ساڵی 1993 وەک یەکەم مامۆستای گووندی کانی مازوو دامەزراین پاش تەواوبوونی خوێندگای گووندەکە.
ساڵی 1994 کەرتی ڕێکخستنی خەلەکان بە نامەیەک داوایان کردبوو، سەریان لێبدەم.
گەرچی بۆ خۆم یەکێتی بووم و بەڵام نامەکەم بەلاوە سەیر بوو.
کاتێ چوومە کەرتی ڕێکخستنی خەلەکان، داوایان لێکردم کە مامۆستا
( ج) کە بەڕێوبەری قوتابخانەی سەرەتایی خەلەکان بوو، بە مامۆستایی گوێزراوەتەوە بۆ کانی مازوو بە مامۆستا. . . کە نابێ من ئیدارە بدەمە دەست مامۆستا ( ج)، یان دەبێ دەوامی تەواو بکات و بواری هیچی نەدەم.
زۆر جار کە دەچوومە خەلەکان سەردانی قوتابخانەکەمان دەکرد و بەتایبەت مامۆستا بورهان خراجیانی کە دواتر لەبری مامۆستا( ج) بووە بەڕیوبەر. بۆیە دەمانزانی کە مامۆستا ( ج) لە ساڵانی 70 مامۆستا و دواتر بەڕێوبەر بووە و خەڵکی کانی مازووشە.
ناسنامەی خۆم پیشانی ئەو برادەرانەی یەکێتی خەلەکان دا کە ئەندام کەرتی یەکێتیم لە کۆمیتەی ٥ و، هەر یەکسەریش ووتم . . منێک کە چەندمانگێکە مامۆستام، ناتوانم هیچ بکەم بەرامبەر مامۆستا( ج). دوا جار وا ڕێککەوتین کە ئەو وەک مامۆستا گوێزراوەتەوە بۆ کانی مازوو، ئیدارەی نەدرێتە دەست و دەبێ دەوامی خۆشی بکات.
ئینجا چیرۆکەکەمان بیست لە کەرتی خەلەکان و مامۆستایانی قوتابخانەکە کە مامۆستا( ج) قژی مامۆستایەکی ژنی (ڕ) ڕاکێشاوە و جوێنی پێداوە.
کاتێ ئەم هەواڵە دەگاتە مامۆستا جەمال عەبدول، کەئەو کاتە پارێزگاری سلێمانی بوو، بۆ خۆی هاتۆتە خەلەکان و زللەیەکی لە مامۆستا ( ج) داوەو پاش دەیان ساڵ خزمەت وەک مامۆستا گواستیەوە بۆ کانی مازوو، کە ڕۆژانە بەو تەمەنەوە بە پێ لە خەلەکانەوە دەهاتە قوتابخانە و دەگەڕایەوە.
وەک دەڵێن مامۆستا جەمال عەبدول لەهەموو ژیانی پارێزگاریدا تەنیا ئەو جارە و ئەو تاقە زللەیەی وەشاندووە کەلەسەر رێز و کەرامەتی مامۆستا بووە. . هەمووشمان دەزانین کە ماۆستا جەمال لەکەسایەتییە هەرە جوان و نەرمو نیان و زانستیەکانی سلێمانییە.
بریا پارێزگاری ئێستای سلێمانیش وەک گەڕانەوە بۆ ڕێز و کەرامەتی ئەو دوو مامۆستایە، سەرپەرشتیارە کەی بەرزللە بدایە.
شێرزاد عەزیز
سەرنووسەری مالمۆکورد
