بهری رۆژهکێ ژ رۆژا رۆژنامهگهریا کوردی من تلهفونا رۆژنامهنڤێسهکێ گهلهک عهزیز کر و من گوتێ سوباهی رۆژا رۆژنامهگهریا کوردیه و ئهس ئهڤێ رۆژێ ل ته پیروز دکهم، ئهوی ژی بهرسیڤا من دا و گوت، ههما جارێ من باوهری ب ئهڤێ رۆژێ نینه و دلێ من ژی ئێکسهر شکهست و پاش گوت" من باوهری ب سالڤهگهریا رۆژنامهگهریا کوردی نینه!!! بهلکۆ من باوهری ب رۆژنامهنڤێسان ههیه.
ل کوردستانێ ژی نێزیک 900 رۆژنامه و گوڤار و رادیو و تلهڤزیون ههنه و ههر ئێک ژ ئهڤان دهزگههان دچارچوڤێ بیر و بۆچوونێن سینوردارکری کاردکهن و ئهگهر پرسیار ژی بکهی زووریا وان خوه ب رۆژنامهنڤێسێن باش و ئهکادمی ددهنه ناسکرن... من ژی ئهڤ سال هزر کر کو دێ گاڤێن نوو دبوارێ رۆژنامهگهریا کوردی دا هێنه هاڤێژتن، بهلێ من گوتار و نڤێسین و بهرنامه و بابهتێن گهلهک عنتیکه دیتن!!! ئهو ژی ههر دهزگهههکێ راگههاندنێ بهرنامهکێ تایبهت دارشتبوو و دئهڤێ رۆژێ دا ب تۆندی هێرشێ کرنه سهر لاوازیا کارێ رۆژنامهگهریا کوردی و هندهکا رهخنهیێن دژوار لێگرتن و هندهکا ژی ب کارێن ترسناک دان نیشاندان، ، ههروهها دگوتن براستی بارودووخێ کارێ رۆژنامهگهریی ل کوردستانێ ترسناکه؟؟ براستی ل دهف من ژی ئهڤ ههموو گوتن بۆنه جهێ پرسیارێ و من گوت، ئهگهر ئهڤ ههموو دهزگههێن راگههاندنێ هوسا ترسناک بن و ئهڤ رهخنێن دژوار لێ دهێنه گرتن و ل بهراهیێ کهفتیه بهر هێرشێن رۆژنامهنڤێسان و رۆژنامهنڤێس خوه ههست پێدکهن، باشه پا هاولاتیێ جادێ و خوێندهڤان و بیسهر و بینهر چ ههست بکهن و چ بێژن؟؟ باشه پا کی بهرپرسیاره ژ کارێ راگههاندنێ و وان بابهتێن ترسناک کو بریا کارێ رۆژنامهڤانیێ دگههیته هاوڵاتی؟ یان مادهم ههموو ئهڤ رهخنه و هێرشێن ل سهر کارێ رۆژنامهڤانیێ دهێنه کرن و هندهک ب ترسناک دبینن، ههبوونا ڤان دهزگههێن ترسناک چێه؟؟!! مهترسیا وێ بۆ سهر کۆمهلگههی چیه؟
ئاخر یا رۆهن و ئاشکهرایه ئهگهر کهسهکێ خهتابار بهێته دهستهسهرکرن و ژلایێ پۆلیسان ڤه ڤهکۆلین دگهل دا بهێته ئهنجام دان و ژبلی هرڤه و وێڤه و ئهو کهسێ خهتابار دان پێدانێ ب کریارا خوه بینه، ئهڤه گومان تێدا نینه دڤێت ل گوری یاسایێ بگههیته سزایێ خوه، بهلێ ئهو بهرنامێن ڤان رۆژان ل سهر کارێ رۆژنامهڤانیێ ل سهر شاشه و پهلکێن رۆژناما و رادیویا هاتینه بهلاڤ کرن دهرکهفتیه، بێ ڤهکۆلینا پۆلیسان، کارێ رۆژنامهڤانیێ گۆنههباره و رۆژانه بریا رۆژنامهنڤێسا گونههێن مهزن ددهرههقی خهلکێ دا دهێنه کرن، ئهو ژی بێ کو بهێنه سزادان، باشه کی ژ ههموو ئهڤێ قهلهبالغیێ بهرپرسیاره؟؟!!!