کوردستان نێت نێتی هەمووانە
پشتی نڤیسینا ڤی بابهتی مه بهیست فروکێن رژیما ئاکهپێ بفهرمانا ئهردوغان هێرش کریه سهرههرێما قهلهبانا دهڤهرا شهرنهخێ و 35 وهلاتیێن سڤیل شههید کرینه، لهوما تهڤی تاوانبارکرنا ڤێ هێرشا هوڤانه رژیما ئهنقهره شهرمزاردکهم، دبینم ئهڤهژی خهلهکهکا دیه ژ هێرشێن داگیرکهرێن کوردستانێ لسهر گهلێ مه و دڤێ سازی و رێکخستنێن بزاڤا رزگاریخوازا کوردستانێ ههلویستهکێ نهتهوهیی لههمبهر ڤێ کومهلکوژیێ نیشان بدهت
هاتنا سالا2012ێ پیروزبیت. . سالا نوی سالا خوشی وسهرفرازیا مهههمیا بیت، یا ههمی کوردپهروهرا وپاشی یا ههر چل ملیون کوردا بگشتی، ههروهسا سهرێ سالا ههمی مروڤێن باش لجیهانێ و پاشی یا ههر حهفت ملیارا ههمیا پێکڤه. راسته هندهک دێ بێژن سهرێ سالا مهنینه و فلان و بێڤان بهلێ هندهک تشت ههنه بدهستێ مه نینن، دونیا یا بویه گوندهکێ بچویک و هێدی هێدی تشتێن ههڤپشک پهیدا دبن کو سهرسال ئێک ژوان تشتانه. ههرچهنده ئهڤه رێکێ لمه کوردا ناگریت کو جهژنا نهڤروزێ لروژا 21ێ ئادارێ ژی وهکی سهرسالا کوردی لههڤدو پیروزبکهین و وێ بۆنێ بلند راگرین. . . یانکو تایبهتمهندیا خوهیا نهتهوهیی بپارێزین ود جیهانگیریێ دا ژی پشکداربین.
یا باشه مروڤ لپاش خوه بنێریت ورویدانێن سالا بهرێ، 2011، بینیته بیرا خوه. دئاستێ جیهانی دا لههی و لێمشتا لیابان و ئهمریکا گهلهک زیانێن جانی و دراڤی گههاندن وان وهلاتان. لسهر ئاستێ ههرێمێ ژی بهارا عهرهبا هورره وباهوزهکا توند بسهر وهلاتێن عهرهبا دا بهردان و ههتا نهو سهری سێ سهروک کومارا خواریه، زهین ئهلعابدین و موبارهک و قاززافی، وسهرێ دویاژی چهماندیه عهلی عهبدوللا صالح و بشار ئهلئهسهد، ژبلی کو سهرێ ههمی دیکتاتورێن دهڤهرێ ئێشاندیه و خهو لوان کریه قهتلازی.
لسهر ئاستێ کوردستانێ :عهردههژا وانێ برینهکا کویر ددلێ کوردان دا بجی هێلا، ئهرێ ئهو رویدانهکا سروشتی بوو بهلێ سهرهدهریا حکومهتا تورکا بئاوایهکێ نهمروڤانهبوو و کین و دلرهشیا دهستههلاتا داگیرکهر برینێن کوردا کویرترکرن! بهلێ ژلایهکێ دیڤه ژێ ئێکهتیا کوردا و ههستێ بلندێ نهتهوهیی ژی نیشاندا، ژههرجار باشتر کورد بههڤرا دههوارا برایێن خوه چوون و ئهو بێخودان نههێلان.
