بەندی عەلی

که‌زی
ئاڵای چه‌نگاوه‌رێکی ئازاده‌
نه‌ ڕه‌شه‌بای

خه‌ڕه‌نده‌کانی عه‌یب و عار
ئه‌ی ترسێنێ
نه‌ حیشمه‌تی هیچ له‌چکێ
له‌که‌روێشکه‌ی ده‌مه‌و به‌هارانی ئه‌کات
نه‌مقه‌ستی کولی فه‌تواش
له‌سه‌مای فڕینی ئه‌خات

,,,,,,,,,,,,,

چاو
ده‌روازه‌ی باخی عیشقه‌و
برۆ ...سنوور
ئه‌گه‌ر ڤیزه‌ی دڵی ژنێکت پێ نه‌بێ
مه‌حاڵه‌ له‌شکری برژانگ
ببه‌زێنی و سان به‌نێویا
به‌ره‌و به‌هه‌شتی خۆشنودی
بکه‌ی ..عبوور

,,,,,,,,,,,,,
چاو ..شێوه‌زاری خێڵێکی
کێو نشینی هه‌وارێکی چه‌په‌ر نیه‌
زمانی ..هه‌موو دنیایه‌
ئه‌وه‌ی له‌و زمانه‌ نه‌گا
دڵنیا بن ..نابینایه

,,,,,,,,,,,,,

چاو ..هه‌ندێ جار
به‌ده‌ست ڕاوچیه‌کی شه‌نگه‌وه‌
ڕمێکی نه‌رم و نیانی به‌ڕه‌ونه‌قه‌
وه‌لێ به‌یه‌ک گوژمی غه‌مزه‌
هه‌پروون به‌هه‌پروونی ئه‌کا
کام زه‌نگۆڵه‌ی
دڵی ئاسنینی ڕه‌قه‌

,,,,,,,,,,,,,,,

لێو ..په‌ڕه‌یه‌کی تایبه‌تیه‌و
هیچ ووشه‌یه‌کی تری ساده‌
له‌سه‌ری تۆمار ناکرێ
غه‌یری کۆدی نهێنی ماچ

، ، ، ، ، ، ، ، ، ،

لێو ..ڕه‌هێڵه‌ی
هه‌زارو یه‌ک خواست و نیاز
دبارێنێ، به‌ڵام هیچیان
په‌ڵه‌ به‌ده‌شتی دڵ ناده‌ن
وه‌کو وه‌شتی ..خۆشم ده‌وێی

، ، ، ، ، ، ، ، ، ، ،
ئه‌و ده‌مه‌ی گوڵ
بۆ هه‌نگێکی غه‌ریب ئه‌دوێ
ئه‌م هه‌نگه‌ پیره‌ی دڵی من
ژه‌هری ئیره‌یی لێ ئه‌ڕژێ

، ، ، ، ، ، ، ، ، ، ، ، ، ، ،

خۆزگه‌ به‌ر له‌سفری زایین
بمناسی بای
ئاخر گوڵم
ده‌ترسم یه‌ک ته‌مه‌ن به‌شی
عیشقت نه‌کات

، ، ، ، ، ، ، ، ، ، ،

گه‌مه‌یه‌کی ترسناکه‌

له‌گه‌ڵ گڕدا
هه‌ندێ جار ..عیشق
......
سه‌مایه‌که‌ له‌سه‌ر کێشی نوکی په‌نجه‌
به‌نێو پارچه‌ ووردو خاشه‌کانی دڵا
هه‌ندێ جار ..عیشق
....
زۆربانبازیه‌کی سه‌خته‌
له‌گه‌ڵ زریانی قه‌ده‌راو هه‌ر دۆڕاوی
هه‌ندێ جار ..عیشق
....
توله‌ ڕێیه‌کی مین ڕێژه‌
به‌ره‌و دوا سه‌نگه‌ری مردن
هه‌ندێ جار ..عیشق
....

