بەرژەوەندی حیزبی و شەخسی تا رادەیەک لە ناو کۆمەڵگەی کوردەواری وحیزب و لایەنەسیاسییەکاندا گەشەی کردووە، کە بەرژەوەندی نەتەوەیی بە عەقلییەتێکی نەتەوەییەوە تەنیا پێت گەلێکن کە یارییان پێدەکرێت.
بەداخەوە ئەو یارییە نە لە رووی عقلییەتێکی سیاسییەوەیە، نە، نەتەوەیی، هەر وڵات و حکوومەتێک لە هەر گۆشەیەکی ئەم جیهانە خاوەنە یاسا و ریسا خۆیەتی، یاسا ورێساش هەست و سۆز لە خۆ ناگرێت پێویستە پەیڕەو بکرێت.
سەرەتا پێویستە ئاماژە بەوە بکەم دڵگرانم بە دەست بەسەرکردنی هەر چالاکێکی سیاسی و مەدەنی لە هەر گۆشەیەکی ئەم جیهانە، ئەوان هەڵگری ئازارەکانی یەک نەتەوە یا کۆمەڵگەن، بەڵام ئێمە وەک کورد پێویستە واز لە نا واقعەکان بێنین و راستییەکان قەبوڵبکەین، ئەوەی کە حاشا هەڵنەگرە بۆ بە رێوەبەرایەتی هەر وڵات و کۆمەڵگەیەک چ فیدڕاڵی چ غیرە فیدڕاڵی، یاسایە.
کەوابوو پێویستە سەروەبوونی یاسا بە ئەمرێکی واقیع بزانین.
ئەوەی کە کۆماری ئیسلامی ئێران دەستی داوەتە قەتڵ و عامی زیندانیانی سیاسی و مەدەنی هیچ جێگای گومان نییە و، لە روانگەی هەر تاکێکی کورد و نیشتمانپەروەرەوە، ئەو کردەوەیەی حکومەتی ئێران مەحکومە و پێویستە شەرمەزار بکرێت.
بەڵام،
ئەم مەحکوم کردنە بە چ نرخێک، ئایا خسارەکان دەناسین ؟ ئایا بە بەردەبارانکردنی کۆنسوڵخانەی کۆماری ئیسلامی لە پایتەختی هەرێمی کوردستان، ئەو رێژیمە دەرووخێت؟ یان دەست بەرداری کردەوە دژە مرۆییەکانی دژ بە نەتەوەی کورد دەبێت؟.
بێ گومان هیچ کام لەمانە روونادات و، کۆماری ئیسلامی ئێران لە ئاستێکی دیکەدا یاری سیاسی دەکات، کە بەداخەوە گەنج و لاوی کورد بە حیزبە سیاسییەکانیشەوە بگرە، ئیستاشی لە گەل دابێت هەستیان پێنەکردووە و هەستیشی پێناکەن، کە خۆیان بوونەتە ئەبزارو دەستەمۆی کام وڵات و لایەنێکی سیاسی .
بزووتنەوی نەتەوەیی کورد بە دژی داگیرکەرانی کوردستان خاوەن ئەزموونێکی مێژووییە، ئەو عەقڵییەتە سیاسییەی کە داکۆکی لە مافی کورد دەکات و رەوڕەوی بزووتنەوەی کۆمەڵگەی کوردی بەرەو ئاراستەیەکی شارستانی و ئەمڕۆیی دەبات، بە دڵنییاییەوە لەوە تێدەگات کە هەر کردەوە یا دژە کردەوەیەکی خۆ رسک بە دژی ناوەندە دەسەڵاتدارەکانی داگیرکەرانی کوردستان، کە هیچ هێز و پشتیوانێکی تایبەتی نەبێت، ناگاتە ئاکام و بە بێ دەسکەوت و نەزۆکی دەمێنێتەوە .
خەباتی نەتەوایەتی بۆ دەستە بەر کردنی مافە زەوتکراوەکان لەم سەردەمەدا لە ئاستێکی دیکە دایە، ئەگەر تا دوێنی توندووتیژی و وێرانکاری بۆ دەسکەوتەکان دەوریان دەبینی، ئەوە ئەمرۆ رێگا چارەسەرە سیاسییەکانن کە ئاڵگۆڕ لە ناوچەکەدا پێکدێنن، کە هیوادارم تاکی کورد و نوخبەی کورد چی دیکە نەبێتە ئەبزارێک بۆ بەرژەوەندی زلهێز و لایەنەسیاسییەکان و بە عەقڵییەتێکی نەتەوەییەوە بڕوانە هەر رووداو و گۆڕانکارییەکی پەیوەندیدار بە نەتەوەکەمان .
هەر چەند حاشا لەوەش ناکرێت کە هەڵەی سیاسی هەبووە و هەیە لە لایەن سەرجەم حیزبە سیاسییەکانی کوردستانەوە، ئەوە ئەرکی نیشتمانی هەر کاتێکی کورد بە گشتی و نووخبەی سیاسییە بە تایبەتی کە بە پرۆژە و پلاتفۆڕمەوە، بە شێوەیەکی سەردەمیانە بەشداری پرۆسکە بن و، رێگر بن لە دووپاتکردنەوەیان، نەک بە بێ هیچ پرۆژە و پلاتفۆرمێک، بە شێوەیەکی خۆرسک دەسەڵاتی سیاسی حکوومەتی کوردی بخەنە ژێر پرسیارەوە، باجی ئەم هەڵەیە دەسەڵاتی سیاسی دەتیدات، کەوابوو پەیڕەو کردنی یاسا دوور لە عەقڵییەتی نیشتمانی نییە، بەڵکووئەوە نەبوونی عەقڵییەتێکی نەتەوەییەوە کە دەسەڵاتی سیاسی کورد ناچار بە باجدان دەکات.
١١/١١/٢٠١٣
ئهو بابهتانهی له کوردستان نێت دا بڵاودهکرێنهوه، بیروبۆچوونی خاوهنهکانیانه، کوردستان نێت لێی بهرپرسیار نییه.