دسالا 2011ێ دا وهکی ههرسال رژیمێن داگیرکهر بههرئاوایهکی پیلان وهێرش لسهر کورد و کوردستانێ بهردهوام کرن. لباشور رژیما بهغدا هێشتا چارهنڤیسا کهرکوک و دهڤهرێن ڤهقهتاندی و چهندین پرسگرێکێن گرنگ لههرێما کوردستانی چارهسهرنهکرینه و بههمی رێکا دژایهتیا پێشکهفتنا پرسا کوردی دکه. لباکور پشتی لههڤکرنا کوردا وسهرکهتنا وان دههلبژارتنێن پهرلهمانی دا دهستههلاتا ئهنکهره دهستهاڤێته هێرشێن لهشکری و بکارئینانا چهکێ کیمیایی و ئوپهراسیونێن گرتنێ لدژی چالاکڤانان و بههزاران ولاتپارێزێن سڤیل هاڤێتن بنێ زیندانا. لروژههلاتا کوردستانێ ژی رژیما کهڤنهپهرستا تاران ههتا نهو بهردهوامه لسێدارهدانا چالاکڤانان و ئینکارکرنا ههمی مافێت کوردا. لروژاڤا کوردستانێ ژی نه رژیما بهعسی یا دهستههلاتدار و نه بهرههلستکارێن وێ یێن نفشپهرهست و پاشڤهرو دان بمافێن گهلێ کورد نهداینه.
لههمبهر ڤێ رهوشێ گهلێ کورد ژبهرێ باشتر و هشیارتره، خهباتا نهتهوهیی بهردهوامه دههمی واران دا و بههمی ئاوایان، تهڤی ههول و فشارێن رژیمێن داگیرکهر وتوپبارانێن هێزێن ئیرانێ و بومبهبارانێن فروکێن تورکی لسهر گوند و باژێرکێن باشورێ کوردستانێ وان نهکاری کوردا بهردهنه ههڤ و شهرێ براکوژیێ لناڤا هێزێن کورد دا دوباره بکهن. پهیوهندی و هاریکاریا دناڤبهرا هێزێن ههرچار پارچان دا بهێزتر بوینه ژ جاران و ئامادهکاریا کونگرهکا نهتهوهیی ژی تێ کرن.
دڤێ رهوشا جیهانێ و ههرێمێ و کوردستانێ دا یا فهره گهلێ کورد بگشتی و بزاڤا رزگاریخوازا کوردستانێ بتایبهتی چهند رویدانێن گرنگێن وهکی ڤهکێشانا هێزێن ئهمریکا لعیراقێ و سهرهلدانێن گهلێن ههرێمێ لدژێ دهستههلاتێن دکتاتور و تێکچونا پهیوهندیێن ئیران و تورکیا و یێن تورکیا و ئیسرائیل ههروهسا بهێزبونا ئیسلاما سیاسی لدهڤهرێ بهرچاڤ بگرن ولگورهی بهرژهوهندیێن نهتهوهیی پلان و ستراتیژیا دانن، بهری ههرتشتهکی ئێکهتیا نهتهوهیی پێکبینن و داخازوئارمانجێن گهلێ کورد راگههینن، وهکی ههرکهس ژی دزانیت گهلێ کورد خهبات و قوربانیێن مهزن داینه ژبو ئازادی و سهرخوهبونا کوردستانێ لهوما ژی بلندکرنا دروشمێ ئاڤاکرنا کوردستانهکا سهربخوه بپێویست دبینین. ژبو ڤێ چهندێ ژی ژبلێ ئێکهتیا نهتهوهیی رێکخستن و ئامادهکاریێن ناڤخوهیی پێویستن، دڤێ هێز و رێکخستنێن کوردستانێ چاکسازیێن بهرچاڤ بکهن و تاکێ کورد ژی ببهرپرسیاتیێن خوه راببه.
بلا سالا 2012 ێ ببه سالا ئێکهتی و براتیا کوردا و بلندکرنا بیرا نهتهوهیی.
بلا سالا2012 ی ببه سالا دازخوازا کوردستانا سهربخوه.
بلا سالا 2012 ێ ببه سالا چاکسازیا ناڤخوهیی و دلسوزیێ بو دوزا پیروزا کوردستانێ.
لسهرێ سالا 2012 ێ، وههرسال، هزار سلاڤ و رێز ژبو شههیدێن پاکرهوان، ژبو گرتیێن دزیندانان دا و ههمی تێکوشهرێن ئازادیا کورد و کوردستانێ.
سوید 20111229 بێستون بهرواری
ئهو بابهتانهی له کوردستان نێت دا بڵاودهکرێنهوه، بیروبۆچوونی خاوهنهکانیانه، کوردستان نێت لێی بهرپرسیار نییه.