ئه‌و په‌ڕی بێ ..ماناییه‌
داوای عوزرخوایی لێکه‌ی
کاتێ که‌دێ
هه‌ندێ جار ..عیشق
.....
دوا ترۆپکی سه‌رشێتیه‌و
نه‌ته‌فسیری هه‌یه‌، نه‌هۆ
هه‌ندێ جار ..عیشق
....
وه‌لێ جه‌نگێکی پیرۆزه‌و
ئه‌بێ ..بکرێ
هه‌ندێ جار ..عیشق

، ، ، ، ، ، ، ، ، ، ، ،

به‌به‌ر چاوی
ره‌قیبانی دۆزه‌خه‌وه‌
سوپای ماچت بۆ ده‌نێرم
له‌دێراوی ته‌وێڵته‌وه‌، داگیری که‌ن
تا ئه‌وپه‌ڕی باخی جه‌سته‌ت
جا چی ئه‌که‌ن، ده‌با بی که‌ن
چش ..به‌دۆزه‌خ
پاش فڕینی په‌ڕه‌سێلکه‌
بێزاره‌که‌ی روح بۆ ئاسمان
باوه‌ ناکه‌م دۆزه‌خێکی دیکه‌ هه‌بێ
قێزه‌وه‌ن تر له‌جیهانی
ڕه‌قیبانی ماچ و نیگا

، ، ، ، ، ، ، ، ، ، ، ، ، ، ، ، ، ،
هه‌ندێ جار، عیشق
زامێکه‌، قه‌تماغه‌ به‌ستوو
ئه‌وه‌نده‌ ده‌ستکاری ده‌که‌ین
تاکو دیسان ده‌کولێته‌وه‌و
خوێنی لێ دێ
ئه‌وجا ناچارین لێی گه‌ڕێن
تاقه‌تماغه‌ ده‌کاته‌وه‌
بۆ ده‌ستبازی جارێکی تر

، ، ، ، ، ، ، ، ، ، ، ، ، ، ،

کارم به‌عومره‌وه‌ نیه‌
چه‌ندی ماوه‌و چه‌ندی چووه‌
تا دڵ له‌لێدان نه‌که‌وێ
کانیی عیشقم وشک نابێ
ئاخر گوڵم
پێده‌چێ ئه‌م پله‌ گۆشته‌ی
نێو سنگی من ..ترومپا بێ

، ، ، ، ، ، ، ، ، ، ، ، ، ، ، ،
پێده‌شتی عیشق
تێڕامانه‌ له‌قامه‌تی به‌رزی جوانی
بناری عیشق
خولیایه‌کی شێتانه‌یه‌ بۆ هه‌ڵزنان
ناوقه‌دی عیشق
ئالووده‌بوونه‌ به‌میسکی روحێکی تر
ترۆپکی عیشق
نزیکبوونه‌وه‌یه‌ له‌خودا

ده‌تۆش ئه‌ی یار

به‌قه‌د په‌نجه‌ تووته‌ی خودا

 به‌خشنده‌به‌و لێم ببووره‌

دڵم مناڵێکه‌ ..لاسار

، ، ، ، ، ، ، ، ، ، ، ، ، ، ، ،
لێم بمبووره‌ ..ئه‌ی میهره‌بان
ئه‌گه‌ر نه‌متوانی ئه‌م مانگه‌ به‌ڕۆژو بم
ئاخر من زوهدیه‌کی به‌ر
قاپییه‌کی عه‌رشه‌که‌ی خۆتم
ته‌نیا ماچی لێوی گوڵێ
زادی سوبح و ئێوارانمه‌
له‌نووری عیلم و عیرفانت
خودا ..تیشکێ
بڵێی ڕۆژو
به‌ماچی لێوی گوڵ بشکێ ؟

