٢٠٢٥/٣/١٠
لە رووی فاکتی کاتەوە رێکەوتنی کورد دەگەڵ دەسەڵاتی سووریا لەم کاتەدا خاڵێکی لاوازە بۆ کورد و پشتیوانی و ڕەوایەتی دانە بە هەڵسانەوەی ئەحمەد شرع و حکوومەتەکەی، کە دوێنێ و پێرێ گەورەترین کۆمەڵکوژییان بە بەرچاوی جیهانەوە ئەنجام داوە. .
خاڵی (٢ )ی رێکەوتنەکە نەتەوەی کوردی وەک کۆمەڵگە ناوبردووە، کە دەبوو بە نەتەوە یان گەل ناوبهێنرایە. بە هیچ شێوەیەک وشەی کوردستان ئاماژەی پێ نەدراوە. ئەمە خاڵێکی تری تەواو لاواز و هەڵەیەی رێکەوتنەکەیە لە رووی نەتەوەیی و مێژوویی و جوگرافیاییەوە. .
خاڵی (٤) بەو پەلەیە تێکەڵکردنی دەسەڵاتی مەدەنی و سەربازی دیسان هەڵەیە و بە زیانی کورد دەبێت. جگە لەوەی کورد نزیکەی دەیەیەک زیاتر دەسەڵاتی خۆسەری هەیە، ئاخر بە ریشی کێ رەوایە کچە کوردێکی شەروانی ئازادیخواز و مرۆڤدۆست و بەچکە قاعیدە و داعشێکی تاریکپەرستی لمۆز خوێناوی دژە مرۆڤ وەک یەک دابنرێن؟!. . .
خاڵی(٧) هەڵەیەکی هەرە زەق و زۆر لاوازی ئەم رێکەوتنەیە کە نەدەبوو بخرێتە ناو رێکەوتنەکەوە. ئێستا دروز و عەلەوییەکان داوای فیدراڵی دەکەن، چاودێرانی سیاسی باس لە پارچەپارچەبوونی سووریا و ناناوەندی بوونی دەکەن. .
هەروەها سووریای ناناوەندی و لاواز ستراتیژێکە ئیسرائیل کاری لەسەر دەکات. . جا ئیدیجپرسیار ئەوەیە بۆ کورد لەم هەلومەرجەدا خۆی دەکاتە پاسەوانی سنوورەکانی سووریا؟!. . . رەنگە لە ئایندەیەکی نزیکدا بخرێتە داوێکەوە، تووشی شەڕی ئیسرائیل بکرێت.
لەم رێکەوتنامەیەدا کە دەبێتە نەخشە و بەرنامەی کاری کورد و حکومەتەکەی شرع:
هیچ باسی مافی نەتەوەیی کورد لە دەستووری نوێدا نەکراوە.
باسی سنووری کوردستانیش مادەیەکی رێکەوتنەکە نییە.
سیستەمی فیدڕاڵی و یان ناناوەندی نەخراوەتە بەر گفتوگۆ!
ئاماژە بە پرسەکانی تری ئازادی و دیموکراسی تێدا نەکراوە. . هەتادوایی!!…
لەوە دەچێ شرع زۆری پێویست بەم رێکەتنە بووبێ، بۆیە وا بە هەڵپروزکاوی لە چێشتخانەکەیان ئامادەیان کردووە. کوردیش وەک هەمیشە لە مێژوودا لە گەمەی گفتوگۆدا بەدۆڕاوی دێتە دەرێ. . .
بە هەموو پێوەرێک ماف و پێگە و هێز و هەلومەرجی لەباری کوردستانی و جیهانی و قوربانییەکانی کورد فاکت و هۆکارێکن کە کورد شایستەی مافی زیاتر و چەسپاوتر و مسۆگەرترە. . بۆیە هەر کەمتەرخەمی و کورتهێنانێک لەم بوارەدا دەبێتە بەرپرسیارێتییەکە گەورە لە سەر شانی ئەو هێز و لایەن و کەسانەی بە ئەرکی شیاوی خۆیان ڕانابن. .
بەداخەوە ئەم بەڵگەنامە ئیمزاکراوە، دیکۆمێنتێکی زۆر لاوازە و کەمترین مافی کوردی وەک نەتەوە و نیشتمان لە خۆ گرتووە.
ئەگەر کورد بەو هەموو هێزە سەربازییەوە و نزیکەی سێیەکی سووریای لەژێر کۆنترۆڵدایە، لە ئێستای سووریای لاواز و بێ سووپا و بێپشتیوان و هەڵتەکاوی ئابووری و داڕماوی کۆمەڵایەتی و سیاسیدا نەتوانێ مافە رەواکانی بچەسپێنێ، ئەوە لە هەمان بازنەی داخراوی مێژوودا هەر خول دەخوا و وەک هەمیشە دەبێتەوە فاکتی فریادرەسی (انقاذ)ی سووریا وەک هەڵە گەورەکانی کورد لە باشوور کردنی !!
لێرەش لە ئایندەیەکی نێزیکدا کورد دووبارە دەبێتەوە نێچیر و قوربانی دەستی هەڵە کوشندەکانی خۆی و دڕندەیی و نامرۆڤی دەسەڵاتی دیمەشق و داگیرکەرەکانی تری کوردستان، !!…
