زه‌مه‌ن
له‌پێنج ڕه‌كات نوێژه تێپه‌ڕناكات
ژوان
كونجێكی به مینچنراوه
ئه‌ڤین
هه‌ستێكی پاكه‌و ژ‌ه‌هری بیابان
گه‌روی گرتووه
مێرخاس
باباگوڕگوڕه و
ده‌واره‌كیژیش كه‌ركوك. .
شار ده‌گری و
شاده‌ماری (خاسه) پڕده‌كا له‌فرمێسكی خوێنن
وا خه‌ریكه شار له عه‌روبێ
به‌زۆری شمشێر ماره‌ده‌كرێ. .
شار
پڕ به ئاواتی سلێمانی،
پڕ به ناخی هه‌ولێر،
پڕبه كانه‌ی چاوی به‌رزان،
پڕ به هه‌ناسه‌ی دیاربه‌كر،
پڕ به پانتایی قامیشلی،
پڕ به خه‌وی قازی،
پڕ به ناڵه‌ی مه‌هاباد و كرماشان،
هێنده‌ی به‌رزی ئارارات،
هێنده‌ی هێمنی كانیێكی سازگار،
هێنده‌ی گڕوگاڵی كورپه‌یه‌كی دزراو،
هێنده‌ی قه‌ڵه‌می شاعێرێكی ده‌ربه‌ده‌ر
هێنده‌ی زیزی حه‌مرین و ئامه‌د
تاسه‌باری چاره‌نووسه
سه‌رۆك خێڵی خه‌نجه‌ر له‌پشتوێن
سه‌رگه‌رمی سواری ووشتر و ڕمبازی مه‌یدانه
نه‌ورۆز و به‌هاری
كردووه‌ته دیاری ماڵی عۆجه و
ئاڵاش كفنی سپی و
په‌ڕۆی به‌زین. .
خوازبێنیكه‌ران
كۆمه‌ڵێ ڕێگری قوره‌یشین
كۆمه‌ڵی ووشتره‌وانی بێسه‌وادن
كۆمه‌لێ سه‌ربه‌مێزه‌ره‌ی مێشكپوچن
كۆمه‌ڵێ ده‌روێشن
له زكری یاحوسێن و حه‌یئه‌ڵادا بێهۆشن
قه‌تاری ووشتران
ته‌زبیحێكی بێكۆتاییه
غه‌نیمه‌ی قه‌تار
شارێكی كوێستانیی دیله
گوڵاڵه‌یه‌كی ناو ڕ‌ه‌شماڵانه
هه‌لهۆله! بووكی دواڕۆژ هات. . بوكێ هات!
سه‌رۆك خێڵ
سه‌ری نه‌وییه و بۆشاردنه‌وه‌ی شه‌رمی،
خانه‌قین و سنجاریش ده‌كاته دیاری. .
شینه شاییه. . شینه‌شاییه. .
شینه‌شاییه و هه‌لهۆله هه‌لهۆله
قریوه‌ی هه‌لهۆله و هه‌لهه‌له
سه‌رۆك خێل مه‌ستده‌كات و
بێ كیژه‌ده‌وار ده‌گه‌ڕێته‌وه هه‌وار
(خه‌زال) یش چاوه‌ڕێی
هه‌ڵمه‌تی (لاس) ه. .
تا له (واحه) ی ناو لمدا
بۆ ژوانه‌ئامێزی مانگه‌شه‌و ئه‌ستێره
بیباته‌وه. .
. . . . . . . . . . . . . . . . . . . . . . . . . . . . . .
. . . . . . . . . . . .
خاسه:ڕوبارێكی ناوشاری كه‌ركوكه.
عۆجه:شوێنی له‌دایكبوونی سه‌دامی دیكتاتۆره.
لاس و خه‌زال :لاس و خه‌زالی ئه‌حمه‌دی خانی.
واحه: واحه‌ی ناو بیابان.
28-2-2004