، ، ، ، ، ، ، ، ، ، ، ، ،

ئه‌مشه‌و دڵم هه‌نارێکی
ووشکهه‌ڵاتووی برینداره‌
به‌حاڵ به‌چڵی گیانمه‌وه‌
ماوه‌ته‌وه‌، ئه‌و بێ عاره‌
مه‌ده‌د ئه‌ی په‌ری مه‌رگ هاوار
به‌لوتفتی خۆت له‌لام لاده‌
قومێ میهری تیا نه‌ماوه‌
کوپه‌ی ئه‌م ژینه‌ به‌رباده

، ، ، ، ، ، ، ، ، ، ، ، ،

ئه‌مڕۆ له‌ئاپۆڕه‌ی شارا
چاوێکم کردبووه‌ هه‌زار
به‌شوێن که‌سێکا، ئه‌گه‌ڕام
پێش چه‌رخی به‌ردینی سه‌فه‌ر
لێم وون ببوو
هێدی هێدی
به‌جاده‌کانی خه‌یاڵا ئه‌ڕۆیشتم
هه‌ندێ شوێنم به‌بۆنی یاد دۆزیه‌وه‌
وه‌کو په‌ڕه‌ی
گوڵه‌ هه‌ڵوه‌ریوه‌کانی ماچه‌کانم
به‌په‌نجه‌ره‌ی ماڵی هاوسێکه‌مانه‌وه‌و
گه‌ڵا ووشکه‌وه‌بووه‌کانی نیگام
له‌به‌ر ده‌رگای
مه‌کته‌بی مه‌ڵکه‌ندی کچان
وه‌لێ، ئه‌وه‌ی نه‌مدۆزیه‌وه‌و
له‌وێ نه‌بوو
هه‌ر گه‌نجه‌ باریکه‌له‌که‌ی
روحی خۆم بوو

….....

ماتماتیک
من ته‌مه‌نم نیو سه‌ده‌یه‌و
شه‌ست و پێنج کیلۆیه‌، کێشم
به‌ژنیشم مه‌ترو حه‌فتایه‌
وه‌لێ عیشقم
بۆ ئازادی و بۆ یه‌کسانی
بێ پایانه‌و ..دوایی نایه

….......

چ کاره‌ساتێکه‌، هاوڕێ
شکاتی ده‌ردی ته‌نیایی به‌رینه‌ لای
خودای له‌خۆمان ته‌نیاتر

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.{jcomments off}

کتێبه‌کان مه‌سوتێنن
نه‌با عاریفێکی ئیمان
لێمان بێته‌ ده‌نگ و بڵێ
ئه‌ی دوژمنه‌کانی یه‌زدان
ئێوه‌ کتێبی پیرۆزی
هه‌زارو یه‌ک شه‌وه‌ی عومری
منتان. . . سوتان

کتێبه‌کان مه‌سوتێنن
هه‌ر ئه‌وانن
شایه‌تیمان له‌سه‌ر ئه‌ده‌ن
هه‌ر له‌یه‌که‌م دزینه‌وه‌
دزینی ماچێکی په‌له‌ی
کچه‌ هاوسێ
بۆ دزینی نیگای حه‌رام
له‌هه‌موو کچانی گه‌ڕه‌ک
تادزینی دڵی هه‌موو کچانی شار
له‌وێشه‌وه‌ بۆ دزینی
هه‌موو خه‌ونه‌کانی وه‌ته‌ن
کتێبه‌کان مه‌سوتێنن

هه‌ر ئه‌وانن
شایه‌تیمان له‌سه‌ر ئه‌ده‌ن

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

 

-1-
گوڵ که‌ماوه‌ی به‌سه‌رئه‌چێ
له‌شه‌رما وه‌ک زه‌ڕنه‌قووته‌
له‌جێی خۆیا
سیس ئه‌بێت و هه‌ڵئه‌کوڕمێ
نان، که‌ماوه‌ی به‌سه‌ ئه‌چێ
خۆی ڕه‌ق ئه‌کاو که‌ڕوو ئه‌گرێ
نه‌با مناڵێکی برسی ده‌ستی باتێ
گیان که‌ماوه‌ی به‌سه‌رئه‌چێ
تاکو زووتر بیباته‌وه‌ به‌ره‌و لای خۆی

