لەم مەنزیلە بێدارەدا، لەم پایزە وشکە بێ رەونەقەدا، بەستەی خەیاڵم بە شێوەیەک چلورە بووە، ‌هەرچەند دەکەم سەرە داوەکانی ئاوازەم لە دەشتای نا هومیدیدا کۆکەمەوە، ئەڵقەو گەوەیان تێخەمەوە و لە بەرچاوی خوێنەری تێنو بە زانین و هەقیقەتی ڕانێم، دۆش دادەمێنم، بۆم شەن و کەو ناکریت و بۆم ناخریتە ناو چوارچێوەی لۆجیک و ئەقڵەوە.
گەردوونی بێ فەر وغەدار وای گاڵداوم، ئەم گیتیە وا چەکوشکاری لە هۆش و هزر و دەرونمدا کردوە، بە تروسکە هەقیەقت دەبینم، خۆم لە تەک خۆمدا مایل بە ناهومێدی و خەم دەبم.
لە هۆشدا ئەم کەتوارە چەندێک دەهێنم و دەیبەم و دەیخەمە ناو تەرازوی هزر و لۆجیک و لێکدانەوە بە پایەی زانست و توێژینەوە، شۆوینیەکی تەڵەکەبازی خەیاڵ فرۆش بێتە جێگای خاوەن زۆرێک، ستمەکارێک، بێگاری ئەم بۆ ئەو، بەرباری ئەم بۆ ئەو، چ دەستکەوت و سود و لەزەتێکی تیادایە، لەم کەشە بەژەدا چ سەوز دەبێت؟.
دروشم و پەیمانی سیاسەتمەداری ئاڵچاخ و کەتوەر و گەنە و گەوەزە و کەمتیار ماریفەت. بەرەو کوێ ماڵمان دەدات. ڕبە و گەزی چی، جاوی چی؟ مافی میللەتی بڕسی و ڕەجاڵ و خەونی قاچاخچی کوجا مەرحەبا.
گفت و بەڵێنی واڵا و بۆش، درۆی بێ رتوش، بنیادەم ناچار دەکات، لە پێناو ژیانکردندا دەست لە شۆوینزمی داگیرکەر پانکاتەوەو ئەویش بە ئارەزوی خۆی بیکاتە بەزم و یاری بە ئەقڵ و خەونەکانی بکات تا تەواو لە هۆش دایدەماڵێت.
ئەقڵی بەتاڵ و گاڵدراو بە کاڵفامی، کە یەکانگیری گەندەڵی و فەرمانرەوایەکی چەوت و بێ روومەت دەبێت، شەقامە رێی گەرانەوە بۆ ژیانی ژێردەستەی زۆر پان و بەرین و خۆش رەو دەبێت، لە کەتواردا ئەمە خەون و خەیاڵی هەموو دایگرکەرێکە.
ئەم کەتوارەیە خەمخانەی هۆش لە خووم دەگرێت، لە ناو جوغزی ناهومێدیدا خولمان دەدا، تلمان دەدا، سەرمان دەنات بە نائومێدیەوە.