ئاژانسا خهبهر و دویڤداچوونا کوردستانێ پهیامنێر ڕاگههاند کو ئۆباما سهرۆکێ هلبژارتیێ ئهمریکا سهرپێچی یا جگارهکێشانێ د کۆچکا سپی دا ناکت. "بڕیارا 
قهدهغهکرنا جگارهکێشانێ د ناڤ کۆچکا سپی دا، هیلاری کلینتۆن ێ دهرکربی، ئهوا کو دێ پۆستا وهزارهتا دهرڤه یا ئهمریکا وهرگریت" بهری 6-7 ساڵا ئهز چووم دهف هندهك ههڤالا ب سهرهدان، ل جهێ وان یێ شۆلی و وهکی ڕوتین یا ل سهر دیوارێت ههمی ئۆدا نڤیسی (جگارهکێشان قهدهغهیه) و سیمبۆلێ نهکێشانا جگارێ یێ ل سهر دایی. چهند کهسهکێت دی ژی وهکی من د بێ شۆل بین و ل وێرێ ب تنێ بۆ مهرهما سهرهدانا وان ل وێرێ دئامادهبوون و دیار بوو کو کهسهک ژ وان ژ ئهوروپا هاتبوو، لهوما پشتی مه پێکڤه چا ڤهخواری، دهست دا پاکیتا خوه یا جگارا و قهستا دهرێ کر دا کو جگارێ ل دهرێ بکێشت. ڕێڤهبهرێ وێ ژوورێ وهک ڕێزلێنان گۆتێ: برا، ل ڤێرێ جگارا خوه بکێشه! بهلێ وی قهبیل نهکر و چوو ژ دهرڤه.
ئهز دبێژم هێشتا مێهڤان د ژوورڤهبوو، ڕێڤهبهری پاکیتا خوه یا جگارا ژ چهکمهچێ دهرینا و جگارهك کر د ناڤ لێڤێت خوه دا و ب چهقماقهکا پێشکهفتی جگارا خوه بهردایێ و دوو سێ ملقێت باش لێدان دا زوی بزۆتێ جگارا وی هل ببیت.
دویکێلێ جگارا وی، وهکی دویکێلێ ئاگرێت پویش و پهلاشا کو د ناڤ زهڤیا دا، ل بهارا خوهش دکن ببوو تهمه دویمان. من ژی ژ ئاقل سڤکی یا خوه گۆتێ: ئهرێ کهکۆ، ما نه جگارهکێشان قهدهغهیه ل ڤێرێ؟ گۆت: نهخێر، نه قهدهغهیه. جارهکا دی من گۆتێ: پا ئهو چی سیمبۆل و نڤیسینه ل هنداڤ سهرێ ته؟ گۆت: ئهو بۆ تهیه، نه بۆ من.
ئهڤ گۆتنا من ل سهری نڤیسی، نه ل جههکێ ب تنێ، بهلکو ل زۆربهیی دام و دهزگا و لق و مهڵبهند و لیژنه و کومیته و ڕێکخراو کهرت و.. هتد یا ڕوی دایی بهلێ ژسهد جارا جارهکێ تێت بهرچاڤکرن.
ڤێجا ل ڤێرێ من دڤێت بێژم ب ڕاستی کهس ل کوردستانێ خودان و پشتهڤانێ یاسایی نینه. ههر ئهو کهسێ د ئۆدێ دا ب خوه و ب کهیفا خوه یاسایی د دهینیت و ب خوه ژی سهرپێچیێ دکت، چونکو د وێ ژوورێ دا کهس ژ وی مهزنتر نینه لهوما ژی خوه د سهر یاسایی ڕا د بینت.
ڕێزلێنانا یاسایی چێتره ژ ڕێزلێنانا ههڤالهکێ، وهکی ههمی د زانن کو ئهمریکا زلهێزترین وهڵاته و ئۆباما سهرۆکێ وێ یه، بهلێ نه چونکو ئۆباما سهرۆکه، دێ پێشێلکاریێ و بێ ڕیزیێ ل خهلك و یاسایێ وهڵاتێ خوه کت. ئهفلاتۆن د بێژت: گوپیتکا ڕێزلێنانێ ئهوه کو مرۆڤ شهرمێ ژ خوه بکت.
هیڤی یه ئهڤ گۆتنه بۆ مه ببت سهربۆڕ.