بۆنی ئه‌گاته‌ لوتی خوا
به‌ڕێز . . ئه‌ی مروه‌تی تۆ کوا

-2-
دڕک . . کاتێ
یه‌خه‌ی دڵدارێ به‌رئه‌دا
دوا دڵۆپی خوێن ڕژابێ
خه‌فه‌ت . . کاتێ
له‌سه‌ر سینه‌ دائه‌به‌زێ
دوا هه‌ناسه‌ی لێ بڕا بێ
قوڵپی گریان
کاتێ گه‌روو به‌جێ دێڵێ
سه‌دا، نوزه‌ی تیا نه‌مابێ
پڵنگ . . کاتێ
که‌ڵبه‌ له‌گه‌ردنی نێچیر ئه‌کاته‌وه‌
له‌فڕینی مه‌لی روحی دڵنیابێ
ئه‌وا ئێمه‌یش، چاومان ڕوا
به‌ڕێز . . ئه‌ی مروه‌تی تۆ کوا

-3-

من ده‌نگ ئه‌ده‌م
تۆ ده‌نگ ئه‌ده‌ی
ئه‌و ده‌نگ ئه‌دا
که‌چی دوایی
هه‌ر به‌نوکه‌ قه‌ڵه‌مێکی
کاک ته‌وافق
ده‌نگه‌کامان
هه‌ر هه‌موویان
به‌هی یارو نه‌یاره‌وه‌
به‌نه‌غمه‌ی سازو تاره‌وه‌
ده‌بنه‌ په‌پووله‌ پاییزه‌ی
ده‌م ڕشه‌با
ئیتر ئه‌ی گه‌ل
بۆ که‌ساسی
هه‌موو دنیا
له‌ئێمه‌وه‌ بۆیان ئه‌چێ
شازی مارکه‌ی
دیموکراسی

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

ئه‌گه‌ر شاعیر
سه‌رۆکی ئه‌م هه‌واره‌ بێ
قه‌سیده‌یه‌ک

ده‌کات به‌دستووری ووڵات
عیشق، به‌مه‌نهه‌جی خوێندن
جوانییش، به‌نوێنه‌ری میلله‌ت
له‌کۆمه‌ڵه‌ی نه‌ته‌وه‌ یه‌کگرتووه‌کاندا
ئه‌گه‌ر شێوه‌کارێ ببێ
به‌سه‌رۆکی په‌ڕله‌مانی ئه‌م هه‌واره‌
هۆڵی په‌رله‌مان ئه‌کاته‌ گه‌له‌ریی ره‌نگ
بۆ هه‌ر کوێیه‌ک سه‌فه‌ری کرد
تابلۆیه‌ک به‌دیاری ده‌بات
په‌ڵه‌ چڵکنه‌کانی سه‌ر
دیواری جه‌نجاڵی مێژووش
به‌فڵچه‌ی نه‌رمی داهێنان ده‌سڕێته‌وه‌
ئه‌گه‌ر میوزیک ژه‌نێ ببێ
به‌سه‌رۆکی ئه‌م حوکمه‌ته‌ش
شمشاڵ ده‌کات به‌وه‌زیری کشتوکاڵ و
سه‌نتوور به‌سه‌رۆکی دادو
ساز به‌وه‌زیری عیشق و ڕاز
گۆرانی بێژێکی ڕه‌سه‌ن
ده‌کات به‌فه‌رمانده‌ی هه‌موو
سوپای وه‌ته‌ن
باوه‌جو پێم بڵێن، یاران
ئه‌میان به‌هتره‌ . . یا ئه‌ویان

