریکاریی نیوەی هەژارانی جیهان بێدار و ماندووانە، بە کەسابەتی خاوێن و کولە مەرگیانە کەڵەکەمان کردبوون، با هەندێکیان بدەنەوە دەست ژمارە ئەکاوونتی چەند بانکێکی نوێمان، چەند بانکێکی متمانە دار، وەك بانکە بێمزەڕەتەکانی ئۆرشەلیم و ئامریکا، بەڵام دەخیل نەکەن بۆ هیچ ئەکاونتێکی ئەم تورکیایەی ترانسفێر بکەن، چوونکە ئێستا لە ژێر ئەم ڕەشماڵە زەبەلاحانەدا، چوار بەتانیی و دوو ڕایەخی کاتیی و یەدەگمان ئامادە کردووە، ئەمانە بۆ ئەگەری کوودەتا، یا هەڵچوونی گڕکان ئاسای شەقامەکانن، تاکوو لە حاڵەتی ڕاو نان و تێ قووچاندنی هەردوو هاوڕێمان - گویڵ - و - ئۆردوغان - دا پێشوازیی نهێنیان بکەین، بەڵێ ئێمەی گووایا دیکتاتۆر وەك لە بانگەوازەکانی پێشوودا، بە ناوی ئەم - نۆ - کۆنە دەسەڵاتدارە و، بە نووسراو و پەنجە مۆری مووقەدەسی نوێنەری هەموومان، - خادیمی هەردوو حەرەم و، پاسەوانی بە وەفای پێشتری قافڵە ئستووڵە پاپۆڕی، پەتڕۆڵی ڕووە و خۆر ئاوادا - هاتووە، هەرگیز کۆڵ لەم خۆ پێشاندانەمان نادەین تاکوو، زۆرێك دۆلاری دزراومان لە لایەن گەل و نەتەوەکانمانەوە، دەخرێنە نێو ئەو قاسە پتەو و تۆکمانەی، کە جارێکی تر بۆ ئەبەد، دەستی داکۆکی کەرانی ماف ناس، لە هەژارانی نەدی و بدی خوار و ژێری ئێمە، لە ناو هۆڵێکی عیلمانی مولحەددا بە ناوی پاڕلەمان، یاخوود چاوی لیژنە و دادگای سەربەخۆ و بە ناو نەزاهەی، وەك ئەمەی ئێستای ئێوە بە خەونیش پەی بە دۆزینەوەی، ئەو جێگا نهێنیانە نەبەن کە زادەی میراتیی حەڵاڵ و، شەو کوتی بەردەوامی باوو و باپیرانی شمشێر مل قرتێن و، هەمیشە خوێن لێ چۆڕاو و، گیان فیدایانی ووڵاتانی کەنداوی نەوتن، کە بە شاهێدی دۆست و دووژمن، وە بە تایبەتیش شانشینی پێشووی سعوودیە، کە ساڵانێکی زۆر بێ ساتێك ووچان، چ لە پێناوی ئازادیی فەڵەستین و، کڕینەوەی شەرەف و نامووس و کەرامەتی تەواوی دەوڵەتانی خەوتوووووی ناوچەکە، ڕۆڵە گیان لە سەر دەستەکانی ئالی ڕۆیاڵ تا ڕۆژی ئەمڕۆۆۆۆۆۆششش، دژی یەهوووووود و ئیمپریالیستتتتتتت ی ئینگلیززززز و ئامریکاییییییی جەنگاون و دەجەنگێن،

 ....

ئیمزا :- ئۆفیسی کاتیی پەناهندەکان لە تورکیا، لە بری هەموو پەنجە مووقەدەسەکان، پەنجەی ناو براوی لە هەمووان مووقەدەس تر، کەمپینی گرووپی ژمارە - ٩ - ی، پشتگیریی خۆمان لە خوودی خۆمانی، لەسەر بێشکەوە بۆ سەر تاتە شۆر، پشتاو پشت سەرۆك و دەسەڵات دارانی، ئەزەلیی و ئەبەدیی، لە ڕاونراو و ووڵات بەدەر کراوەکانی دەستی نەوەی نوێی، شۆڕشی باهۆزی شەقام، یاخوود بزووتنەوەی فەیس بووك،

 ڕێکەوتی ٢ - ١ - ٢٠١٤ م، بەرامبەر ٢ ی موحەرەمی ١٤٣٥ ی هیجری

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.