، ، ، ، ، ، ، ، ، ، ، ، ، ، ، ، ، ،

ئای، چ سوخریه‌تێکه‌ گوڵم
قه‌سابه‌کان
چه‌قۆکانیان به‌ددانه‌ وورده‌کانی
به‌رخه‌کان ده‌م زه‌رد ئه‌که‌ن و به‌رخه‌کانیش
بزه‌ی عیشقیان بۆ ده‌نێرن

ئای، چ سوخرییه‌تێکه‌ گوڵم
ڕاوچیه‌کان
چاوی چه‌پیان نوقاندووه‌و
چاوی راستی زه‌قیان له‌سه‌ر
قه‌ره‌وڵی تفه‌نگانه‌
کۆتره‌ خۆش خه‌یاڵه‌کانیش
غه‌مزه‌ی غه‌زه‌ل
چاوی عیشقیان لێدائه‌گرن

، ، ، ، ، ، ، ، ، ، ،

به‌خه‌و بڵێن، بێ خه‌م وه‌ره‌
هه‌وار کش و بێ ئاگایه‌
به‌شه‌و بڵێن شاگه‌شکه‌بێ
ئیتر لێره‌ . . خۆر هه‌ڵنایه‌
به‌خه‌م بڵێن، لێی ڕاکشێ
جێی نه‌رم و نۆڵ ئاماده‌یه‌
سامی شان و شکۆت نه‌بێ
والی پیاوێکی ساده‌یه‌
باتووتیه‌کان قڕو قه‌پ که‌ن
چیانه‌ ئه‌م هاتوو هووته‌
بۆنازانن که‌ته‌یری گول
عیشقی داری ژه‌قنه‌بووته‌؟
به‌ (با) ڵێن، جوڵه‌ نه‌کات
خۆریش باچاو بنوقێنێ
به‌رووباریش بڵێن بێده‌نگ
والی سه‌رخه‌وێک ئه‌شکێنێ

، ، ، ، ، ، ، ، ، ، ، ، ، ،

به‌ر له‌ده‌نگدان، به‌ڵێنه‌کان
ماچی ته‌ڕو گه‌رم و نه‌رمن
فه‌رهاده‌کان، به‌هه‌وادا
یه‌ک له‌سه‌ر یه‌ک
بۆمانی هه‌ڵئه‌ده‌ن، به‌کۆ
به‌ڵام ئه‌ی گوڵ
چونکه‌ هه‌واری ئێمه‌ ڕووی
له‌ده‌ربه‌ندی ڕه‌شه‌بایه‌
پاشی ده‌نگدان
تاقه‌ ماچێک . . ناگات به‌تۆ

به‌ر له‌ده‌نگدان، به‌ڵێنه‌کان
په‌شمه‌کی نه‌رم و شیرینن
هه‌ر ئه‌وه‌نده‌ی که‌وتنه‌ سه‌رزار
ئه‌بنه‌ لیقاوی ناو ده‌م و
دوای ده‌نگدانیش . . به‌ژه‌هری مار

، ، ، ، ، ، ، ، ، ، ، ، ، ، ، ،

پرسه‌ نامه‌
پاش ململانێیه‌کی زۆر
له‌گه‌ڵ ده‌رده‌ پیسه‌که‌یا
که‌هه‌ر له‌دایک بوونه‌وه‌ له‌گه‌ڵیا بوو
ئه‌مڕۆ کوڕه‌ ئیفلیجه‌که‌ی نیشتمانم
چاوی لێکناو . . پرسه‌که‌شی
هه‌ر له‌هۆڵی ئاهه‌نگه‌کانی په‌رله‌مان
بۆ ئه‌گێڕین
هه‌زار ره‌حمه‌ت . . له‌گۆڕه‌که‌ت
دیموکراسی . . ئاگاداری
هاتن بۆ هه‌مووانه‌، به‌ڵام
به‌ ئیجباری

، ، ، ، ، ، ، ، ، ، ، ، ،

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.